Alkitab Mobile SABDA
[VER] : [GULLAH]     [PL]  [PB] 
 <<  Kisah Para Rasul 22 >> 

1Paul tell um say, “Oona me bredren an me fada, listen op now. Leh A tell oona wa A done do. Den oona ain gwine wahn fa condemn me!”

2Wen dey yeh Paul da taak Hebrew, dey hush op eben mo.

3Den Paul tell um say, “A a Jew. A bon een Tarsus oba dey een Cilicia. Bot A been raise yah een Jerusalem, an Gamaliel been me teacha. E tek time fa laan me all de Law dat we ole people done lef we. An A gii mesef fa do wa God wahn, jes like all ob oona yah taday.

4A beena fight ginst de people dat folla dis Way, an mek some ob um suffa til de done dead. A beena grab hole ta man dem an ooman dem an tie um op an shrow um eenta de jailhouse.

5De head man ob de Jew priest dem sin an all de bigman dem een de Jew Council kin tell oona dat A da tell oona de trute. A eben done git letta fom dem leada fa tek ta de Jew bredren een Damascus. A beena gwine dey fa grab hole ta dem people dey wa da folla dis Way, fa tie um op an bring um back yah ta Jerusalem, so dat de bigman dem een de Jew Council kin punish um.

Paul Tell How e Come fa Be a Christian

6“A beena trabel ta Damascus, an A mos git dey, wen all ob a sudden, bout de middle ob de day, a bright light come outta de sky an shine roun bout me.

7A faddown ta de groun. An A yeh a boice say, ‘Saul! Saul! Wa mek ya fight ginst me so?’

8A aks say, ‘Lawd, who ya da?’ De boice ansa me say, ‘A Jedus dat come outta Nazareth. A de one ya da fight ginst.’

9Now de people dat been dey wid me, dey see de light, bot dey ain yeh de boice ob de one dat beena taak ta me.

10A aks say, ‘Lawd, wa A fa do?’ De Lawd tell me say, ‘Git op. Mus go eenta Damascus. An een Damascus dey gwine tell ya all de ting dat God done cide fa ya fa do.’

11Now dat bright light done mek me bline. So de people dat been dey wid me tek hole ta me han an hep me go on eenta Damascus.

12“One man name Ananias beena lib dey een dat town. E been a man wa wahn fa please God. E beena do wa de Jew Law say, an all de Jew people wa lib een Damascus spec um.

13Ananias come stan op by me an say, ‘Me broda Saul, ya gwine see gin right now!’ Jes like dat, right den A been able fa see gin, an A see Ananias.

14E say, ‘De God dat we ole people beena woshup, e done pick ya fa mek ya know wa e wahn ya fa do an fa sho ya de One wa da waak scraight wid God an fa mek ya yeh e own boice da taak ta ya.

15Cause ya gwine tell all de people wa ya done see an wa ya done yeh.

16Now den, hoccome ya da wait? Git op. Leh um bactize ya an ya pray ta de Lawd Jedus Christ fa wash way ya sin.’

God Sen Paul ta de People dat Ain Jew

17“A gone back ta Jerusalem. An wen A beena pray een God House, God show me a bision.

18A see de Lawd. E tell me say, ‘Go quick. Git outta Jerusalem right now. Cause de people yah ain gwine bleebe wa ya tell um bout me.’

19A ansa um say, ‘Lawd, dey know A nyuse fa gone fom one Jew meetin house ta de nex fa grab hole ta dem people dat bleebe pon ya. A nyuse fa shrow um een de jailhouse an beat um op.

20An A been dey too wen dey kill Stephen, de man dat done beena tell people bout ya. A beena gree fa hab um kill Stephen, an A beena gyaad de coat ob de people wen dey beena kill um.’

21Den de Lawd tell me say, ‘Mus go way, cause A gwine sen ya way off ta de people dat ain Jew.’”

22De people listen ta wa Paul say til e say God sen um way ta de people dat ain Jew. Den dey staat fa holla, say, “Leh we git rid ob Paul! Leh we kill um an sen um way fom dis wol! E ain fit fa lib!”

23De people beena holla loud, an dey shrow off dey coat an shrow dort op een de air.

24De commanda ob de Roman sodja dem tell e sodja fa cyaa Paul eenta de place weh dey lib. E chaage um fa beat Paul fa mek e taak, an tell um hoccome de people been hollatin ginst um like dis.

25Bot wen dey tie Paul op an scretch um out fa beat um, Paul taak ta de offisa wa beena stan op dey. Paul aks um say, “De law ain tell oona dat oona kin beat a Roman citizen wen nobody ain eben jedge um needa find out dat e done sompin bad, ainty dough?”

26Wen de offisa yeh wa Paul say, e gone fa tell de commanda say, “Wa ya da do? Dis man a Roman citizen!”

27So den de commanda gone ta Paul an aks um say, “Tell me fa true, ya a Roman citizen?” Paul ansa say, “Yea, A a Roman citizen.”

28De commanda say, “A done pay lotsa money fa git fa be a Roman citizen.” Paul tell um say, “Bot me modda an me fada been Roman citizen so den A done git fa be a Roman citizen wen A bon.”

29Right den de sodja dem dat been goona beat Paul fa mek um taak, dey ton back an lef um. An de commanda, too, been scaid wen e know dat Paul been a Roman citizen, cause e done been mek de sodja tie Paul op wid chain.

Dey Tek Paul ta de Council

30De commanda wahn fa know jes wa de Jew people beena cuse Paul bout. So de nex day e hab e sodja dem tek off Paul chain. Den e chaage de leada dem ob de priest an all de memba ob de Jew Council fa come meet togeda. An e bring Paul, an mek e stan op een front ob um.



 <<  Kisah Para Rasul 22 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel