1Paul look scraight at de memba dem een de Jew Council, an e tell um say, “Bredren, all ob me life, right op ta taday, A beena lib scraight so dat A ain hab no doubt een me haat dat A da do right fo God.”
2Ananias, de head man ob de priest dem tell dem dat beena stan op close ta Paul fa slap e mout.
3Den Paul tell Ananias say, “God gwine slap ya! Ya like a wall dat people paint white fa mek um look good, wen e ain fa real! Ya seddown dey fa jedge me coddin ta de Law. Bot ya da broke de Law wen ya gii dem people yah orda fa slap me, ainty?”
4Dem dat beena stan op close ta Paul tell um say, “Dat de head man dat wok fa God. Dat de man ya da shrow slam at!”
5Paul ansa um say, “Bredren, A ain been know dat e de head man. Cause God Book say, ‘Mus dohn taak bad bout a rula ob ya people.’”
6Now den, Paul see dat de people een de Jew Council been mixed. Some dem been Sadducee an some been Pharisee. So e call out een de Council tell um say, “Bredren, A a Pharisee an de son ob Pharisee dem. Dey wahn fa jedge me yah cause A bleebe fa true dat God gwine mek de people dat done dead lib gin.”
7Wen Paul say dat, de Pharisee an de Sadducee dem staat fa spute an taak ginst one noda. De people all beena aagy ginst one noda.
8(De Sadducee dem say dat wen somebody done dead, e ain neba gwine lib gin. An dey say dey ain no angel needa no sperit. Bot de Pharisee dem bleebe dat wen somebody done dead, e gwine lib gin. An dey bleebe een angel an sperit fa true.)
9Den de Pharisee an de Sadducee dem mo holla loud. Some ob de Jew Law teacha dat been Pharisee stan op an aagy een a loud boice say, “We ain find nottin dat dis man Paul done bad! Maybe a angel o a sperit been taak ta um fa real!”
10Dem people aagy so scrong an wile til de commanda been scaid de people been goona teah Paul op, piece by piece. So e sen e sodja dem fa go git Paul way fom de crowd an cyaa um back ta de place weh de sodja lib.
11Wen night come, de Lawd come an stan op close ta Paul an say, “Mus hab courage! Ya beena tell people een Jerusalem wa ya know bout me. Same like so, ya haffa do een Rome, too.”
Dey Scheme fa Kill Paul
12Wen day clean come, some Jew dem meet togeda an mek plan. Dey mek a wow an tell God, say dat fa sho, dey ain gwine nyam nottin an dey ain gwine drink nottin til dey done kill Paul.
13Dey been mo den foty people wa geda togeda an mek dis scheme.
14Den dey gone ta de leada dem ob de priest an ta de oda Jew leada dem. Dey tell um say, “We done mek a wow an tell God, say dat fa sho, we ain gwine nyam nottin an we ain gwine drink nottin til we kill Paul.
15Now den, oona an de memba dem een de Jew Council, oona mus sen ta de commanda ob de sodja dem an aks um fa bring Paul fa come fo oona. Oona mus mek de commanda bleebe oona wahn fa yeh mo bout Paul case. We done ready fa kill Paul fo dey git yah wid um.”
16Bot Paul sista boy yeh bout dat plan so e gone fa meet Paul eenside de place weh de sodja dem lib. An e tell Paul wa e done yeh.
17Paul call a offisa ob de sodja dem. E tell um say. “Tek dis nyoung man ta ya commanda. E got sompin fa tell um.”
18De offisa took de nyoung man an gone ta de commanda. E tell um say, “Dat man Paul een de jailhouse call me an aks me fa bring dis nyoung man yah ta ya, cause e got sompin fa tell ya.”
19De commanda tek de nyoung man han an gone a leetle way off fom de oda people. E aks um say, “Wa dat ya wahn fa tell me?”
20De nyoung man say, “De Jew leada dem done gree fa aks ya fa tek Paul fo de Council demarra. Dey gwine try fa mek ya bleebe dat dey wahn fa yeh mo bout Paul.
21Bot ya mus dohn listen ta um cause mo den foty people da hide out, waitin fa kill Paul wen e gwine come by. Dey done mek a wow tell God, say dat fa sho, dey ain gwine nyam nottin an dey ain gwine drink nottin til dey done kill Paul. Dey done ready now, bot dey da wait fa yeh dat ya gii orda ta de sodja dem fa tek Paul ta de Council.”
22De commanda chaage de nyoung man say, “Mus dohn tell nobody dat ya done tell me dis.” An e sen um way.
Dey Sen Paul ta Gobna Felix een Caesarea
23De commanda ob de sodja dem call two ob e offisa an tell um say, “Oona git ready two hundud sodja an sebenty dat ride hoss, an two hundud dat hab speah fa fight. Oona mus go ta Caesarea. Mus git ready fa go by nine o'clock dis night.
24Oona mus find some hoss dem fa Paul fa ride. Mus tek um ta Gobna Felix. Mus dohn leh nottin haam Paul.”
25Den de commanda write dis letta ta de Gobna:
26“A, Claudius Lysias, da write ta e Excellency, Gobna Felix. A da tell ya hey, sah!
27De Jew people done grab hole ta dis man an dey been ready fa kill um. Bot A yeh dat e be a Roman citizen so A gone wid me sodja dem an pull um outta de Jew dem han.
28A been wahn fa know hoccome dey beena cuse um, so A cyaa um ta de Jew Council.
29A find out dat e ain done nottin fa mek um kill um o fa mek um chunk um een de jailhouse. Dey beena hole um cause dey say e done sompin ginst dey Jew Law.
30Wen A yeh say dat de Jew people done scheme an mek plan fa kill um, dat mek me sen um ta ya right den. An A done chaage de Jew people dat done cuse um fa go ta ya too, fa mek dey case ginst um.”
31So de sodja dem done wa dey commanda chaage um fa do. Dey tek Paul an gone dat night ta Antipatris.
32Wen day clean, dem sodja gone back ta de place weh dey lib. Bot dey lef de man dem dat da ride hoss fa tek Paul on.
33Wen dey git ta Caesarea, dey tek Paul ta de Gobna an gii de Gobna de letta.
34De Gobna read de letta an aks wa arie ob de country Paul come fom. Wen e find out dat Paul come fom Cilicia,
35e tell Paul say, “A gwine hole ya case til dem Jew dat cuse ya come yah.” An e chaage de gyaad dem fa pit Paul een de bighouse dat Herod done build an gyaad um dey.
<< Kisah Para Rasul 23 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel