Alkitab Mobile SABDA
[VER] : [GULLAH]     [PL]  [PB] 
 <<  Wahyu 1 >> 

1Dis book laan we bout de ting dem wa Jedus Christ show ta dem people wa da do God wok. God fus show Jedus dem ting yah, so dat Jedus kin mek dem wa da do e wok know dem ting wa soon mus happen directly. Christ sen e angel fa go ta John wa beena wok fa um an mek de angel show John dem ting yah.

2An John done tell we all dem ting wa e see. So den, dis de book yah weh John done write down de wod wa God sen. Dat de trute wa Jedus Christ esef show um.

3E bless fa true wa read de wod dem wa dey een dis book, wa God tell we an wa haffa happen. Dey bless fa true wa yeh dem wod wa been write down een dis book an we pay tention ta wa dey say. Cause de time ain faa off wen dem ting yah gwine happen.

John Greet de People ob De Seben Choch

4A, John da write ta oona wa dey een dem seben choch een de arie ob Asia. A pray dat God wa dey now an wa been dey fo dis wol been mek, an wa gwine come back ta dis wol, show oona how e good fa true an gii oona peace. Same way so, A pray dat God seben sperit dem, wa stanop fo e trone weh e seddown da rule de good ta oona an gii oona peace.

5An A pray dat Jedus Christ, wa we kin trus fa true an wa da tell people wa true all de time, show oona how e good an gii oona peace. Jedus Christ de fus one wa God mek lib gin an git op fom mongst de dead an all dem wa da rule een dis wol dey onda um. E lob we an e done shed e blood an dead fa sake ob we so dat e set we free fom we sin.

6E done mek we come onda God rule an be priest fa saab e Fada God. So den, e fa git hona an powa faeba an eba. Amen.

7A da tell oona say, een de middle ob de cloud e gwine come an all people gwine shim. Eben dem people wa been jook um gwine shim. People fom all country an dem wa da taak all diffunt language dem een de wol, dey gwine be saary cause e da come. Dat so e gwine stan fa true! Amen.

8God we Lawd da tell we say, “A de Fus an de Las. A been dey fo de wol mek. A dey now, an A gwine come back ta dis wol. A got powa oba all.”

John See Jedus Christ

9A, John, oona Christian broda. We all da folla Jedus togeda. Een Christ we all beah op scrong onda all we suffrin. An we leh Jedus Christ rule oba we. Cause A beena tell people God wod an de trute bout Jedus, dey been cyaa me ta de islant de call Patmos.

10One Lawd Day, God Sperit come pon me, an A yeh boice wa da taak loud jes like trumpet dey hine me.

11De boice tell me say, “Write wa ya gwine see down een a book an sen de book ta de Christian dem ob de seben choch: ta Ephesus, Smyrna, Pergamum, Thyatira, Sardis, Philadelphia an Laodicea.”

12A ton roun fa see who dat wa da taak ta me. An wen A ton roun, A see seben lampholda wa been mek fom gole.

13Een de middle ob dem lampholda yah, A see somebody “jes like one man wa come fom God.” E weah long robe wa reach ta e foot, an gole scrap been tie roun e chest.

14E head an e hair been white like wool, white jes like snow. An e eye shine out like fire da bun bright.

15E foot beena shine jes like brass wa dey been bun een furnace an den shine um op. An e boice loud like de swellin wata da rush pon de hill.

16E beena hole seben staa een e right han. One swod wa shaap on two side beena come outta e mout. E face beena shine like de sun da shine at tweb noon.

17Wen A shim, A faddown flat at e foot like poson wa done dead. E pit e right han pon me an an tell me say, “Mus dohn fraid! A de Fus an de Las.

18A de one wa da lib! A done been dead, bot look yah, A da lib faeba an eba! A got powa oba det. A da hole de key dem fa weh de sperit dem wa done come outta dis wol da.

19So den, write down all dem ting yah wa ya see. Write dem ting wa be now an dem ting wa gwine be bye an bye.

20A da come fa tell ya wa dem seben staa yah wa A hole een me right han an dem seben gole lampholda, mean. De seben staa dem de seben angel wa da gyaad de seben choch. De seben lampholda dem de seben choch deysef.”



 <<  Wahyu 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2021
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran