Alkitab Mobile SABDA
[VER] : [GULLAH]     [PL]  [PB] 
 <<  Efesus 3 >> 

De Wok ob Paul Mongst de People wa Ain Jew

1Cause ob dat, A da pray ta God, A, Paul, wa come fa be a prisona, cause A da saab Christ Jedus an wok fa sake ob oona wa ain Jew.

2Fa sho, oona beena yeh how God bless me, da gii me dis wok fa do fa hep oona.

3God done show me e plan wa people ain know fo. (A been write oona a leetlebit bout dat.

4Wen oona read wa A done write, oona gwine know wa A ondastan bout dat plan ob God wa people ain know bout fo, wa Christ done mek happen.)

5God ain tell none ob de people wa beena lib way back dey bout all dis plan yah. Bot now de Holy Sperit done show de secret ta God postle an prophet dem wa fa true blongst ta um.

6De secret wa God ain show people fo, e dis: Wen dem people wa ain Jew bleebe de Good Nyews jes like de Jew people bleebe, God gim all de same good ting. Dey all togeda come ta blongst ta one body. An Christ Jedus mek um all git wa God been promise um.

7God bless me fa mek me Christ saabant fa tell de Good Nyews all oba, an e gii me e powa fa dat wok.

8All God people mo betta den me. Stillyet, God bless me an pick me fa go tell de people wa ain Jew bout all de blessin dem dat Christ da gii e people. Dem blessin so good dat we ain eben able fa ondastan all bout um.

9An God pick me fa splain ta all people an mek um ondastan how God gwine mek e secret plan happen. All dis time yah wa done pass een dis wol, God, wa mek all ting, ain leh people know bout all wa e da plan.

10God do all dat so dat de choch could mek de rula an de tority dem een heaben know now at dis time all de diffunt way dat God hab sense fa true een ebryting.

11God done dis jes like e always beena plan fa do um, shru Christ Jedus we Lawd.

12Cause we know we trus een Christ an we come fa be one wid um, we free fa come fo God. We ain scaid tall fa come.

13So den, A da beg oona, mus dohn git weary cause A da suffa yah fa oona sake. Cause e suffa fa oona glory dat A da suffa.

Hommuch Christ Lob All People

14Cause ob dat, A da kneel down fo we Fada God.

15E de one wa gii ebry fambly een heaben an een dis wol dey true name.

16A da pray ta God dat fom dem special blessin wa e got een heaben, e gii oona powa fa mek oona scrong een de Lawd een oona haat. De Holy Sperit e de one wa da do dis.

17An dat so e stan, cause oona trus een um, Christ always mek e home dey een oona haat. So den, waeba oona do, oona gwine do um cause ob lob, jes like a tree wa got root wa go down deep eenta de groun an grip de groun tight. An dat lob gwine be like a scrong foundation fa oona.

18So den, A pray dat oona, togeda wid all de odares ob God people, gwine hab powa fa ondastan hommuch Christ lob we fa true, how wide e lob an how long, how high e lob an how deep.

19A da pray dat God mek oona come fa know dis lob ob Christ, eben dough dey ain none ob we kin know all bout how e lob we. Den wen oona know how Christ lob oona fa true, oona kin be all full op een oona life wid all wa God da.

20Leh we gii glory ta God! Cause ob e powa wa da wok eenside ob we, God able fa do faa way mo den all we could eba aks fa o eben tink ob.

21Leh we gii glory ta God! Leh all we people wa een de choch an wa one wid Christ Jedus gii glory ta um, fa all time, fa eba an eba! Amen.



 <<  Efesus 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel