Alkitab Mobile SABDA
[VER] : [GULLAH]     [PL]  [PB] 
 <<  Filipi 2 >> 

We Oughta Dead ta Wesef Jes Like Christ

1Een oona life, oona all been jine togeda wid Christ, an dat da courage oona fa true, ainty? Cause Christ lob oona, oona ain haffa warry, ainty? An oona hab God Sperit dey eenside oona, da mek oona altogeda one wid um, ainty dat so? Oona saary fa one noda an oona wahn fa do good ta one noda, ainty?

2So den, A da beg oona now fa mek me haat heppy fa see oona jine togeda fa be one een de way oona tink, lob one noda een de same way, an all gree togeda wid one haat an one mind fa do de wok.

3Mus dohn do nottin jes cause oona wahn fa pit oonasef head ob oda people. Mus dohn do nottin jes cause oona wahn people fa praise oona. Mus dohn hab da big head. Stead ob dat, ebry one ob oona oughta feel dat de oda people mo betta den esef.

4Ebry one ob oona mus dohn jes study bout how fa protec e own ting. Mus study bout how fa protec oda people ting too.

5Oona oughta tink een oona haat same like Christ Jedus:

6E always been God fa true, Stillyet, e ain tink e oughta keep on da try fa stan same like God stan.

7Stead ob dat, Jedus gii op all e high standin an e mek esef fa be jes like a saabant. E come eenta de wol like a man.

8E mek esef tek low an e been ready fa do all wa God tell um fa do, E done dead ta esef, eben greein fa dead pon a cross.

9Cause ob dat, God raise um op an mek um hab high standin, mo high op den all oda, an God gim de name wa great mo den all oda name.

10So dat fa show hona ta de name ob Jedus, all dem een heaben, an een dis wol, an all dem wa dey onda dis wol, all ob um gwine bow down fo Jedus.

11All dem gwine tell ebrybody out een de open, say, “Jedus Christ, e de Lawd.” So ebrybody gwine praise God de Fada.

Oona Gwine Shine Like Light Een de Wol

12Me fren, oona wa A lob so much, oona all de time do wa A tell oona fa do, Ain jes wen A been dey wid oona, bot now eben mo so wen A ain dey wid oona, mus keep on da do wa A say. Mus try eben mo fa keep on da do all oona kin so dat God sabin wok een oona haat gwine git mo greata den all. An oona oughta do dat, da know dat oona sponsible ta God an mus show um hona.

13Cause God da wok eenside oona haat so dat oona wahn fa do wa e wahn oona fa do, an so dat oona do um.

14Oona mus dohn grumble bout one noda an mus dohn aagy weneba oona da do sompin.

15Den oona gwine hab clean haat, an oona gwine be chullun ob God dat ain mix op wid no sin, eben dough oona dey yah een de wol, wid people wa wickity an wa da lib bad life all de time. Den oona life gwine shine fa um like staa light op de sky.

16Oona mus be da tell um de wod wa da mek people lib fa true. Den wen de Day come dat Christ come back, A gwine be heppy fa true bout oona, cause oona life gwine show dat all de haad wok wa A done fa oona sake ain gone fa nottin.

17Bot eben ef dey git fa kill me an me life blood git pour out like a offrin pon de sacrifice dat oona da mek ta God cause oona trus een Christ, A heppy, an A da rejaice wid all ob oona.

18Same way, oona oughta be heppy an rejaice wid me.

De Wok ob Timothy an Epaphroditus

19A spect fa sen Timothy fa come ta oona tareckly, ef de Lawd Jedus wahn um dat way. Den wen e come back e kin tell me bout oona, an dat gwine courage me.

20A ain got nobody else like Timothy, wa da memba oona jes like A da memba oona. E da cyah bout oona fa true.

21All dem oda jes da study bout how dey kin git head deysef. Dey ain study bout how dey kin hep fa tell people bout Jedus Christ.

22Bot oona know dat Timothy been show dat e da do real good wok. E da wok wid me jes like e me son an A e fada, fa hep mo an mo people bleebe de Good Nyews.

23So den, A hope fa sen Timothy ta oona weneba A know wa gwine happen ta me.

24An de Lawd mek me bleebe dat tareckly A, too, gwine come ta oona.

25A mek op me mind dat A haffa sen me bredren Epaphroditus, fa go back ta oona. E beena do Christ wok wid me an been Christ sodja wid me fa fight fa Christ. E been oona messenja, wa oona sen fa hep me git wa A need.

26Epaphroditus wahn fa see all ob oona real bad. E opsot cause oona yeh say dat e been sick.

27Fa true, e been real sick, an e come neah ta dyin. Bot God hab mussy pon um. An God hab mussy pon me, too, so A ain haffa be eben mo sad.

28So den, dat mek me wahn eben mo fa sen Epaphroditus ta oona so dat wen oona shim, oona gwine be heppy gin, an den A ain gwine warry sommuch bout um.

29Gim haaty welcome an rejaice dat e come ta oona, cause e oona broda een de Lawd. Oona oughta gii hona ta people like dat.

30Cause fa de sake ob Christ wok, e pit e life een danja an e mos dead so dat e could mek op fa de hep dat oona ain been able fa gii me.



 <<  Filipi 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel