De Ooman An de Beast
1Den one ob de seben angel dem wa done been hole de seben bowl, come taak ta me, say, “Come wid me. A gwine show ya how dey gwine punish de ooman wa lib free life, wa all people know bout. Dat ooman, e de city wa dey been build close ta plenty riba.
2De king dem ob de wol been lib free life wid dat ooman yah, an de people ob de wol been dronk wid de wine wa e gim fa drink. Dat de free life wa dey been lib wid um.”
3Den de Sperit come pon me, an de angel cyaa me ta a desat. A see one ooman dey da seddown pon a bright red beast wa been got seben head an ten hon. An all oba e body heapa bad name dem wa hole God cheap, been write down.
4De ooman been weah purple an bright red cloes, an e been dress op fine wid a heapa gole jewel an shinin stone an pearl bead. E been hole a gole cup een e han, wa full op wid real dorty ting wa e free life bring.
5A name wa got secret meanin been write pon e forehead, wa say, “Babylon wa got big powa, mo da wa da bon de people dem wa lib free life an wa da do dem dorty ting een da wol wa people ain oughta do wid one noda.”
6A see dat de ooman been dronk wid de blood ob God people, de blood ob dem people wa been kill cause de tell people say dat Jedus dey Lawd. Wen A shim, A stonish fa true.
7De angel aks e say, “Hoccome ya stonish? A gwine tell ya de secret meanin ob de ooman an ob de beast wa tote um, wa got seben head an ten hon.
8De beast wa ya jes see been lib fo bot now e ain got no life no mo. E gwine come op outta de deep hole wa ain got no bottom. Den e gwine go ta de place weh dey gwine kill um. De people een de wol, wa got name dem wa ain been write down fo God made de wol, een de book weh dey write dem people name wa got life faeba an eba, dem people gwine be stonish wen dey see de beast. Cause e been lib fo. Now e ain got no life no mo, bot e gwine come back gin.
9So den, ya mus git sense fa true fa ondastan wa dem ting yah mean. De seben haf dey de seben hill wa de ooman da seddown pon.
10An gin, dey mean seben king. Fibe ob dem king yah ain no mo. One da rule now. De oda one ain come yet, bot wen e come, e haffa rule fa jes a leetle time.
11De beast wa been a lib fo, bot ain a lib no mo, e de king wa mek eight. E blongst ta de seben king dem, an e da gwine off ta place weh dey gwine stroy um.
12“De ten hon dem wa ya been see dey ten king wa staat ain staat fa rule yet. Bot dey gwine git tority fa rule like king wid de beast fa one hour.
13All dem ten king yah wahn fa do de same ting an dey all da gii da beast dey powa an tority.
14Dey gwine fight ginst de Lamb, bot de Lamb gwine win out oba um. Cause e da Lawd wa oba all lawd an de King wa da rule oba all king. An wid de Lamb gwine be dem wa folla um, dem wa e call an pick fa do e wok, dem wa ain neba stop fa bleebe pon um.”
15Den de angel tell me say, “Dem wata weh ya been see, de ooman wa lib free life seddown pon um, dey all be diffunt nation dem, an all de diffunt people dem wa da taak all dem diffunt language.
16De beast an de ten hon wa ya been see, dey ain gwine like de ooman wa lib free life. Dey gwine tek way all wa e got an lef um nekid. Dey gwine nyam op de flesh ob e body an bun um op wid fire.
17Cause God mek dem ten king wahn een dey haat fa do wa e wahn, so dat dey all gree togeda. An dey gwine gii de beast dey powa fa rule til all ting happen fa true jes like God wod done been tell we.
18“De ooman ya been see, e dat city wa got powa oba dem wa da rule een de wol.”
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel