Alkitab Mobile SABDA
[VER] : [GULLAH]     [PL]  [PB] 
 <<  Markus 3 >> 

Jedus Heal One Man Wid a Cripple Op Han

1One oda day, Jedus gone ta de Jew meetin house. An one man been dey wa hab e han cripple op.

2E been de Jew Woshup Day an some people dey wahn fa cuse Jedus. So dey watch um all de time fa see ef e gwine heal dat man wa hab e han cripple op pon de Woshup Day. Dem people plan fa cuse Jedus say, “E da do ting wa ain right fa do pon de Woshup Day.”

3Jedus tell de man wa hab e han cripple op say, “Come stanop yah ta de front ob we.”

4Den Jedus aks de people say, “Tell me, coddin ta we Law, wa oona say, we kin do pon de Woshup Day? E be right fa do good o fa do bad? Fa sabe man life o fa stroy um?” Bot de people ain ansa um. Dey ain crack e teet.

5Wiles Jedus look pon um e bex een e haat. Bot same time, e pity um cause dey head been so haad an wrong. E say ta de man, “Scretch out ya han.” De man scretch e han out an dat han git well like nyew.

6De Pharisee dem gone outta de Jew meetin house. Dey gone meet right way wid some ob King Herod people fa see how dem gwine kill Jedus.

Heapa People Come Waak Wid Jedus

7Jedus an e ciple dem wa always trabel longside um, gone way ta Lake Galilee. An a heapa people come fom Galilee an waak wid Jedus dey.

8Wen dey yeh bout all wa Jedus da do, a heapa people come fom Judea lan, fom Jerusalem city an Idumea lan. Dey come fom oba ta de side de Jerden Riba an dem town roun Tyre an Sidon.

9De people been so plenty dat Jedus tell e ciple dem fa draw op a boat, bring um close ta de sho ready fa um fa go eenta ef de people crowd um tommuch.

10Cause Jedus done beena heal plenty sick people, so all de people wa sick beena crowd um fa try fa tetch um.

11Weneba people wa hab ebil sperit een um see Jedus, dey fall down pon de groun een front ob um. Dem ebil sperit holla say, “Ya be God Son!”

12Bot weneba dey say dat, Jedus waan dem, chaage um say, “Mus dohn tell nobody dat A be God Son.”

Jedus Pick Tweb Postle

13Jedus gone op one high hill an call out de man wa e wahn fa come. An dey gone fa meet um.

14Jedus pick tweb man wa e done name postle. E pick um fa trabel long wid um. An e tell um e gwine sen dem go fa tell people God wod.

15An e gwine gim powa fa dribe de ebil sperit dem outta people.

16Dese been de tweb man wa Jedus done pick. One been Simon wa Jedus gii de name Peter.

17Dey been James an e broda John, dem wa been Zebedee son. Jedus call dem Boanerges, dat mean “Man wa git bex tommuch an mek noise like tunda.”

18An e pick Andrew, Philip, Bartholomew, Matthew, Thomas, James wa been Alphaeus son, Thaddaeus, an Simon wa been call de Patrot.

19An e pick Judas Iscariot, wa beena gwine han Jedus oba ta e enemy dem.

De Jew Law Teacha dem Say Beelzebub Hab Powa Oba Jedus

20Den Jedus an e ciple dem gone ta a house fa stay. A crowd come geda roun um gin so dey ain hab chance fa nyam.

21Wen Jedus fambly yeh bout dat, dey gone fa tek um outta dey. Cause people da say, “E da mek like e outta e head.”

22Some Jew Law teacha wa come outta Jerusalem say, “Beelzebub, de leada ob de ebil sperit dem, da stay dey eenside Jedus, tell um wa fa do! E gim de powa fa dribe out ebil sperit fom people.”

23So Jedus call de people an laan um. E tell um one paable say, “Fa sho, dat poson wa Satan hab powa oba ain gwine dribe out Satan, ainty?

24Same like ef people een de same country da fight mongst deysef, dat country ain gwine las.

25An ef people een de same house da fight mongst deysef, dey gwine scatta.

26Same so, ef Satan da fight ginst e own wokman dem, dey gwine wide op e powa. Satan ain gwine rule no mo oba um.

27“Fa true, nobody ain gwine go eenside scrong man house an tief e propaty, lessin e mo scrong den dat man. Den e kin tie dat scrong man op an go eenside. An e kin tek all de scrong man propaty.”

28“A da tell oona fa true, God gwine paadon all kinda ebil ting people do an all de bad ting dey taak bout me.

29Bot God ain neba gwine paadon nobody wa say ebil ting ginst de Holy Sperit. Dat sin gwine stay dey pon dat poson faeba.”

30Jedus say dat cause some people beena say, “Ebil sperit da stay eenside Jedus.”

Jedus Fambly

31Jedus modda an e broda dem come find um. Dey beena stan outside de door. an dey sen somebody fa call um.

32De crowd wa beena geda, da seddown roun Jedus, tell um say, “Look, ya modda an ya broda dem right outside de door. Dey wahn fa see ya.”

33Jedus ansa um say, “A gwine tell oona who dat kin say e be me modda, an who dat me broda?”

34E ton look roun pon de people wa da seddown roun um an say, “Oona wa dey yah, oona be me modda an me broda!

35Cause de poson wa do wa God wahn, dat poson me broda, me sista an me modda.”



 <<  Markus 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel