Alkitab Mobile SABDA
[VER] : [GULLAH]     [PL]  [PB] 
 <<  Lukas 5 >> 

De Fus Ciple Dem Folla Jedus

1One day, Jedus beena stan op on de sho ta Lake Gennesaret. All de people crowd bout um fa yeh God wod.

2E see two boat dey, pull op on de sho. De fishaman dem done lef um an beena wash dey net.

3Jedus git een a boat, wa blongst ta Simon. An e tell um say, “Shobe off a leetle piece fom de sho.” Den Jedus seddown een de boat an laan de people wa beena stan op on de sho.

4Wen e git shru taak, e tell Simon say, “Mus go out ta deep wata. Ya an ya paatna dem mus cyas oona net fa ketch fish.”

5Simon ansa um say, “Massa, we done try all night, an we ain ketch nottin. Bot cause ya say fa do um, A gwine cyas de net gin.”

6Wen Simon dem been shru cyas dey net, dey ketch sommuch fish til dey net staat fa teah.

7Dey mek sign ta dey paatna dem een de oda boat fa come an hep um. Dey come an full op all two de boat dem til dey boat staat fa sink.

8Wen Simon Peter see dat, e git down on e knee fo Jedus. E tell um say, “Lawd, mus go fom me, cause A a sinna!”

9Cause Simon dem been stonish wen dey ketch sommuch fish.

10Same fashion, e paatna, James an John, Zebedee son, dey been stonish. An Jedus tell Simon say, “Mus dohn feah. Ya done beena ketch fish. Bot tareckly, A gwine laan ya fa bring people fa come ta me.”

11Den dey lan dey boat. Dey lef ebryting an gone long wid Jedus fa folla um, be e ciple.

Jedus Heal a Man wa Hab Leposy

12One time wen Jedus been ta one town, a man been dey wa been kiba wid leposy. Wen e see Jedus, e git down on de groun fo um. E beg um say, “Sah, ef ya gree fa do um, ya able fa mek me well an clean!”

13Jedus scretch out e han an tetch um say, “A wahn fa do um. A mek ya well an clean!” Same time de leposy lef, an de man been well.

14Jedus chaage um say, “Mus dohn tell nobody bout dis. Mus go sho yasef ta de Jew priest an offa de sacrifice wa Moses done chaage de people fa mek. Dat gwine mek ebrybody know ya all well now fa sho.”

15Bot mo an mo, de people cyaa de nyews roun consaanin Jedus. An plenty crowd come geda roun fa yeh um an fa hab um heal um.

16Bot Jedus lef um an gone off by esef weh dey ain no people, fa pray ta God.

Jedus Heal a Man wa Cyahn Moob

17One day wen Jedus beena laan de people, some Pharisee an Jew Law teacha dem da seddown dey. Dey done come fom ebry town een Galilee an Judea an fom Jerusalem. An de powa ob de Lawd God been on Jedus fa heal de sick.

18Some man dem come long da tote one man wa cripple op an ain able fa moob. Dey da tote um on a sleepin mat, an dey done try fa gone een de house fa lay de man on de flo fo Jedus.

19Bot sommuch people been dey, de man dem ain able fa git shru de crowd. Dey climb on top de house wid de sick man, pull off some de roof tile an open op a hole een de house top. Den dey leddown dat sick man on e sleepin mat eenta de middle ob de people dey fo Jedus.

20Wen Jedus see dat dey bleebe fa true dat e gwine heal de man, e tell de sick man say, “Me fren, ya sin done been paadon.”

21De Law teacha an de Pharisee dem staat fa study bout dat, tink say, “Who dis yah, wa da hole God cheap? Ain nobody able fa paadon sin. Jes God kin do dat!”

22Jedus know wa dem beena tink, so e say, “Wa mek oona da tink dat wa A do ain right?

23Fa sho, e mo easy fa tell dis cripple op man say, ‘Ya sin done been paadon,’ den fa chaage um say, ‘Git op an waak,’ ainty dat so?

24A gwine show oona dat de Man wa Come fom God hab tority een dis wol fa paadon people sin.” So Jedus tell de man wa cripple op say, “Git op, tek ya sleepin mat an go on home!”

25All ob a sudden de man git op right een front ob ebrybody. An e tek e mat wa e beena leddown on an e gone home. E da praise God cause e done been heal.

26All de people been stonish, an dey praise God. Dey been cyaa way. An dey say, “We done see sompin yah taday dat we ain neba see fo!”

Jedus Call Levi fa Folla Um

27Atta Jedus done heal de man, e gone outta dey. An e see one man name Levi, wa da geda tax, seddown een e office. Jedus tell um say, “Come folla me fa be me ciple.”

28An Levi git op. E lef ebryting dey, an e gone folla Jedus.

29Levi mek a big feas een e house fa Jedus. Plenty people wa da geda tax been dey an some oda people been dey een de house too. An all dem beena seddown da nyam.

30Some Pharisee, long wid some dem own Law teacha, been dey. An dey da grumble ta Jedus ciple dem say, “Wa mek oona da nyam an drink long side dem people wa da geda tax an dem oda people wa ain fit fa mix wid Jew people?”

31Jedus ansa um say, “Dem wa well ain need no docta. Dem wa sick need um.

32A ain come fa call dem wa tink dey da waak scraight wid God. A come fa call dem fa change dey way wa know dey sinna.”

Jedus Laan de People How fa Fast ta Woshup God

33Some people come ta Jedus say, “John ciple dem da fast plenty time, fa woshup God an pray. De Pharisee ciple dem do dat too. Bot ya own ciple dem jes da nyam an drink an ain fast.”

34Jedus ansa um say, “Wen oona call people fa come ta marryin feas, oona cyahn keep um fom nyam, ainty?

35Bot de time gwine come wen de groom gwine be tek way fom mongst um. Dat de time wen dey gwine fast.”

36Jedus tell um a paable fa gii ondastandin. E say, “Nobody gwine teah piece fom nyew cloes fa patch e ole cloes. Ef e do dat, e gwine mek e nyew cloes look bad cause ob de teah. On top ob dat, e ole cloes gwine look bad cause de piece wa e teah fom de nyew cloes ain gwine match de ole cloes.

37An nobody gwine tek ole wineskin bottle, wa mek fom animal hide, an pit een nyew wine wa still da wok. Cause ef e do dat wiles de nyew wine da wok, dat wine gwine buss open de ole haad wineskin. De wine gwine waste an de ole wineskin bottle gwine ruint too.

38Stead ob dat, dey mus pit nyew wine een nyew wineskin bottle wa ain gwine broke op.

39An wen people done drink ole wine, dey ain gwine wahn fa drink nyew wine, cause dey gwine say, ‘De ole wine a heap betta!’”



 <<  Lukas 5 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2021
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran