Alkitab Mobile SABDA
[VER] : [GULLAH]     [PL]  [PB] 
 <<  Roma 16 >> 

Paul Greet Some Christian Dem een Rome

1We Christian sista Phoebe, wa da saab de choch dey een Cenchrea, e a good poson.

2A aks oona fa gim haaty welcome cause e blongst ta de Lawd, an dat de way people wa blongst ta de Lawd oughta welcome one noda. Hep um wid waeba e wahn, cause e beena hep plenty people an e beena hep me too.

3A da tell Priscilla an Aquila hey. Dey beena wok fa Christ Jedus wid me.

4Dey been ready fa dead fa me sake. Me an all de choch people wa ain Jew da tell um tankya.

5An A da tell de choch people wa da meet een dey house, hey. A da tell me deah fren Epaenetus hey. E been de fus one fa bleebe pon Christ een de province ob Asia.

6A da tell Mary, wa beena wok real haad fa oona, hey.

7A da tell Andronicus an Junias hey. Dey Jew people jes like me, an dey been dey een de jailhouse wid me. Dey Christian wa de postle dem gii hona ta fa true. An dey bleebe pon Christ fo me.

8A da tell Ampliatus hey. E me deah fren een de Lawd.

9A da tell Urbanus hey. E a man wa da wok fa Christ wid we. An A da tell me deah fren Stachys hey.

10A da tell Apelles hey. E been pit ta de test an beena show dat e true ta Christ, fa sho. A da tell Aristobulus fambly hey.

11A da tell Herodion hey. E a Jew, jes like me. An A tell dem Christian wa dey een Narcissus house hey.

12A da tell Tryphena an Tryphosa, dem ooman wa da wok fa de Lawd, hey. An A da tell me deah fren Persis hey. E da wok haad fa de Lawd.

13A da tell Rufus hey. E a good broda een de Lawd. An A da tell Rufus modda hey. E beena hep me jes like A been e own chile.

14A da tell Asyncritus, Phlegon, Hermas, Patrobas, Hermes an de oda Christian bredren wa dey wid um, hey.

15A da tell Philologus, Julia, Nereus an e sista, an Olympas, an all God people dey wid um, hey.

16Tell one noda hey een Christian lob. All de people een de Christian choch dem wa dey yah da tell oona hey.

Paul Tell de Christian Dem wa fa Do

17Me Christian bredren, A da beg oona fa watch out fa dem people wa da mek oona aagy wid one noda an opsot people, fa mek um ton way fom God an staat fa bleebe oda ting. Dey da do ting wa go ginst wa we beena laan oona. Oona mus dohn hab nottin fa do wid dem.

18De people wa da do dem kind ob ting yah, dey ain da do de wok ob we Lawd Jedus Christ. Dey da wok fa sattify jes deysef. Dey got sweet mout an dey taak fine, fa ceebe de mind dem ob people wa ain know dey da do bad.

19All de people beena yeh how oona da folla de way ob de Good Nyews wid all ya haat, an dat mek me full op wid joy fa wa ya da do. Bot A wahn ya fa git sense fa know fa do wa good, an mek ya so dat ya ain got nottin fa do wid ebil.

20An purty soon, God wa da gii we peace, gwine stroy Satan powa an pit um onda ya foot. De blessin ob we Lawd Jedus be wid oona.

21Timothy, wa da wok wid me, da tell oona hey. An Lucius, Jason, an Sosipater, dey da tell oona hey. Dey Jew people, jes like me.

22A Tertius, oona Christian bredren, wa da write dis letta fa Paul, da tell oona hey.

23Gaius da tell oona hey. A da stay een e house an all de people ob de choch da meet een e house, too. Erastus, wa da keep de money fa de city, an we Christian bredren Quartus da tell oona hey.

24A da pray dat de blessin ob we Lawd Jedus Christ be wid all ob oona. Amen.

Paul Praise God

25Leh we praise God! God able fa mek oona stan mo an mo scronga een oona trus een um, coddin ta de Good Nyews bout Jedus Christ, wa A beena tell oona, an coddin ta wa A beena tell oona bout de true ting wa God been hide fom people fom wen de wol staat.

26Bot now, God beena mek a heapa people know dis true ting yah, wa A beena tell, bout wa de prophet dem write bout Christ, coddin ta wa God wa da lib faeba tell me fa do. E do dat so dat all people een de wol kin bleebe an do wa e tell um fa do.

27God an nobody else got sense een all ting. Leh we praise um faeba shru Jedus Christ. Amen.



 <<  Roma 16 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran