Alkitab Mobile SABDA
[VER] : [GULLAH]     [PL]  [PB] 
 <<  Kisah Para Rasul 4 >> 

De Leada Dem Tek Peter an John ta de Council

1Peter an John still beena taak ta de people wen de Jew leada dem come ta um. De Jew priest dem an de captain ob dem wa da gyaad God House, an de Sadducee dem, dey all come.

2Dem leada yah been opsot fa true cause de postle Peter an John beena laan de people an tell um say, Jedus done dead bot e git op fom mongst de dead people an lib gin. Dat show dat wen somebody dead, e gwine lib gin.

3Dem leada grab hole ta Peter an John. Bot cause e mos sun down, dey pit um een de jailhouse til de nex day.

4Bot a heapa people wa yeh Peter an John wod bleebe wa dey tell um. An now, all de man dem wa bleebe been bout fibe tousan.

5Nex day, de Jew leada dem, long wid de oda bigman dem an de Jew Law teacha dem, dey meet togeda een Jerusalem.

6Annas, wa been de head man ob de Jew priest dem, e been dey, an Caiaphas, an John an Alexander an de oda man dem ob Annas fambly.

7Dey tek Peter an John outta de jailhouse an mek um stan fo all dem man wa done been geda dey. Den dey quizzit Peter an John say, “Weh oona git de powa fa mek dis man yah waak? Who gii oona dat powa?”

8Peter been full op wid de Holy Sperit. So e ansa um say, “Oona wa da rule de people an oona bigman dem wa dey yah!

9Oona bring we yah taday an aks we bout de good ting wa we done do fa dat cripple op man. Oona da aks we wa dat powa we hab fa heal um.

10So den, oona all oughta know an all de people een Israel oughta know. Oona done kill Jedus Christ fom Nazareth. Oona nail um ta de cross. Bot God mek um git op fom mongst de dead people an lib gin. An de powa ob Jedus name, dat wa mek dis man yah stan mongst ya, an e all well now.

11God been taak bout Jedus wen e say, ‘De stone dat oona ain wahn wen oona build, dat de one wa done come fa be de stone wa mo betta den all de oda stone een de house!’

12Ain nobody bot Jedus able fa sabe people. Een all de wol ain nobody else, no oda name dat God gii ta people so dat we kin git sabe.”

13Now den, de leada dem een de Jew Council see dat Peter an John been people jes like ebrybody else an dey ain hab no school laanin. Bot Peter an John ain been scaid fa taak ta um bout Jedus. Dat mek dem leada stonish an mek um know dat Peter an John done beena waak wid Jedus.

14De leada dem ain been able fa say nottin bad ginst Peter an John cause de man wa dey heal beena stan op dey wid um.

15So de leada dem ob de Council sen Peter an John outta de Council room. Den de leada dem taak ta one noda bout all dis.

16Dey aks one noda say, “Wa we gwine do wid dem man Peter an John? All de people een Jerusalem know dey done dis great miracle. Dey done heal de man wa ain neba been able fa waak. We cyahn say dat ain so.

17Bot we ain wahn dis nyews fa keep on da spread roun mongst mo people. So den, leh we call Peter an John an waan um say, dey mus dohn taak ta nobody no mo een Jedus name.”

18So de leada dem call Peter an John fa come eenside de place. Dey taak scrong ta um an chaage um say, “Mus dohn taak ta nobody tall een de name ob Jedus. Mus dohn laan nobody een Jedus name.”

19Bot Peter an John ansa um say, “Oona cide wa de right ting een God eye fa we fa do. E mo betta fa we fa do wa oona say o fa do wa God say?

20We ain able fa shet we mout an stop da taak bout wa we done see an yeh.”

21De leada dem ob de Council waan um mo scronga gin an leh um go way. Dey ain find no way fa punish um, cause all de people dey beena praise God fa wa done happen.

22An de man wa God done heal by dis miracle, e been pass foty yeah ole.

De Bleeba Dem Pray fa de Lawd fa Courage Um

23Wen dey ton Peter an John loose, dey gone back ta dey own people wa bleebe pon Jedus. Dey tell um wa de headman dem ob de priest an de oda bigman dem tell um.

24Wen de oda people wa bleebe yeh wa Peter an John say, dey all pray togeda ta God say, “Lawd God, wa rule oba all, ya mek de heaben, de wol an de sea, an all wa een um!

25De Holy Sperit taak fa ya an tell ya saabant David fa say, ‘Wa mek dem nation wa ain Jew bex so bad? Hoccome de people scheme fa do wa de Lawd ain wahn an den dey ain able fa do um?

26De king dem wa beena rule een de wol git ready an de rula dem beena geda togeda fa fight ginst de Lawd an Christ, de one e done pick.’

27Fa true, Herod an Pontius Pilate done meet togeda yah een dis city wid de Israel people an wid dem wa ain people ob Israel. Dey scheme togeda ginst Jedus, ya Saabant wa blongst ta ya, de one ya done sen fa be de Messiah.

28Dem leada been geda fa do all de ting dem wa ya done been plan fa happen. Ya done dat cause ya got de powa an ya been wahn um fa be dat way.

29Now den, Lawd, look at how dem leada taak scrong ta we an waan we. We ya saabant. We beg ya fa hep we. Courage we fa true so dat we ain scaid fa tell de people ya wod.

30Show ya powa an heal de sick, an gii we powa fa do sign an miracle dem wen we call pon de name ob ya saabant Jedus, wa blongst ta ya.”

31Wen dey done pray, de place weh dey been geda togeda da shake. De Holy Sperit come pon um an fill um, an dat mek um scrong fa tell de people God wod.

Dem wa Bleebe All Share wa Dey Hab

32All dem wa bleebe pon Jedus been gree togeda an hab one haat. Nobody dey say, “De ting A hab da me own propaty,” bot all dem beena share wa dey hab wid one noda.

33De postle dem beena show how God great powa dey wid um weneba dey da tell oda people say, “De Lawd Jedus lib gin. E done git op fom mongst de dead people!” An God beena bless all ob um real good.

34Dey all hab ebryting wa dey need. Cause all dem wa got lan o house, dey sell um an bring de money.

35An dey gii dat money ta de postle dem fa share um. De postle dem beena share de money, gim ta de people weneba dey need um.

36Dat wa Joseph, a Levite wa come fom Cyprus, done. De postle dem call um Barnabas. (Dat mean, “One wa Courage People.”)

37E sell e fiel an bring de money an gim ta de postle dem.



 <<  Kisah Para Rasul 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel