Alkitab Mobile SABDA
[VER] : [GULLAH]     [PL]  [PB] 
 <<  Wahyu 13 >> 

1(12-18) Den de dragon gone stanop close ta de sea. (13-1)

De Two Beast

Den A see one beast da come op outta de wata. E been got ten hon an crown pon um. Ebrybody ob e hon been got one crown pon um. An pon ebrybody ob e head dem, dey been sompin write down wa da hole God cheap.

2De beast wa A see look jes like leopard, bot e foot look like beah foot an e mout like lion mout. De dragon gii dis beast yah de powa an de tority wa e been got oba all dem ting wa e beena rule.

3One ob de head ob de beast look like once pon a time somebody done wound so dat e been fa dead. Bot de wound wa been fa mek um dead, e done been well now. All de people een de wol been stonish an folla de beast.

4Dey all woshup de dragon cause e been gii de beast e powa. An dey woshup de beast too an say “Ain nobody like de beast, ainty? Ain nobody able fa fight um an win out!”

5God leh de beast taak all kinda bad ting ginst God an taak dem ting wa show e proud fa true. An God leh um hab tority fa rule fa foty two mont.

6Dat beast cuss God an hole e name cheap, an de place weh God lib, an all dem wa dey een heaben. E hole um all cheap.

7God leh de beast fight God own people dem an win out oba um. An God gii dat beast tority oba people fom all de tribe dem an fom all de diffunt nation dem een de wol, people wa took all de diffunt language dem.

8All de people een de wol gwine woshup dat beast, cep fa dem wa got dey name write down een de book wa blongst ta de Lamb, wa people been kill. Fo God mek de wol, e done write down dem name ob dem people wa gwine lib fa eba an eba. E write um down een de book ob de Lamb.

9“Now den, listen op, ef ya got yea fa yeh!

10De people wa God done maak da say dey fagit ketch, people gwine ketch um. De one dem wa God done maak da say dey fagit jook wid de swod an git kill, people gwine jook um an kill um. Dis mean dat God people dem mus beah op onda suffrin an mus dohn neba stop fa bleebe pon God.”

11Den A see noda beast da come op outta de groun. E been got two hon jes like lamb hon, an e beena taak like dragon.

12Dis secon beast tek all de powa ob de fus beast an nyuse dat powa fo um. E mek de people een da wol woshup de fus beast, wa got wound wa been fa mek um dead bot done git well.

13Dis secon beast do miracle wa mek people da watch, e eben mek fire come down outta heaben ta de wol ta de people.

14Cause ob dem miracle wa de secon beast got powa fa do fo de fus beast, e ceebe de people ob de wol. Dat secon beast orda um say mus mek statue fa show hona ta de fus beast wa been wound wid swod, stillyet e da lib.

15An God leh de secon beast blow life eenta de statue ob de fus beast, so dat de statue able fa taak an gii orda ta people fa kill all dem wa ain woshup um.

16De secon beast orda fa dem fa pit maak pon all people, pon dey right han o pon dey forehead. Dey mus pit maak pon dem bigman an dem small, dem wa got plenty ting an dem wa ain got nottin, dem wa free bon an dem wa slabe.

17Ain nobody been able fa buy o sell nottin, lessen e got dat maak dey. An dat maak e de name ob de fus beast o de numba wa stan fa de name.

18So den, oona mus git sense fa true fa ondastan dis. Leh de poson wa got sense, figure out wa de beast numba mean, cause de numba stan fa man numba. Dat numba six hundud an sixty-six.



 <<  Wahyu 13 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2021
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran