Alkitab Mobile SABDA
[VER] : [GULLAH]     [PL]  [PB] 
 <<  Roma 13 >> 

Mus Do wa de Rula Dem Say

1Ebrybody mus do wa dem wa da rule een de gobment tell ya fa do. Cause ain nobody got tority fa rule lessin God gim dat tority. An God de one wa pit dem people dey.

2So den, de one wa go ginst de tority dem, e da gwine ginst wa God say oughta be. An de one wa da do dat, e gwine mek esef suffa jedgiment.

3De people wa da do wa right, dey ain scaid ob dem wa da rule oba um. Jes de people wa da do bad, dey scaid ob dem wa da rule oba um. Ef ya ain wahn fa be scaid ob de one wa got tority, ya mus do wa right. Den e gwine praise ya.

4Cause de poson wa got tority, e God saabant wa da wok fa hep oona. Bot ef ya do bad, ya oughta be scaid, cause e got powa fa punish ya fa true. E God saabant fa jedge an punish dem people wa da do bad.

5Cause ob dat, ya mus do wa de rula dem ya tell ya fa do. Ya mus dohn do um jes cause dey got tority fa jedge an punish ya. Ya mus do um, too, cause ya know eenside ya haat dat ya oughta do um.

6Same way so, ya mus pay tax, cause de tority dem da do God wok. Dey do de wok dey dey oughta do.

7Ya mus pay ebrybody wa ya owe um. Ya mus pay ebry kind ob tax wa de tority dem got a right fa aks ya fa pay. An ya mus spec dem ya oughta spec, an gii hona ta dem ya oughta gii hona ta.

How Oona Oughta Lib wid One Noda

8Mus dohn owe nobody no debt, cep de debt dat oona mus lob one noda. Dem wa da lob one noda da do all wa de Law ob God say dey oughta do.

9De law dem wa God gii Moses say, “Man mus dohn lef e wife an go sleep wid oda ooman, an ooman mus dohn lef e husban an go sleep wid oda man. Mus dohn kill. Mus dohn tief. An mus dohn cobish.” Dem law yah an all de oda dem, dey eenside dat one law wa say, “Ya mus lob ya neighba jes like ya lob yasef.”

10Wen ya lob ya neighba, ya gwine do um no bad. So den, wen ya lob, ya da do all wa de Law say ya oughta do.

11Ya mus do dat, cause ya know wa kind ob time we da lib een. Ya know dat de time fa wake op done come, cause de day wen God gwine sabe we da come mo closa now den de time wen we fus bleebe pon Jedus Christ.

12De night mos pass. De day close by now. So den, leh we stop do dem bad ting wa wickity people da do een de daak. Like sodja, wa pit on dey aama een de day, leh we tek op dem ting wa we kin fight wid, an leh we be ready fa fight een de light.

13Leh we lib a clean life, like people wa dey een de light ob day. We mus dohn lib loose life. Mus dohn be dronka. Mus dohn lib bad life an do all kind ob ebil ting. Mus dohn fight wid people o git de big eye cause ob wa dey got.

14Steada dat, mus pit on de Lawd Jedus Christ as we aama fa fight wid. An we mus dohn pay no mind ta dem bad ting wa we sinful haat tell we fa do.



 <<  Roma 13 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran