Dey Pick Seben Man fa Hep de Choch People
1Now den, een dat time, wen mo an mo people beena bleebe pon de Lawd Jedus an waak een e way, sompin come op. De Jew people wa taak de Greek language beena staat fa grumble bout de Jew dem wa taak de Hebrew language. De Jew dem wa taak Greek say, “Ebry day wen dey gii out ting fa hep de wida ooman dem, de Hebrew wida ooman dem beena git mo den we Greek wida ooman beena git.”
2So de tweb postle call a meetin wid all de people dat bleebe pon Jedus an say, “E ain right fa we, Jedus postle, fa stop da tell people God wod cause we haffa see dat people git wa dey need.
3So den, bredren, we wahn oona fa pick man dem wa oona all da spec, seben mongst oona wa oona know da lib full op wid de Holy Sperit an dat hab plenty sense bout ting. We gwine hab dem do dis wok fa gii out wa de people need.
4Bot we gwine spen all we time da pray an da do we wok fa laan de people bout God.”
5All de people dey een de meetin been heppy wid wa de postle dem say. So dey pick Stephen, a man dat trus God een ebryting an full op wid de Holy Sperit. An dey pick Philip, Prochorus, Nicanor, Timon, Parmenas, an Nicolas wa come fom Antioch an done gree fa jine de Jew people.
6De people een de meetin tek de seben man wa dey pick an show de postle dem. De postle dem pray fa dem seban man an dey lay dey han pon dem man head an bless um.
7So den, God wod beena keep gwine all oba. An purty soon mo an mo people een Jerusalem bleebe pon Jedus an waak een e way. An plenty Jew priest dem, dey change dey way an bleebe pon Jedus Christ, too.
Dey Grab Hole ta Stephen
8Stephen been a man dat God bless fa true an full op wid God powa. E beena do plenty big miracle an wondaful wok mongst de people.
9Bot some man dem come an staat fa aagy wid Stephen. Dey blongst ta de Jew meetin house wa dey call De Meetin House ob de Free Man Dem cause dey Jew dem dat come fom Cyrene an Alexandria an some oda Jew dem dat come fom de arie dey call Cilicia an Asia.
10Bot God Sperit gii Stephen heapa sense so dat wen e taak, nobody neba hab nottin mo fa say.
11So dem Jew wa been ginst Stephen, dey gone an find some oda man dem an pay um fa lie bout Stephen. Dey hab de man dem say, “We yeh dis man Stephen da taak bad ginst Moses an ginst God.”
12So den, dey pit dem wod een de people yea an de people been stir op. De Jew leada an de Jew Law teacha dem been stir op too. Dey gone an grab hole ta Stephen an bring um ta de Jew Council.
13Den dey find people fa lie bout Stephen dey. Dey say, “All de time dis man keep on da taak bad ginst we House ob God an ginst de Law dat God gii Moses.
14We done yeh um taak, say dat Jedus, dis man dat come fom Nazareth, gwine stroy God House yah. An e gwine change all dat Moses been laan we ole people, dem ting wa we da do taday.”
15All dem dat been seddown dey een de Jew Council beena look scraight at Stephen, an dey see dat e face look like de face ob a angel.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel