De Teacha Dem wa Ain Taak True
1Bot some dem prophet wa been dey mix op wid de people, dey ain been no prophet fa true. Cause dey say dey taak God wod, bot dey ain taak God wod none tall. Same way so, dey gwine be people mix op wid oona. Some dem wa da laan oona bout God ain gwine taak true. Fo oona ketch op ta wa dey da do, dey gwine laan people ting wa ain true, wa kin stroy um. Dem teacha eben gwine ton dey back pon de Lawd wa done pay fa dey life wen e dead pon de cross. An dat gwine mek um git stroy all ob a sudden.
2Heapa people gwine folla dem fa lib free life. An wa dey da do gwine mek people taak bad ginst de true way we folla.
3Cause dey got de big eye, dem teacha yah gwine tell oona ting wa ain true, so dat dey kin git oona money. Way back dey, God done condemn um an cide fa stroy um. God ain neba sleep, an e gwine stroy um fa sho!
4God punish de angel dem wen dey done sin, ainty? E shrow um way eenta hell, wa daak mo den de night. God mek um stay dey, waitin fa de Jedgiment Day.
5God punish de people wa lib way back dey, ainty? E sen de Flood ob big big wata fa kiba op de wol an all de people wa ain wahn fa do wa God tell um. Bot God ain leh no wata kiba Noah, wa beena tell people fa do wa right een God eye. God sabe Noah fom de wata, long wid seben oda people.
6An God condemn de people wa lib een de city dem name Sodom an Gomorrah, ainty? E done stroy um, bun um all op wid fire. E done dat fa mek people wa come later on, see wa gwine happen ta dem wa ain wahn fa do wa God tell um fa do.
7Den too, God sabe Lot, wa beena da waak right wid God, ainty? An Lot been opsot fa true cause ob de free life de wickity people beena lib all roun bout um.
8Dat man Lot wa da waak right, e beena lib mongst dem people. E been bex een e good haat ebry day an e suffa fa true, cause ob all de wickity ting e beena see an yeh dem people do.
9All dis show dat fa true, de Lawd know how fa bring people wa lib fa God outta dey fliction, wiles e da punish dem wa ain fa do wa God tell um, da keep um til de Jedgiment Day come.
10Mo den all, God gwine punish dem wa lib free life, da folla dey haat fa do dorty ting wid dey body, an God gwine punish dem wa spise tority too. Dem teacha wa laan people ting wa ain true, dey ain got no shame, an dey da do waeba dey head gim fa do. Dey ain scaid fa sult dem wa got powa fa rule oba people.
11Angel dem got scrent an powa mo, fa sho, den dem wickity teacha yah. Stillyet, eben de angel dem ain neba sult dem teacha wen dey cuse um dey fo de Lawd.
12Bot dem teacha yah, dey taak bad bout ting dey ain know nottin bout. Dey jes like wile animal wa ain tink tall. Dey jes do wa dey head gim fa do. So jes like de wile animal dem git bon an come eenta de wol fa leh people ketch um an kill um, same way so, God gwine stroy dem wickity people.
13Cause dey beena mek people suffa, dey gwine suffa too an git dey payback. Eben een de day time, dey heppy fa do waeba dey feel like wid dey body. Dey da shame an disgrace oona wen oona all nyam togeda, same time dey heppy cause ob de way dey da ceebe oona.
14Dey eye ain scraight. Dey wahn fa lib free life an sleep roun wid ebry ooman dey see. Dey all de time wahn fa sin mo an mo. Dey da draw people wa ain got dey own mind, fa folla um fa do bad. Dey big eye da trol um so dat dey wahn fa git all ting fa deysef. God done condemn um an dey gwine be stroy.
15Dem wickity people yah done lef de way wa right, an dey done loss. Dey beena waak een de way wa Balaam, Beor son, beena waak. Balaam hab de big eye. E lob de money e fa git fa do ting wa ain right.
16Bot Balaam own donkey taak like a human ta um an buke um fa de bad ting e beena do like a crazy man. Cause ob dat, Balaam ain do dat bad ting e beena wahn fa do.
17Dem wickity people yah same like well wa ain got no wata een um. Dey same like daak cloud wa da show dat rain wahn a come. Bot de big breeze blow um way, an ain no rain come tall. God da keep a daak daak place fa pit dem people yah.
18Dey da taak loud bout wa ain mean nottin. Dey lib free life. An dey tek ta de dorty ting dey wahn een dey haat an draw people wa jes da staat fa scape fom oda people wa lib een de way wa ain right. Dem wickity people lead um fa folla um fa staat fa lib bad life gin.
19Dey da tell people wa dey da draw fa folla um, say dey gwine be free, bot deysef ain free tall. Dey slabe, cause dey ebil way da trol um. Cause wen somebody ain able fa stop do sompin, dat one done come fa be slabe ta dat ting dey.
20People come fa know bout we Lawd Jedus Christ, wa sabe we, an cause ob dat, dey scape fom dey ebil way wa da stroy people een de wol. Bot den ef dey ton back an go ta dat kind ob bad life gin an dey ain able fa leabe dey ebil way gin, den dey life gwine be bad way mo den e been fo.
21E woulda been way mo betta ef dey ain neba know de right way wa God wahn um fa bleebe an fa waak, den fa dem fa know de right way an den ton back an stop da folla God chaage wa e gim.
22Wa happen ta dem wa ton way fom God, dat jes like dem true paable wa tell we say, “Dog da ton back fa go lick e vomit” an “Hog wa dey done wash, e go back fa roll een de mud.”
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel