Alkitab Mobile SABDA
[VER] : [GULLAH]     [PL]  [PB] 
 <<  2 Petrus 3 >> 

De Day ob de Lawd

1Me fren, oona wa A lob, now dis de secon time A da write oona. Een dem two letta yah, A done write oona fa memba oona bout dem ting wa A beena tell oona. A do dat so dat oona gwine keep on da study pon de ting dem wa right fa true.

2A wahn fa mek oona memba dem ting wa God prophet dem beena tell de people way back dey, an dem ting wa we Lawd wa sabe we, tell e postle dem fa chaage we fa do.

3Mo den all, mus ondastan dat wen de wol mos done fa, people gwine come wa gwine laff at oona an tek oona fa fun. An dey gwine do wa dey haat gim fa do.

4Dey gwine say, “E promise, say e gwine come back, ainty? Weh e dey? We fada an modda done dead, stillyet nottin ain change een dis wol. Nottin ain change fom de time God mek de wol!”

5Dem people ain wahn fa memba dat long way back dey, God taak an gii de chaage, an de heaben been dey. An God mek de eart outta wata an wid wata.

6An wid wata too, de wata ob de Flood, God done kiba oba de eart wa been dey een dat time, an e stroy de wol.

7Bot dat same wod ob God wa mek all de heaben an de eart wa dey now, e da keep um safe. God da keep um fa mek um bun op een fire pon de day wen God gwine jedge de people wa ain wahn fa do wa e say. An e gwine stroy um.

8Me deah fren, memba dat one day een God eye same like one tousan yeah, an one tousan yeah same like one day.

9De Lawd da do wa e promise fa do. E ain wastin time like some people tink. Bot e da beah wid oona cause e ain wahn nobody fa be stroy. E wahn all people fa ton ta um, an change dey way an stop fa sin.

10Stillyet de Day wen de Lawd come back gwine come all ob a sudden, jes like tief kin come. Wen dat Day come, dey gwine be a big noise an de heaben ain gwine be dey. God gwine mek de eliment dem bun op an git stroy. De wol an all wa een um gwine bun op.

11Dat de way all ting gwine be stroy. So den, wa kind ob people oona oughta be? Oona oughta waak wid God an do dem ting e wahn, an dat gwine mek people know dat oona God own people.

12Dat so oona oughta do wiles oona da wait fa de Day wen God gwine jedge de wol. An oona oughta do all oona kin do fa mek dat Day come quick. Cause dat Day dey, de heaben gwine bun op an be stroy, an all de eliment gwine melt op, cause e so hot.

13Bot we da look fa de nyew heaben an de nyew eart wa God done tell we, say we gwine git. All people gwine do wa right een dat wol dey.

14So den, me deah fren, cause oona da look fa dis fa come, do all oona kin, so dat oona gwine be at peace wid God an e ain gwine find no sin o fault tall een oona life.

15We Lawd da beah wid all ting fa now, an oona oughta know dat e da beah wid um fa mek people git de chance fa be sabe. We deah broda Paul too beena write same ting ta oona bout dis, wid de sense wa God gim.

16Dis wa Paul say een all de letta wa e write bout dat. Some dem ting yah wa Paul write een e letta, dey haad fa ondastan. An people wa ain know nottin an wa ain got dey own mind, wen dey try fa splain um, dey da twis op de meanin ob dem ting dat Paul say. Same way so, dey da twis op de oda ting een God Book. Cause dey da do dat, dat gwine mek um git stroy.

17So den, me deah fren, oona mus tek cyah. Mus dohn leh de bad teachin ob dem people yah wa ain lib coddin ta God Law, tek oona outta de way an mek oona own haat stop fa trus dem true ting oona beena know fa sho.

18Steada dat, laan mo an mo bout we life een we Lawd Jedus Christ, we Sabior. Lib so dat oona gwine see mo an mo how God da gii oona e blessin. Leh we gii Christ glory now an faeba mo! Amen.



 <<  2 Petrus 3 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran