Alkitab Mobile SABDA
[VER] : [GULLAH]     [PL]  [PB] 
 <<  2 Korintus 6 >> 

1So den, we wa da wok togeda wid God da beg oona. Mus dohn leh de blessin wa God gii oona go fa nottin.

2Cause God say: “A been listen ta ya jes wen de right time come, an wen de day fa sabe oona come, A hep oona.” A da tell oona say, now de right time. Taday de day fa people fa be sabe!

3We da try fa lib so dat we ain gwine bodda nobody noway, so dat nobody ain gwine blame we fa de wok wa we da do.

4Bot by how we da do all ting, we da show dat, fa true, we da do God wok. We da beah op onda lotsa trouble, wen we da suffa, wen haad time come, an all kind ob bad ting come ta we.

5Sometime people beat we an pit we een de jailhouse, Sometime dey been a mob ob people wa bex come ginst we. Sometime we haffa wok til we cyahn wok no mo, an we haffa go dout no sleep an ain got nuff food fa nyam.

6Den too, we da show dat we da do God wok by de way dat we lib clean an ain do nottin dat gwine mek we shame, by how we know fa true bout Christ, by how we da beah wid people an got good haat fa um. An we da show um by de Holy Sperit an how we lob people fa true.

7Wen we da taak true an God powa dey pon we, dat show too dat we da do God wok. De way we da waak scraight wid God, dat we weapon wa we got fa fight, pon de lef han side an de right han side.

8Sometime people spec we, an sometime dey taak bad bout we. Sometime dey praise we, an sometime dey hole we cheap. We da taak true, bot sometime dey taak bad bout we, da say we ain taak true.

9People know we ebryweh, stillyet, sometime e like nobody know we. We been good as dead, bot stillyet, like ya kin see, we da lib. People mek we suffa, stillyet dey ain kill we.

10We kin hab hebby haat, stillyet we rejaice all de time. We ain got lotsa ting, stillyet we da mek lotsa people rich een fait. E seem like we ain got nottin, stillyet we got all ting fa true.

11We deah fren dem een Corinth, we haat open ta oona. We done tell oona all wa dey een we haat. We ain hide nottin.

12We ain shet op we haat ginst oona, bot oona da shet op oona haat ginst we.

13So A da taak ta oona now jes like oona me chullun. Open op oona haat ta we, like we own haat open ta oona!

Oona Mus Dohn Do Dem Ting Dat People wa Ain Know God da Do

14Oona mus dohn jine op wid people wa ain bleebe pon Christ, da try fa lib like oona one wid um. Cause ting wa right an ting wa ain right ain able fa jine togeda right ainty? How light an daakness gwine be one an lib togeda een one place?

15Christ an de Debil ain neba gwine gree togeda, ainty? How somebody wa bleebe pon Christ an somebody wa ain bleebe gwine gree togeda?

16De place weh God lib ain neba gwine gree fa jine op wid idol dem wa people mek fa pray ta! Fa true, God wa lib faeba an da gii life, we e house! God say, “A gwine lib een me people an mek me home mongst um. A gwine be dey God an dey gwine be me people.”

17An de Lawd say, “So den, oona mus come out fom mongst dem people yah wa ain bleebe. Mus dohn hab nottin fa do wid um. Oona mus dohn hab nottin fa do wid nottin wa ain clean fom sin. Den A gwine gii oona haaty welcome.

18A gwine be oona Fada, an oona gwine be me chullun, me son an daughta dem, Dat wa de Lawd wa got powa mo de all, say.”



 <<  2 Korintus 6 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2021
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran