Alkitab Mobile SABDA
[VER] : [GULLAH]     [PL]  [PB] 
 <<  Ibrani 13 >> 

How fa Please God

1Oona mus keep on da lob oona Christian bredren all de time.

2An mus dohn fagit fa gii a haaty welcome ta de come-yah people wa come ta oona. Some people beena gii a haaty welcome ta come-yah people an dey ain know dat some ob um wa come ta um been angel,

3Memba fa hep de people wa dey een de jailhouse, jes as ef oona been dey een de jailhouse wid um too. An oona oughta memba dem wa da suffa, jes as ef oona beena suffa an feel de pain een oona own body.

4Leh all people spec de marry life. De husban mus dohn sleep wid noda ooman, an de wife mus dohn sleep wid noda man. God gwine jedge dem wa lib free life. An e gwine jedge ebry marry man wa sleep wid noda ooman wa ain e wife. An e gwine jedge ebry marry ooman wa sleep wid man wa ain e husban.

5Always stay way fom de lob ob money. Mus be sattify wid wa oona got, cause God say, β€œA ain neba gwine leabe ya. A gwine stay wid ya all de time fa hep ya.”

6Dat mek we know fa sho wa we da taak bout wen we say, β€œDe Lawd de one wa da hep me. Ain nottin gwine mek me scaid. Cause ain nobody got mo powa fa do me bad, ainty?”

7Mus dohn fagit dem people wa been oona leada dem wa beena tell oona God wod. Study oona head bout wa beena happen cause ob de way dey beena lib. An trus God jes like dey been trus um.

8Jedus Christ de same taday jes like e been yestiddy an e gwine be jes de same faeba. E ain neba gwine change.

9Mus dohn leh all kind ob scrange ting wa people da laan oona, ton oona fom de true way. Wen God mussyful blessin da mek we haat scrong an courage we, dat good fa true. Bot fa folla rule bout wa ting we oughta nyam, dat ain wot nottin ta we. Dat ain hep de people wa nyam dat way none tall.

10De Jew priest dem wa da wok een de Jew tent, dey ain got no right fa nyam none ob de sacrifice pon we alta.

11De head man ob de Jew priest dem, e always bring de animal blood eenta de place weh God Dey Mo Den Any Oda Place, fa offa um op dey fa a sacrifice fa tek way people sin. Bot de animal dem wa dey kill, dey bun um all op outside way fom weh people lib.

12Same way so, Jedus too suffa an dead way fom weh people lib, outside de city gyate, so dat e kin gii e own blood fa tek way de people sin.

13So den, fa true, leh we come out fom weh people be an go ta Jedus. Wid um, leh we beah e shame wa e suffa pon de cross.

14Cause yah een dis wol we ain got no city wa gwine las. We da look fa de city weh we gwine lib bye an bye.

15So den, shru Jedus leh we praise God all de time. Wen we da praise God shru Jedus, we da offa op a sacrifice ta God. Dat we offrin wa we bring ta God wen we praise um, say we blongst ta Jedus.

16Mus dohn fagit fa do good an fa gii people paat ob wa oona got. Cause dem de kind ob sacrifice wa please God.

17Oona mus do wa oona leada dem tell oona fa do an pit oonasef onda um. Dey da watch oba oona, cause dey gwine haffa tell God bout dis wok wa dey da do. Mus do wa dey tell oona fa do, so dat dey gwine be heppy fa do dey wok. Bot ef oona ain do wa dey say, dey wok gwine gim a hebby haat, an dat ain gwine hep oona none tall.

18Pray ta God fa we. We know fa sho dat we done do all dat we know we oughta do. Cause we wahn fa do wa right een ebry way.

19A da beg oona eben mo fa pray fa me so dat A kin come back ta oona mo soon.

De Las Wod Dem ob Dis Letta

20De God ob peace done mek we Lawd Jedus git op fom mongst de dead an lib gin. Fa true, Jedus de head shephud ob de sheep cause e done dead fa we an e blood done mek sho dat de cobnant, wa God mek wid we, gwine las faeba.

21A da pray dat God gii oona ebry good ting oona need fa do wa e wahn oona fa do. An A da pray dat God mek de powa ob Jedus Christ wok een oona so dat oona gwine be wa e wahn oona fa be. Leh de people gii glory ta Jedus Christ faeba an eba! Amen.

22Me Christian bredren, A da beg oona say, mus dohn hurry shru me letta. Pay mind fa true ta wa A da courage oona fa do, cause dis letta wa A write oona ain long.

23A wahn oona fa know dat dey done leh we broda Timothy outta de jailhouse. Ef e come soon nuff, A gwine bring um wid me wen A come fa see oona.

24Greet all oona leada een de choch an all God people dey, fa me. We Christian bredren fom Italy da greet oona.

25A pray dat God bless all ob oona. Amen.



 <<  Ibrani 13 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel