Alkitab Mobile SABDA
[VER] : [GULLAH]     [PL]  [PB] 
 <<  Lukas 18 >> 

Mus Keep On da Bleebe dat God Gwine Ansa Oona Pray

1Jedus tell e ciple dem one paable fa laan um dat dey mus pray all de time ta God an mus keep on da bleebe dat God gwine ansa um.

2Jedus say, “Dey been a jedge een one town. Dat jedge ain been scaid ob God, an e ain pay people no mind.

3One wida-ooman been dey een dat same town. Dis ooman beena go ta de jedge all de time an tell um say, ‘Mus, please, gii me wa right. Mus hep me ginst de one wa done me wrong.’

4Fa a long time, de ooman come ta de jedge, bot de jedge ain done nottin. Bot atta wile e say ta esef, ‘Fa true, A ain scaid ob God, an A ain pay people no mind.

5Bot cause dis ooman keep on da bodda me all de time, A gwine gim wa right. Ef A ain do dat, e gwine keep on da come ta me til e weah out me patient!’”

6An de Lawd say, “Oona yeh wa de jedge wa ain scraight say.

7Now den, fa true, God gwine do wa right fa e people, dem dat e done pick an wa da aks um een de day time an een de night time fa hep um, ainty? De Lawd ain gwine be slo fa ansa um, ainty?

8A da tell oona, God gwine mek hace fa do wa right fa um! Stillyet, wen de Man wa Come fom God come back gin, A wonda ef e gwine meet anybody een de wol wa bleebe een um!”

Who dat Stan Right wid God?

9Jedus tell one paable ta de people dem wa tink dat dey beena do right fa true an hole all de oda people cheap.

10E say, “One time two man gone op ta God house fa pray. One dem been a Pharisee. De oda been a man wa geda tax.

11“De Pharisee stan op an pray bout esef say, ‘A tank ya, God, cause A ain like all dem oda people. A ain tief nobody. A beena waak scraight an do wa de Law say. An A ain sleep wid oda man wife. An A tank ya dat A ain eben like dat man oba yonda wa da geda tax.

12Two day ebry week A fast so A kin woshup God betta. A tek a tent ob all wa A git an gim ta ya.’

13Bot de man wa da geda tax stan way off. E ain eben lif e eye ta heaben cause e know e done sin. E beena beat e chest cause e too saary fa e sin. An e pray ta God say, ‘God, hab mussy pon me cause A a sinna!’”

14Jedus tell de people say, “Wen dat man gone back home, already God done fagib um fa de ebil e done, an e stan right wid God. Bot God ain paadon de Pharisee an e ain stan right wid God. Cause dem wa pit deysef op, God gwine bring um down. Bot dem wa tek low, God gwine raise um op de mores.”

Jedus Bless Leetle Chullun

15Some people da bring dey baby ta Jedus fa hab e pit e han on dey head an bless um. Wen Jedus ciple dem shim, dey buke dem people fa do dat.

16Bot Jedus call de chullun. E tell e ciple dem say, “Oona mus dohn stop de chullun. Leh um come ta me. Cause de people wa be like dese chullun yah gwine hab God fa dey King.

17A da tell oona fa true, anybody wa ain gree like a leeleetle chile fa leh God rule oba um, dat poson ain neba gwine hab God fa e King.”

De Rich Leada

18One Jew leada come aks Jedus say, “Good Teacha, wa A mus do fa git life ebalastin?”

19Jedus ansa um, “Hoccome ya say A good? Ain nobody good cep fa God. E de onliest one wa good.

20Ya know wa God Law say we mus do. ‘Mus dohn sleep wid oda man wife. Mus dohn kill nobody. Mus dohn tief. Mus dohn tell lie on nobody. Mus pay mind ta ya fada an ya modda.’”

21De leada tell Jedus say, “A done keep all dem law fom wen A been a boy.”

22Wen Jedus yeh wa de leada say, e tell um, “Stillyet ya mus do one mo ting. Mus go sell all de ting ya got an gii way de money ta de people wa ain hab nottin. Ef ya do dat, ya gwine hab tredja een heaben. Atta ya done gii way ya money, come folla me.”

23Wen dat leada yeh wa Jedus say, e been too sad, cause e been real rich.

24Jedus see de man been too sad an e say, “Fa true e ain easy eben a leetle bit fa rich people fa leh God rule oba um.

25E mo easy fa mek de big animal wa dey call de camel go shru a needle eye den fa a rich man fa leh God rule oba um.”

26De people wa yeh wa Jedus say, aks um, “Den who dat kin git sabe?”

27Jedus ansa say, “God able fa do wa people ain able fa do.”

28Den Peter say, “Look yah! We done lef ebryting fa folla ya.”

29Jedus say, “A da tell oona fa true, ebrybody wa lef e house, o e wife, o e broda dem, o e modda o e fada, o e chullun so dat e kin leh God rule oba um, dat one gwine git plenty mo fom God.

30Een dis time yah, God gwine gim plenty mo den wa e done lef fa folla God. An God gwine gim ebalastin life een de wol dat gwine come.”

Jedus Tell Um Gin E Gwine Dead an Den Lib Gin

31Jedus tek de tweb ciple ta one side an tell um say, “Listen, we da gwine op ta Jerusalem. All de ting de prophet dem done write bout de Man wa Come fom God gwine happen fa true.

32Dey gwine han um oba ta de people wa ain bleebe pon God. Dem people gwine tek um fa mek fun. Dey gwine hole um cheap an spit on um.

33Dey gwine whip um an den dey gwine kill um. Bot atta shree day, de Man wa Come fom God gwine lib gin. E gwine git op fom mongst de dead.”

34Bot de ciple dem ain ondastan none ob dese ting. Dey ain know wa e mean. Dey ain know wa e da taak bout.

Jedus Mek de Bline Man See

35Wen Jedus git close ta Jericho, a bline man been dey, da seddown side de road. An e da beg.

36Wen de bline man yeh de crowd da pass, e aks de people say, “Wa gwine on?”

37Dey tell um, “Jedus fom Nazareth da pass long dis way.”

38Wen de bline man yeh dat, e holla say, “Jedus, Son ob David, hab mussy pon me!”

39De people wa beena lead de crowd buke de man, tell um e mus hush op e mout. Bot de man holla mo louda, “Son ob David, hab mussy pon me!”

40Jedus stop dey, an e chaage de people fa bring de bline man ta um. Wen e git close ta Jedus, Jedus aks um a queshon.

41E aks um say, “Wa ya wahn me fa do fa ya?” De bline man ansa say, “Lawd, A wahn ya fa gii me back me sight.”

42Jedus tell de man say, “A da mek ya see right now. Cause ya bleebe een me, ya done git well!”

43Dat same time de man been able fa see. E folla longside Jedus, an e da praise God. Wen de crowd shim, dey all praise God too.



 <<  Lukas 18 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2021
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran