1Now den, God still da promise we, say we kin go eenta dat place weh e gwine gii we res. So den, leh we tek cyah so dat none ob oona ain gwine miss out an God gwine jedge ya say, “Ya done miss ya chance fa go eenta dat place weh A been gwine gii ya res.”
2Cause people been tell we de Good Nyews, jes like dey done been tell dem people way back dey een de desat. Bot wa dey yeh ain hep um none tall. Cause wen dey yeh um, dey ain bleebe.
3Now we wa bleebe, we go een an God gii we res. Jes like God say, “A been bex wid um so A promise fa true say: ‘Dey ain neba gwine go eenta dat place weh A been gwine gim res!’” God say dat, eben dough e done been mek all ting ready fa wa e gwine do, fom de time wen e mek de wol.
4Dey write een noda paat ob God Book bout de seben day, weh God say, “Pon de seben day, God res op fom all e done do.”
5An noda time een dat same paat ob God Book, God say, “Dey ain neba gwine go eenta dat place weh A been gwine gim res.”
6Dem people way back dey, dey yeh de Good Nyews wa God tell um. Bot cause dey ain do wa e say, dey ain neba go eenta dat place weh God been gwine gim res. Fa true, some people still gwine go eenta dat place weh God gim res.
7Cause God done fix noda time, a day wa e call “Taday.” Atta plenty yeah done pass, God hab David say dem wod yah, wa A jes tell oona say, “Ef oona yeh God boice taday, mus dohn hab haad haat.”
8Ef Joshua been lead de people eenta dat place weh God gim res, God ain been fa taak later on bout noda day.
9So den, wa God say show we dat dey still a place fa God people fa res, like wen God mek de wol an e stop e wok pon de seben day an e res.
10Cause wen somebody go eenta God place fa res, dat one gwine stop e own wok, jes like God stop e wok.
11So den, we mus try wid all we haat fa go eenta dat place ob res. We haffa do wa God say, so we ain fall like we ole people.
12De wod ob God got life an e got powa fa true. God wod shaap jes like a sode wa got two shaap edge, bot e wod shaap mo den de sode. Cause de sode kin jes cut eenside somebody eenta e joint an bone. Bot God wod da cut all de way deep down eenta de poson soul an e sperit. God wod da go eenside a poson haat an show wa dat poson da tink an wa e da wahn fa do.
13Dey ain nottin ob all wa God mek, wa e cyahn see. Dey ain nobody kin hide fom God, nottin wa God ain see, fa true. God da see all ting, an e de one we mus gii ansa ta, bout wa we done do een de wol.
Jedus we Great Head Priest
14Now den, we mus dohn neba stop fa hold on wid all we haat ta wa we say we bleebe bout Jedus. Cause we got a great head priest wa dey fa we, an e gone eenta heaben weh God da. Dat Jedus, de Son ob God.
15We head man ob de priest, e de one wa dey fa we, e ondastan fa true all bout de ting wa too haad fa we. Cause e been one ob we, Satan done beena try fa mek um sin een ebry way e da try fa mek we sin. Stillyet, Jedus ain neba sin none tall.
16So den, we mus dohn be scaid eben a leetle bit. Leh we come nigh ta God, wa rule wid e blessin. Den e gwine hab mussy pon we an bless we at jes de right time, wen we need um.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel