Choch Leada Dem
1People taak true wen dey say: Ef a man wahn fa true fa be a choch leada, dat a real good wok dat e da wahn fa do.
2Now den, a choch leada mus lib so dat nobody ain got no good reason fa fault um. E mus hab jes one wife. E mus be a serious poson an able fa trol esef. An e mus mind e mannas so dat people show um spec. E mus open e house ta screnja an gim haaty welcome, an e mus know how fa teach fa true.
3E mus dohn be no dronka, an e mus dohn git bex real quick, da do people haam. Steada dat, e mus treat people kindly. E mus dohn like fa aagy. An e mus dohn lob money.
4E mus see dat ebryting go well een e own house. E mus mek e chullun do wa e tell um fa do an dey mus spec um een all ting.
5Cause ef a man ain able fa mek ebryting go well een e own house, fa sho e ain gwine be able fa tek cyah ob God choch, ainty?
6E mus dohn be a man wa jes come fa know Christ, cause den e might git de big head. An cause ob dat, God might condemn dat man, jes like e done condemn de Debil.
7Den too, a choch leada mus be a man dat behabe good so dat people wa ain Christian taak good bout um. Ef e ain behabe good, dey gwine taak bad bout um. Den e gwine be too shame an faddown eenta de trap wa de Debil set fa um.
Choch Deacon Dem
8Same way deacon dem wa da hep fa do God wok een de choch. Dey mus be serious man dem dat people kin spec, an dey mus mean wa dey say fa true. Dey mus dohn be no dronka, an dey mus dohn hab de big eye, da wahn fa git heapa ting fa deysef.
9Dey mus all de time keep on da bleebe de true ting dem ob de Christian fait, wa nobody ain know til God show um. An dey mus dohn doubt een dey haat dat wa dey bleebe right.
10Dem wa wahn fa be choch deacon haffa pass de test fus. Den, ef dey do well an so dat nobody ain got no reason fa fault um, leh um saab as deacon een de choch.
11Same way dey ooman. Dey mus be serious ooman dat people kin spec, an dey mus dohn onrabble dey mout, da say bad ting bout people. Dey mus be able fa trol deysef an do wa dey spose fa do all de time.
12De man wa da saab as deacon mus hab jes one wife, an e mus see dat ebryting da go well wid e chullun an all de oda people een e house.
13Ef de deacon dem do dey wok good fashion, den de people een de choch gwine hona um fa true an dey gwine be able fa taak wid tority bout de fait een Christ Jedus.
De Mystery wa God Show We
14Wiles A da write dem ting yah, A da hope A kin come see oona soon.
15Bot ef sompin keep me fom come right way, dis letta yah gwine leh ya know already de way we ob God fambly mus do. God fambly da de choch, wa blongst ta God wa got ebalastin life. An God choch da de pillar an foundation wa da support an keep safe de true teachin bout we fait een God.
16De true ting dem ob we fait, wa nobody ain know til God show um, dey great fa sho. An nobody kin deny dat. Dey de mystery wa God show we an wa laan we how fa lib fa God. “Christ come fa de wol een a human body. God Sperit show dat e been right. Angel dem see um. People been tell de Good Nyews bout um all oba een dem diffunt nation. Een de wol heapa people bleebe pon um. An God done tek um op ta heaben een glory.”
<< 1 Timotius 3 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel