Paul an de Oda Postle Dem
1Atta foteen yeah, A gone back op ta Jerusalem. Barnabas gone long wid me. An A done tek Titus long too.
2A gone ta Jerusalem cause God done show me dat A oughta go dey. A hab meetin wid jes de leada dem ob de choch an splain ta um de message ob Good Nyews dat A da tell ta de people wa ain Jew. A meet wid jes de leada dem, cause A ain wahn fa hab de wok wa A done beena do an de wok wa A da do mount ta nottin.
3Titus, wa come wid me, e a Greek. Stillyet, dey ain eben mek um git circumcise.
4Dey scuss bout dat, cause dey been some people dey dat beena wot fa mek Titus git circumcise. Dem same people yah beena mek like dey bleebe pon Jedus Christ. Bot dey beena come mix wid we fa find out bout wa we bleebe. Dey see dat cause we trus een Christ Jedus, we free fa do all ting wa God wahn we fa do. An dem people dey beena wahn fa mek we slabe ta de Jew Law.
5Bot we ain gree eben one minute fa leh um change de true message wa da de Good Nyews. Cause we wahn dat true Good Nyews fa be wid oona an be sabe faeba fa oona.
6Now dem people een Jerusalem dat dey say be leada een de choch, dey ain tell me nottin fa mek me change de message ob de Good Nyews dat A beena tell people. Ain no neba mind ta me who dem people be, cause God ain neba jedge nobody coddin ta wa e pear fa be.
7So dem choch leada see dat dey ain oughta change nottin bout de Good Nyews dat A beena tell. Bot dey see dat fa true, God pick me an sen me fa go tell de people wa ain Jew de Good Nyews. Same way, God pick Peter an sen um fa tell de Jew people de Good Nyews.
8Cause God powa beena wok een me fa sen me fa go tell de Good Nyews ta de people dat ain Jew, jes like God powa beena wok een Peter fa sen um fa go tell de Jew people.
9James, Peter, an John, dem wa people say been de big leada dem een de choch, dey see dat God been bless me fa gii me dis special wok yah fa do. So dey shake me han an Barnabas han fa show dat we one een we wok fa God. Dey gree wid we dat we oughta go wok mongst de people wa ain Jew, an dey oughta go wok mongst de Jew people.
10Dey jes aks we fa do one ting say, “Leh we keep on hep de people wa ain hab nottin.” An A always beena wahn fa do dat, fa sho.
Peter an Paul at Antioch
11Wen Peter come ta Antioch, e beena do sompin wa A ain gree wid. An A tell um dat, cause fa sho e ain beena do right.
12Dis wa happen: James done been sen some people dem ta Antioch. Now fo dey git dey, Peter nyuse fa nyam wid de Christian dem wa ain Jew. Bot atta dem people dat James sen, git dey, Peter ain wahn fa nyam no mo wid dem Christian wa ain Jew. Cause e beena scaid ob dem dat say dey oughta circumcise all de Christian man dem wa ain Jew.
13Den de oda Jew Christian bredren too, dey staat fa do wa dey know ain right. Dey do jes like Peter beena do, an dey stop fa nyam wid de Christian wa ain Jew. Eben Barnabas cide fa go dey way an do wa e know ain right.
14Den A come an see dat dey ain do right coddin ta de true wod, wa da de Good Nyews. So A stanop fo all de Christian dem, an A tell Peter say, “Ya a Jew, stillyet ya beena lib like ya ain no Jew. Ya ain beena do wa Jew people da do. Now den, hoccome ya da try fa mek dem wa ain Jew do jes like Jew people?”
God Sabe People Cause Dey Trus een Christ
15Fa true, we fada an modda dem, dey Jew people. We ain been bon ta people dat ain Jew, dem we call sinna.
16Stillyet, we know dat jes cause somebody da do wa de Jew Law say e haffa do, dat ain gwine mek all ting right tween dat poson an God. Wen e trus een Jedus Christ, jes dat an no mo mek all ting right tween dat poson an God. Same way so, we too trus een Christ Jedus, so dat God mek all ting right tween we an um, cause we trus een Christ. Ain been cause we da do wa de Jew Law say we haffa do. God ain neba gwine mek ting right wid nobody jes cause dat one da do wa de Jew Law say.
17We pit we hope pon God da mek all ting right tween esef an we, cause now we one wid Christ. Bot wiles we da hope dat way, ef e ton out dat we da sin jes like dem wa ain Jew, dat ain mean dat Christ da courage we ta sin, ainty? No, dat ain so!
18Ef A staat fa build op dat wa A done been knock down, dat mean fa say dat A da broke de Law an A da sin fa true.
19Cause A jes like somebody wa done dead, an so de Jew Law ain hab no powa oba me no mo. Dat Law esef done mek me dat way. All dis happen so dat A could lib fa God.
20A done dead wid Christ pon e cross. An A ain de one wa stillyet da lib. Christ de one wa da lib een me. Christ gii me life. Now dat A trus een God Son, dat mek me lib de way A da lib. De Son ob God so lob me dat e sacrifice e life fa me sake.
21So den, A ain gwine say dat de way God gii e blessin ain wot nottin. Ef somebody kin do wa de Jew Law say e haffa do an dat kin mek all ting right twix dat poson an God, den dat mean fa say dat Christ done dead fa nottin!
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel