1A, Paul, a postle ob Jedus Christ, da write dis letta ta ya. God, wa sabe we, an we Lawd Jedus Christ, de one we da trus een, dey chaage me fa be Jedus postle.
2A da write ta ya, Timothy, me own son fa true een de fait. A pray dat God we Fada an Jedus Christ we Lawd show ya e blessin an e mussy an gii ya peace een ya haat.
De Teacha Dem wa Ain Laan People de Trute
3Jes like A beg ya wen A been gwine ta Macedonia, ya mus stay dey ta Ephesus. Some people dey da teach ting wa ain true. So ya mus stay dey so dat ya kin chaage um say, dey mus dohn laan people dat way no mo.
4Ya mus tell um say, dey mus dohn spen no time da study on dem story wa ain fa true an on dem long long list ob name ob dey granfada-fada. Cause dem ting dey jes mek people aagy. Dey ain hep fa mek people know bout God plan wa we da know bout by fait.
5A da chaage oona fa do dis so dat we all gwine hab lob wa da come fom haat wa ain got no sin, wiles we da try fa do all we know fa do right an trus een God fa true.
6Some people dey done ton way fom dem ting yah. An now dey da taak plenty foolish ting wa ain mek no sense.
7Dey wahn fa laan people God Law. Bot dey ain know wa dey da taak bout, needa dem ting dat dey da say dey know dey true fa sho.
8We know dat de law good, ef people folla um like dey oughta folla um.
9We know too dat de law dem ain been mek fa good people wa pay um mind. Dem law fa people wa ain wahn fa pay um no mind an fa crimnal dem, fa dem wa ain know God an fa sinna dem, fa dem wa ain got no spec fa God an tek de ting dem ob God fa mean nottin, an fa dem wa kill dey own fada an modda an den wa kill oda people.
10Dem law been mek fa people wa lib loose life an fa dem man wa da sleep wid oda man an dem ooman wa de sleep wid oda ooman. Dey fa dem wa da ketch people fa mek um slabe, an fa dem wa ain tell de trute, an dem wa da lie bot sweah dey da tell de trute, an fa dem wa da do waeba ting dat de true teachin say we mus dohn do.
11Dat de true teachin wa dey een de Good Nyews wa come fom de God we praise an wa hab all glory. E done trus me wid dat Good Nyews so dat A gwine go tell um ta people all oba.
Paul Tell de Lawd Tankya fa E Mussy ta Um
12A tell Christ Jedus we Lawd, tankya cause e cide fa trus me an so e pick me fa saab um. An e da gii me scrent fa do dis wok.
13Eben dough fo, A beena taak real bad ginst Christ an mek e people suffa an done um haam fa true, stillyet Christ hab mussy pon me cause A ain know no betta. Cause A ain been bleebe pon Christ den.
14We Lawd pour out e blessin pon me fa true, so dat now A one wid Christ Jedus, da bleebe pon um an da lob um.
15See yah, dis wod true fa sho, wa A gwine tell ya, an all people oughta bleebe wa dat say: Christ Jedus come eenta de wol fa sabe sinna dem. An A de one wa sin mo den all de odares.
16Bot God hab mussy pon me so dat e gwine show how Jedus Christ beah wid me fa mek oda people see dat ef e able fa beah wid me, wa sin mo den all de odares, e gwine be able fa beah wid de oda people wa gwine come fa bleebe pon um an git life wa ain neba end.
17Leh we hona an praise de King wa rule faeba, de one wa we ain able fa see, wa ain neba gwine dead. E de onliest God fa true. Leh we gim hona an praise faeba an eba! Amen.
18Timothy, me son, wa A da say ta ya da folla dem message dat God done gii ta dem prophet bout ya, so dat as ya da folla um, ya gwine hab de mind fa fight haad een dis good fight. Dat de chaage A gii ya.
19Ya mus trus een God fa true an do all ya know fa do right. Some people done ton way fom do wa dey know fa be right, an cause ob dat, dey done ruint dey fait een Christ.
20Hymenaeus, e one ob dem, an Alexander noda one. A done ton um oba ta Satan fa laan um dat dey mus dohn taak bad ginst God.
<< 1 Timotius 1 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel