Alkitab Mobile SABDA
[VER] : [GULLAH]     [PL]  [PB] 
 <<  Lukas 21 >> 

De Wida-ooman Wa Gii All E Money ta God

1Jedus been ta God house. E da look roun, an e see de rich people da come an drop dey money wa dey da gii ta God eenta de money box dey.

2Same time e see one po wida-ooman come too. E drop two leetle coppa coin eenta de box.

3Jedus say, “A da tell oona fa true, dis po wida-ooman yah done gii mo den all de oda people.

4Cause de oda res come an gii jes a leetle bit fom all de whole heapa money dey got. Bot dis wida-ooman wa po fa true, done gii all de money e got fa lib off.

Jedus Say God House Gwine Be Stroy

5Some de ciple dem beena taak bout God house, how e stan so purty, wid e fine stone an all de ting dey wa people done gii fa God. An Jedus taak ta de people.

6E tell um say, “Oona see all dis! De time gwine come wen none dese stone yah wa oona da see, ain gwine be een dey place, one on top ob de oda. Ebry stone yah gwine be shrow down outta e place.”

Wa Gwine Happen fa Sho de End Time Done Come

7Dey aks Jedus say, “Teacha, wen dat gwine happen? Wa sign gwine sho we dat time done come?”

8Jedus tell um say, “Oona mus be on de watch. Mus dohn leh nobody fool oona. Cause plenty man dem gwine come een me name. Dey gwine say, ‘A de Messiah!’ An dey gwine say, ‘De time wen e gwine come back done come!’ Oona mus dohn go long wid dem.

9Mus dohn be scaid wen oona yeh bout waa an rebolution. Dese ting yah haffa happen fus, bot dat ain mean dat de end time done come.”

10Den Jedus tell um say, “Dem country ob de wol gwine fight ginst one noda. Dem nation gwine scrike out ginst each oda.

11De groun gwine hab convulsion real bad. A dry drought gwine come shru an people ain gwine hab nottin fa nyam. A whole heapa people gwine git sick an dat sick gwine spread all roun. All dat gwine happen een plenty place all oba de wol. Plenty ting gwine happen fa mek people scaid ta det, an dey gwine be great ting een de sky fa sho people wa gwine come.

12Bot fo all dese ting yah happen, de people wa hab tority gwine grab hole ta oona an do oona plenty bad ting. Dey gwine drag oona fa be jedge fo de leada dem een de Jew meetin house, an dey gwine pit oona een de jailhouse. Dey gwine bring oona fo king dem an gobna dem cause oona me ciple.

13Dat de time dey wen oona gwine hab good chance fa tell de people de true ting wa oona know bout me.

14Bot fo dey grab hole ta oona an tek oona fa be jedge, mus mek op oona mind dat oona ain gwine fret bout wa oona gwine ansa um.

15Cause A gwine gii oona nuff wise wod an sense fa ansa dem. Eben oona enemy dem gwine haffa gree wid wa oona tell um.

16Bot eben oona modda an fada, oona broda dem, oona fambly, an oona fren dem gwine han oona oba ta de tority fa tek oona fo de jedge. An dem tority gwine kill some ob oona.

17All de people gwine hate oona cause oona bleebe een me.

18Stillyet, ain eben one hair een oona head gwine be loss.

19Mus stan firm fa true, an oona gwine git true life.

Jedus Say Jerusalem Gwine Be Stroy

20“Bot wen oona see de aamy dem da geda all roun Jerusalem, oona gwine know dat de time done come wen dat city gwine be stroy.

21Dat de time wen de people een Judea mus ron way quick ta de hill country. Dem een de city ob Jerusalem mus lef dey, an dem wa out een de country mus dohn go een dat city.

22Cause dat de time dey wen God gwine punish de people an do all dat de prophet dem done write down een God Book.

23Dat time gwine be mighty haad fa ooman dem wa een de fambly way an dem wa hab leetle baby! De people een dis lan gwine suffa real bad. God gwine show dat e bex fa true an punish dis people.

24Some dem gwine git kill wid de sode. Oda dem gwine git ketch an be prisona, an oda people gwine cyaa um way ta all de diffunt country dem. De people fom dem oda lan gwine tek chaage oba Jerusalem, trample um down all oba til de time come fa dem people wa ain Jew fa loss dey powa.

De Man wa Come fom God Gwine Come Gin

25“Scrange ting gwine happen ta de sun an de moon an de staa fa sho people wa da come. A whole heapa people een plenty place een dis wol ain gwine know wa fa do. Dey gwine be scaid fa true wen dey see de salt wata git real rough an de swellin ob dat tide wata roll like tunda.

26People gwine pass out. Dey gwine be scaid ta det, wiles dey da wait fa see wa gwine happen ta all de wol. De powa wa dey een de eliment gwine shake an moob outta dey place weh dey spose fa be.

27Dat de time wen de people gwine see de Man wa Come fom God da come down een a cloud eenta de wol. An e gwine hab great powa, an a real bright light gwine shine roun um.

28Wen oona see dem ting yah staat fa happen, oona oughta stan op. Lef oona head op an look op ta God. Cause e gwine sabe oona real soon.”

Wa We Laan fom de Fig Tree

29Jedus tell um a paable, say, “Look at de fig tree an all de oda tree.

30Wen oona see dem leaf da buss open, oona know dat summa da come soon, ainty?

31Same way, wen oona see dem ting wa A done taak bout staat fa happen, oona gwine know dat de time wen God gwine rule ain way off.

32“A da tell oona fa true, all dem ting yah gwine happen fo de people wa da lib now, pass oba.

33De eliment an de wol esef ain gwine las faeba. Bot fa true me wod gwine las faeba an eba.”

Oona Mus Tek Cyah Wa Oona da Do

34“Oona mus tek cyah wa oona da do. Mus dohn leh oona mind ron on all de time bout tommuch nyam an drink. Mus dohn fret tommuch bout oona trouble een dis wol. Cause ef oona do, dat day gwine come all ob a sudden, wen oona ain ready fa um.

35Dat day gwine come pon all de people all oba de wol, like a trap close real quick on a bod.

36Oona mus be on de watch an pray all de time so dat oona gwine hab scrent fa beah all dem ting yah wa gwine happen een dis wol an be able fa stan fo de Man wa Come fom God.”

37Jurin dat time, Jedus beena spen de day da laan de people een God house, an wen fus daak come, e gone an spen de night ta de Mount ob Olib.

38Ebry maanin wen day clean, all de people wa e beena laan, dey gone fa meet um een God house fa yeh wa e gwine laan um dat day.



 <<  Lukas 21 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2021
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran