1Fom Paul wa da saab Jedus Christ. A a postle wa God done pick, an e gii me orda fa go tell people de Good Nyews wa God sen. A Paul da write ta oona.
2God promise way back dey fa sen dis Good Nyews yah. E hab e prophet dem write um down een God Book, fa say dat dis Good Nyews gwine come.
3Dis Good Nyews yah taak bout God Son, we Lawd Jedus Christ. Wen e Son come as a man, e been bon one ob David chullun chullun.
4De Son ob God come fom God an blongst ta God. Wen God mek um git op fom mongst de dead an lib gin, e show wid e mighty powa dat Jedus e Son. Dat Jedus Christ, we Lawd.
5Shru Christ an fa sake ob e name, God bless me an gii me de wok fa be e postle, so dat A kin go hep people all oba de wol fa bleebe pon Christ an do wa e tell um fa do.
6An oona dey een Rome, oona, too, mongst dem wa God call fa blongst ta Jedus Christ.
7So A da write ta all ob oona een Rome, oona wa God lob an wa e call fa be e own people. A pray dat God we Fada an de Lawd Jedus Christ bless oona an gii oona peace een oona haat.
Paul Tank God
8Fus off, A tank me God shru Jedus Christ fa all ob oona, cause people all oba de wol da yeh dat oona trus een Jedus Christ.
9A da tell ya fa true, A da saab God wid all me haat, fa tell de Good Nyews bout e Son. An God know dat wa A say, e true. E know dat A da memba oona all de time, weneba A da pray.
10An A pray dat now God gwine mek a way fa me fa come see oona, like A beena wahn fa do all dis time, ef God gree.
11Cause A wahn fa see oona too bad, fa share wid ya some ob de blessin wa de Holy Sperit da gii, so dat oona gwine bleebe pon Christ mo an mo.
12Wa A mean fa say, dat A wahn fa courage oona so dat ya kin waak mo close ta God, wen ya see how A trus een Christ. An oona gwine courage me wen A see how oona trus een um.
13Me Christian bredren, A wahn oona fa know dat plenty time A beena plan fa come see oona. Bot all de time sompin come op, so A ain been able fa come. A wahn fa wok dey so dat A kin see people mongst oona come waak een de Lawd way too, jes like A beena wok mongst de odares ob de people wa ain Jew so dat dey waak een e way.
14A hab a judy fa tell de Good Nyews ta all people, dem wa lib cibilize an dem wa ain lib cibilize, dem wa got book laanin an dem wa ain got no book laanin.
15Cause ob dat, A wahn fa true fa tell oona wa da lib een Rome, de Good Nyews too.
De Powa ob de Good Nyews
16A ain shame eben one leetle bit ob de Good Nyews, cause dis Good Nyews God powaful way fa sabe all de people wa bleebe pon Jedus Christ. Fus de Jew people an den dem people wa ain Jew, dey all gwine be sabe ef dey bleebe.
17Cause de Good Nyews da show we how God da mek all ting right tween people an esef, ef dey bleebe. God da mek um right all de time cause ob dey fait, fom de fus ta de las. Jes like God Book say, “De one wa God mek right wid esef cause e bleebe pon God, dat one gwine hab life.”
All People Sin een God Eye
18God bex fa true, an e da show dat e bex too bad. Fom heaben e show dat e gwine jedge people fa all de sin dey een dey haat an de ebil dey do. Dey ebil way da keep oda people fom know de trute bout God.
19Cause fa sho, dey know too good wa people kin know bout God. God esef mek dat plain ta um.
20Fom de time wen God mek de wol, people been able fa know plain dat God got powa wa dey faeba, an dat e de true God. People ain see dem ting yah bout God wid dey eye, bot dey kin know um, cause dey kin ondastan um fom de ting dat God mek. So den, ain nobody kin say dat e ain know e da sin.
21Dey know God, bot dey ain gim de hona dat dey oughta gii ta God, an dey ain tank um fa wa e da do. Steada dat, dey ain got a bit ob sense. Dey beena git all mix op een dey head til dey ain know wa right fa do.
22Dey say dey got sense, bot dey come fa be fool.
23Steada dey woshup God wa neba dead, dey da woshup idol wa look like a poson o a bod o a animal o a ting dat da crawl pon de groun.
24Dat wa mek God lef people lone an leh um go on an do dem dorty ting wa dey een dey haat. Dey da do dorty ting wid dey body wid one noda, wa oughta mek um too shame.
25Steada dey bleebe de trute bout God, dem people yah bleebe wa ain true tall. Dey da woshup an saab dem ting wa God mek, steada woshup an saab de God wa mek all ting. Dat de God we oughta praise faeba an eba! Amen.
26Cause people do dat, God lef um lone an leh um go on an do dem dorty ting wa dey een dey haat, ting wa oughta mek um too shame. De ooman deysef lef off da sleep wid man as dey husban an da do dorty ting wid oda ooman, wa God ain mek ooman fa do wid oda ooman.
27Same way so, de man dem too lef off da sleep wid dey ooman an do wa dey wahn fa do een dey haat, dem dorty ting wid oda man wa God ain mek man fa do wid oda man. Man dem do dorty ting dem wid oda man wa oughta mek um too shame. Cause ob dat, God punish um wid de punishment dey oughta git fa de dorty ting dey done.
28Pontop ob dat, cause people ain see fit fa pit dey haat pon de true ting wa dey know bout God, God lef um lone an leh um go on an tink all de time bout dem dorty ting so dat now dey jes keep on do dem ting wa dey ain oughta do.
29Dey haat full op wid all kind ob wickity ting. Dey da do all kind ob ebil. All de time dey da wahn wa oda people got, an dey da do one noda bad tommuch. Dey full op wid de big eye an dey jealous ob one noda. Dey kill one noda an fight one noda. Dey da ceebe one noda an dey da tink bad ting bout one noda. Dey onrabble dey mout, da taak bout oda people.
30Dey taak bad bout one noda. Dey hate God. Dey shrow slam at one noda. Dey tink dey mo betta den oda people, an dey brag bout deysef. Dey da tink op mo way fa do bad ting all de time. An dey ain pay no mind ta dey fada, needa so dey modda.
31Dey ain got no sense. Dey ain do wa dey say dey gwine do. Dey ain show no mussy ta one noda, an dey ain cyah nottin tall bout one noda.
32Dey know God Law say dat dem wa da do dem ting yah oughta dead. Stillyet, dey keep on da do um. An pontop ob dat, dey say dat oda people do good wen dey da do dem same dorty ting.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel