Alkitab Mobile SABDA
[VER] : [GULLAH]     [PL]  [PB] 
 <<  1 Timotius 5 >> 

How We Oughta Hep People

1Ya mus dohn scold no man wa ole mo den ya. Reason wid um, an treat um wid spec same like ya fada. An ya mus treat de man dem wa mo nyounga den ya same like ya broda.

2Mus treat de ooman dem wa mo ole den ya same like ya modda. Mus treat de ooman dem wa mo nyounga den ya same like ya sista, een a pure an scraight way.

3Ya mus treat de widaooman dem wa ain got nobody fa hep um, wid spec.

4Bot ef dey widaooman wa got chullun o granchullun, dey mus laan fa do wa God wahn an do wa dey oughta do fa dey own fambly fus ob all, da gim wa dey need. An dat de way dey pay back some ob wa dey owe ta dey modda an fada an dey gramy an grandaddy. Ef dey do dat, dey da mek God heppy wid um.

5Wida ooman wa fa true ain got nobody fa hep um gwine look ta God fa hep. An dat ooman gwine pray jurin de day an jurin de night da aks God fa e hep.

6Bot de widaooman wa lib jes fa pledja esef, e done fa dead een God eye, eben dough e da lib.

7Ya mus chaage de widaooman an e fambly say, dey mus do dem ting wa A tell um fa do, so dat nobody ain gwine hab nottin fa fault um fa.

8Ebrybody mus tek cyah ob e own kin an especially dem een e own fambly. Ef e ain do dat, dat one dey da do jes like e fa say dat wa we bleebe bout God ain mean nottin tall. E da do mo wossa den somebody wa ain bleebe pon Christ.

9Ya mus dohn write no widaooman name down een de choch list wid de oda widaooman name dem, lessin e done sixty yeah ole an e been faitful ta jes one man, e husban.

10Pontop dat, mus be dat people know dat widaooman fa de good ting e da do: e oughta be a ooman wa raise e chullun right, an wa gii people haaty welcome ta e house. E oughta be a ooman wa wash de foot ob God people an hep people wa da suffa trouble. E oughta be a ooman wa all de time beena do all kind ob good wok.

11Ya mus dohn write no nyounga widaooman name down een de choch list. Cause wen dem nyounga widaooman wahn real bad fa git marry gin, dey kin ton way fom Christ.

12Een dat way, dey kin come fa be guilty fo God, cause dey broke de promise wa dey done been promise fus ta Christ.

13Fudamo, de nyounga widaooman dem kin git fa wastin time, jes fom gwinin an gwinin fom house ta house. An dey ain jes da waste time. Dey kin onrabble dey mout da taak bout oda people an meddlin een oda people bidness. Dey kin say ting wa dey ain oughta say.

14So den, A tink e mo betta dat de nyounga widaooman dem git marry gin an hab chullun, an mind e own house. Dey mus dohn gii de enemy nottin fa fault we bout.

15Cause some ob de nyounga widaooman dem done lef de way ob de Lawd an dey da do wa Satan wahn um fa do.

16Wen a man o ooman wa bleebe pon Christ got some fambly widaooman dem, e mus hep um. E mus dohn mek de choch consaan bout do um. Den de choch kin hep de widaooman dem wa fa true ain got nobody fa hep um.

17Consaanin de choch elda dem wa do good wok da lead de choch, specially dem wa da wok haad da preach an da teach, de people ob de choch oughta know dat dey good nuff fa true fa git double dey pay.

18Like dey write een God Book say, “Mus dohn tie op de ox mout wiles e da waak roun da tread out de grain” an “De wokman oughta git de pay e wok fa.”

19Ef somebody fault a choch elda, ya mus dohn listen ta um, lessin two shree witness say dat fa true.

20Dem elda wa keep on da sin, ya mus buke um out een de open, fo all, so dat de odares gwine be scaid fa sin.

21Fo God an de Lawd Jedus Christ, an God own angel dem, A chaage ya fa do dem ting yah wa A da tell ya fa do. Ya mus do um, da treat all people de same way. Mus dohn fabor nobody een nottin tall.

22Mus dohn hurry fa pit ya han pon somebody head fa pray fa um fa go do God wok. Mus dohn hab no paat een de sin ob oda people. Ya mus dohn hab no sin tall een ya life.

23Ya mus dohn jes drink wata no mo. Mus drink a leetle wine, too, fa mek ya food go down good, an fa hep ya wen ya git sick so much.

24Some people kin sin, an ebrybody kin see wa dey da do. An dey dat sin een dat way kin know dat dey sin da go head ob um ta jedgiment. Bot oda people kin sin, an nobody ain know now, bot people gwine know bye an bye.

25Same way so, people kin do good wok an ebrybody kin see wa dey da do. Bot ef people ain able fa see dem good wok tareckly, eben so dem good wok ain gwine hide long time fom people.



 <<  1 Timotius 5 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel