Jedus Go Eenta Jerusalem
1Jedus dem come close ta Jerusalem. Dey beena dey by Bethphage een Bethany willage. Wen dey reach ta de place name de Mount ob Olib, Jedus tell two e ciple fa go on fo de oda res.
2Fo dey gone, e chaage um say, “Oona mus go ta dat willage oba dey. Wen oona da reach dey, oona gwine see one nyoung donkey wa dey done tie op dey dey. Nobody ain neba yet ride pon dat donkey. Mus ontie um an bring um ta me.
3Ef anybody aks oona hoccome oona da ontie de donkey, mus tell um say, ‘De Lawd need um, bot e gwine hab we bring um back wen e done wid um.’”
4So de two ciple gone pon ta de willage. An dey see de nyoung donkey tie op ta one house door dey dey een de screet. Dey staat fa ontie dat donkey.
5Wen dey da ontie um, some people wa beena stanop dey aks de ciple say, “Hoccome oona da ontie dat nyoung donkey?”
6De ciple ansa um say jes wa Jedus done tell um fa say. So de people leh um tek de donkey an go.
7De ciple tek de donkey, come ta Jedus. Wen dey git dey, dey spread dey coat pontop de donkey back. Jedus seddown pontop um an staat fa ride long eenta Jerusalem.
8A heapa people spread dey coat pon de road weh Jedus da pass. Dey done dat fa welcome Jedus like dey king. Some oda people broke off branch fom de tree dem close by een de fiel an spread um pon de road right fo Jedus come by pontop de donkey.
9De people wa beena waak fo Jedus an dem wa come hine um da holla say, “Praise God! God bless de One Wa come een da Lawd name, de One Wa God done sen ta we!
10God bless de gobment wa da come. E gwine be same like de gobment wa we ole time leada David done rule oba. Leh we praise God!”
11Jedus gone eenta Jerusalem an eenta God House. E look roun at ebryting dey. Bot de sun da set fa red so e an e tweb ciple gone out ta Bethany willage.
De Fig Tree Wa Ain Beah Fruit
12De nex day wen dey come back fom Bethany, Jedus beena hongry.
13Wiles e da gwine, e look cross de way an e see one fig tree wa been git plenty leaf. So Jedus gone look fa see ef de tree da beah fig. Wen e come close by um, e see dey ain been no fig pon um, jes de leaf da kiba um, cause e ain been de time yet fa beah fig.
14Jedus taak ta de tree say, “Ya mus dohn beah fig no mo fa nobody fa nyam.” An e ciple yeh Jedus say dat ta dat tree.
Jedus Gone Eenta God House
15Wen Jedus dem git ta Jerusalem, Jedus gone eenta God House. E staat fa dribe out de people dey dey wa beena buy an sell ting. E ton oba dem table weh people beena mek change fa de money ob people fom oda lan. An e ton oba dem bench weh people come fa seddown wen dey da sell pigeon.
16E ain leh nobody tote nottin fa sell, wen dey da pass shru de yaad ob God House.
17Den e laan de people say, “Fa true, dey done write een God Book, tell we dat God say, ‘People gwine call me House de place weh people wa come fom all oba de wol come fa pray ta God.’ Bot oona done ton um eenta place weh de tief da hide!”
18Wen de Jew priest leada dem an de Jew Law teacha dem yeh wa Jedus done say, dey staat fa look fa way fa kill um. Dey beena scaid ob um, cause all de crowd ob people beena stonish wen dey yeh wa Jedus da teach.
19Wen de sun da set fa red, Jedus an e ciple come outta de city.
Mus Bleebe God fa True
20De nex maanin wen Jedus dem da gwine long de road, dey see de fig tree. All dat tree done dry op an dead, fom de bottom root op ta de top de tree.
21Peter memba wa done happen de day fo, an e tell Jedus say, “Teacha, look dey! Dat fig tree done fa dead. Dat de tree wa ya done taak ta, tell um mus dohn beah fig no mo.”
22Jedus ansa um say, “Mus bleebe God fa true.
23A da tell oona, ef anybody tell dis mountain yah say, ‘Mus git op an go shrow yasef eenta de sea,’ dat wa gwine happen, ef dat poson ain doubt een e haat, ef e bleebe fa true dat e da say gwine happen, God gwine do um.
24So den, A da tell oona say, wen oona aks God fa sompin, mus bleebe fa true dat oona done git um, den God gwine gim ta oona.
25Weneba oona da stan an pray ta God, mus paadon anybody wa done oona bad. Den oona Fada God wa dey een heaben gwine paadon oona fa de ebil ting wa oona beena do.
26[Ef oona ain paadon oda people, den oona Fada wa dey een heaben ain gwine paadon oona fa de ebil ting wa oona beena do.]”
Dey Quizzit Jedus Bout E Tority
27Jedus an e ciple dem come back ta Jerusalem, an Jedus beena waak een God House. Some big Jew priest leada an Jew Law teacha an oda big leada dem come ta Jedus.
28Dey aks um say, “Wa right ya hab fa do dem ting yah? Who dat gii ya de tority fa do um?”
29Jedus ansa say, “A gwine aks oona one queshon. Ef oona ansa me, A gwine tell oona who dat gii me de tority fa do dem ting yah.
30Mus tell me say, ‘Who dat gii John de tority fa come bactize people? God gii John tority, o some poson gim de tority?’”
31De leada dem bicka mongst deysef say, “Ef we ansa say God gii John de tority fa come bactize people, Jedus gwine aks we say, ‘Hoccome oona ain bleebe John?’
32Bot we mus dohn say, ‘Some poson gii John de tority.’” Dey beena scaid fa say dat cause all de people done bleebe say John been a true prophet wa come fom God.
33So dey ansa Jedus say, “We ain know who dat gii John de tority fa come bactize people.” Jedus tell um say, “Den A mesef ain gwine tell oona who dat gii me de tority fa do dem ting yah.”
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel