Jedus de Head Priest ob de Nyew Cobnant
1Now de ting wa we da tell oona mo den all, dat we got susha head man ob de priest dem, jes like we beena taak bout. E Jedus, de one wa seddown at de right han side ob God trone een heaben.
2Jedus da wok, as head priest een de Mos Holy Place weh God dey. Dat de real tent ob woshup fa true, de tent wa de Lawd God pit op. No man ain pit um op.
3Ebry head man ob de priest dem, e been pick so dat e kin offa gif an sacrifice ta God. Same way so, we head man too mus hab sompin fa offa ta God.
4Ef Jedus been een dis wol now, e ain been fa be head man tall, cause dey priest dem een dis wol wa keep on offrin gif ta God yah, jes like de Jew Law say.
5De wok wa dem priest do, dat same like a copy o a shada wa da show wa op dey een heaben een de real woshup place weh God dey. Dat hoccome wen Moses been ready fa build de tent ob woshup weh dem priest been gwine do dey wok, God tell um say, “Ya mus be sho fa mek all ting jes like de pattern A show ya wen ya been dey pon Mount Sinai.”
6So now we see dat God pick Jedus fa do de wok ob a priest, an dat wok betta fa true, mo betta den de wok wa dem oda priest da do. Same way so, de cobnant wa Jedus mek tween God an people stan betta fa true, mo betta den de ole cobnant. Cause een dis nyew cobnant, God mek promise wa mo betta fa true den een dat ole cobnant.
7Ef dat fus cobnant woulda been able fa do wa e need fa do, dey ain oughta been no need fa noda cobnant.
8Bot God been tell de people say, dey ain been do wa de fus cobnant say. Dat mek de Lawd God say, “De time da come wen A gwine mek a nyew cobnant wid de people ob Israel an wid de people ob Judah.
9Dis nyew cobnant yah ain gwine be like de cobnant A mek fo wid dey ole people, wen A tek um by de han fa lead um outta Egypt lan. Dem people ain keep on da do wa de cobnant A mek wid um say dey oughta do, So A lef um an leh um go dey own way.”
10De Lawd say, Wen de time come, dis de cobnant A gwine mek wid de people ob Israel. A gwine mek um study pon me law dem an mek um know um fa true een dey haat. A gwine be dey God, an dey gwine be me people.
11De people ain gwine haffa laan dey neighba, needa dey broda no mo da say, ‘Ya mus come fa know de Lawd.’ Cause dey all gwine know me. Dem wa low an dem wa high op dey all gwine know me.
12A gwine fagib dem ebil ting wa dey done. A ain gwine memba dey sin no mo.”
13Wen God say dis a nyew cobnant, dat mean fa say dat God done mek de fus cobnant too ole. An we know dat waeba done ole an ain fa be nyuse no mo, purty soon dat done done.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel