Tek Cyah Wa Oona da Do
1Jedus tell e ciple dem say, “Fa true, ting gwine happen wa mek people do bad. Bot de poson wa mek dem ting happen gwine hab plenty trouble!
2E mo betta fa dat poson ef dey tie a big grindin stone roun e neck an shrow um eenta de sea. E mo betta dat e drown een de wata like dat den fa e fa mek one ob dese leetle one do bad.
3So den, oona tek cyah wa oona da do! “Ef one ob oona hab a broda wa da sin, ya mus buke um. Ef e change e sinful way, mus paadon um.
4Eben ef e do ya bad seben time een one day, ef e ton back ebry time, come tell ya say, ‘A saary an A ain gwine do ya bad no mo,’ mus paadon um.”
Oona Fait Kin Mek Big Ting Happen
5Jedus postle dem tell um say, “Lawd, hep we bleebe God mo den wa we bleebe now.”
6De Lawd ansa um say, “Ef oona bleebe een God, eben ef oona fait jes leetle like one leeleetle mustard seed, oona kin tell dis mulberry tree, ‘Tek yasef outta de groun an go stan op an grow een de sea!’ Eben dough oona fait ain mo bigga den de mustard seed, dat mulberry tree gwine pay oona mind. E gwine do wa oona say.”
Wa de Wokman Oughta Do
7“Sposin one ob oona hab wokman wa da plow een de fiel eeda da mind ya sheep. Wen de wokman come fom e wok, wa ya gwine tell um? Fa true, ya ain gwine tell um say, ‘Mus hurry op. Come seddown an nyam?’
8No! Fa sho ya gwine tell de wokman say, ‘Go cook me suppa. Git yasef ready an pit de food on de table. Atta A done shru nyam an drink, den ya kin hab sompin fa nyam an drink.’
9De massa ain gwine praise de wokman jes cause dat wokman done do wa e tell um fa do, ainty?
10Oona stan jes so. Wen oona done do all wa de massa tell oona fa do, oona mus say, ‘We jes wokman. We ain desaab no praise, cause we jes done wa we spose fa do.’”
Jedus Heal Ten Man wid Leposy
11On e way ta Jerusalem, Jedus gone long shru de arie tween Samaria an Galilee.
12Wen Jedus git close ta one settlement, e meet ten man wa been sick een dey skin wid leposy. Dem man da stan way off.
13Dey holla say, “Jedus! Massa! Hab mussy pon we!”
14Jedus shim an tell um say, “Oona go ta de Jew priest dem. Leh dem xamine oona.” Wiles dem man beena gwine fa see de priest, dey all been heal. Dey all clean an dey ain been sick no mo.
15Wen one ob dem see dat e done been heal, e come back ta Jedus. E da holla, da praise God.
16E git down on de groun een front ob Jedus foot, an e tank um. An dat man been fom Samaria.
17Jedus say, “A done mek ten man clean, ainty? Weh de oda nine?
18Hoccome nobody ton back fa tank God cep dis one man wa ain one ob we Jew people? Hoccome de oda Jew man dem ain come back?”
19Jedus tell de man say, “Git op an go home. Cause ya bleebe een me, ya done been heal.”
Wen God Rule Oba de Wol
20Some Pharisee aks Jedus wen God gwine come fa rule. Jedus ansa um say, “Wen God come fa rule, oona ain gwine see no sign fa sho dat.
21Nobody gwine say, ‘Look yah, dey e dey dey!’ Needa, ‘Look yonda!’ Cause God da rule already mongst oona.”
22Jedus tell e ciple dem say, “De time gwine come wen oona gwine wahn fa see de Man wa Come fom God come back too bad, eben ef e jes come fa one day. Bot oona ain gwine shim.
23Some people gwine tell oona say, ‘Look yonda, oba dey de Man wa Come fom God!’ Oda gwine say, ‘Look yah, e dey dey!’ Mus dohn go long wid um. Mus dohn folla um.
24Wen de Man wa Come fom God come back ta de wol, ebrybody gwine be able fa shim, jes like lightnin dat flash cross de sky an light um op fom one side ta de oda.
25Bot fo dis happen, e haffa suffa plenty ting, an de people wa lib taday ain gwine hab nottin fa do wid um.
26Jes like how e been een Noah time, dat de way e gwine be wen de Man wa Come fom God come back.
27Een Noah time, de people beena nyam an drink an da git marry op. Dey beena keep on da lib dat same way til dat day wen Noah gone eenside de ark. Den de big rain come, an all dem outside de ark git kill op een dat wata wa kiba um all op.
28Same way, een Lot time. De people beena nyam an drink. Dey beena buy an sell. An dey beena plant crop an build house.
29Bot de day wen Lot lef out fom Sodom, fire an sulphur stone come down fom heaben like rain an stroy all de people dey.
30Dat so e gwine be dat day wen de Man wa Come fom God come back ta de wol.
31“Dat day dey, de poson wa dey on top e house mus dohn tek time fa go down eenside e house fa geda e ting. Same way, de poson wa dey een e fiel. E mus dohn ton back ta e house.
32Oona memba wa happen ta Lot wife!
33Whoeba da try fa sabe e life, e gwine loss e true life. Bot de poson wa loss e life cause ob me, e gwine hab de true life.
34A da tell oona, dat night dey gwine be two people da sleep een de same bed. Angel gwine come tek one an lef de oda one.
35Two ooman gwine be togeda, da grine meal. Angel gwine come tek one an lef de oda one.
36[Two man gwine be een de fiel, da wok. Angel gwine come tek one an lef de oda one.]”
37Jedus ciple dem aks um say, “Lawd, wa place dem ting yah gwine happen?” Jedus ansa um say, “Wehsoneba a dead body dey, de buzzat gwine geda togeda dey too.”
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel