Alkitab Mobile SABDA
[VER] : [GULLAH]     [PL]  [PB] 
 <<  2 Timotius 1 >> 

1A Paul, a postle ob Jedus Christ da write dis letta ta ya. A e postle cause God wahn me fa be so. E sen me fa come tell bout de life wa e promise fa gii we an wa we got cause we one wid Christ Jedus.

2A da write ta me chile een de fait, Timothy, wa A lob. A pray dat God we Fada an Christ Jedus we Lawd show ya e good fabor an e mussy an gii ya peace een ya haat.

Paul Courage Timothy

3A da tell God tankya, an A da do all A kin do fa saab um, jes like me ole people done do. Wen A da pray fa ya jurin de night time an de day, A kin tell um tankya.

4A memba how ya beena cry, an A wahn fa see ya real bad, so dat me haat kin be full op wid joy.

5A memba how ya trus God wid all ya haat, jes like ya granny Lois an ya modda Eunice. An now, A sho dat ya too trus God like dem.

6Dat mek me memba ya fa keep on da nyuse mo an mo de gif wa God gii ya wen A pit me han pon ya head an pray fa ya.

7De Sperit dat God gii we ain mek we scaid. God Sperit mek we scrong fa wok fa God. E pit lob een we haat an mek we able fa trol wesef.

8So den, ya mus dohn be shame fa tell people bout we Lawd, o fa me wa een de jailhouse fa sake ob de Lawd. Bot ya mus tek ya own paat da suffa long wid me fa sake ob de Good Nyews, wid de powa wa God gii ya fa mek ya able fa beah um.

9God sabe we an call we fa be e own people wa lib fa um, da pit um fus een we life. E ain call we cause ob nottin we done, bot fa sake ob wa e done been plan fa do an cause ob e mussy. Fo time staat, e done been gii we dat blessin shru Christ Jedus.

10An now God show we dat blessin wen we Sabior, Jedus Christ, come. E done stroy de powa dat det hab oba people, an by de Good Nyews mek people know fa true bout dat life wa ain neba end.

11God done pick me fa tell people ebryweh de Good Nyews an e sen me fa be a postle an a teacha.

12Dat hoccome A da suffa dem ting yah. Stillyet, A ain shame tall, cause A know de one dat A trus een. An A know fa true dat e able fa keep safe all dat A trus um fa, til dat Day.

13Dem true wod wa A been tell ya, ya mus pit all ya haat pon dem. Ya mus folla dem as ya xample. Mus keep on da lib een de way ob fait an lob een Christ Jedus.

14Keep dat good ting yah, de trute wa God done trus ya wid. Keep um safe by de powa ob de Holy Sperit, wa dey eenside we.

15Ya know dat all dem een Asia country done ton way fom me an gone. Phygelus an Hermogenes done gone too.

16Leh de Lawd show e mussy ta all dem wa lib een Onesiphorus house, cause e courage me plenty time. An e ain been shame cause A yah een de jailhouse.

17Bot soon as e done git ta Rome, e staat fa look fa me an e beena keep on til e find me.

18Leh de Lawd gim e mussy pon dat Day! Y know fa true hommuch Onesiphorus done wok fa hep me een Ephesus.



 <<  2 Timotius 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel