Alkitab Mobile SABDA
[VER] : [GULLAH]     [PL]  [PB] 
 <<  Yakobus 4 >> 

Do wa God Wahn Oona fa Do

1Wa ting mek oona fight an aagy mongst oonasef? De ting dem wa dey eenside oona haat, ting wa oona wahn fa sattify oonasef no mo, dey da fight eenside oona an da mek oona fight an aagy wid one noda.

2Oona wahn sompin, bot oona ain got um. So oona kill noda poson, an oona git de big eye. Bot oona cyahn git wa oona wahn. Oona aagy an fight one noda. Oona ain got wa oona wahn, cause oona ain aks God fa gim ta oona.

3Ya kin aks God fa sompin an God ain gim ta ya, cause de reason wa mek ya aks ain right. Ya aks fa dem ting wa ya wahn fa sattify yasef, no mo.

4Ya like a ooman wa ain scraight wid e husban. Oona ton way fom God. Fa sho, oona know dat wen oona lob de ting dem wa dey een de wol, dat gwine mek oona God enemy, ainty? De one wa mek op e mind fa go atta dem ting een de wol, e da mek esef God enemy.

5Oona mean fa say dat fa nottin God Book tell we say, “De sperit wa God pit eenside we, e wahn we jes fa esef?”

6Bot de blessin dat wa God gii we, dat mo scronga. Dat wa mek um write een God Book say, “God da set esef ginst proud people wa go dey own way, bot e da bless dem wa tek low an leh God tek um een e way.”

7So den, pit yasef onda God, da do wa e wahn. Stanop an fight de debil, an e gwine ron way fom ya.

8Come close ta God, an e gwine come close ta ya. Oona wa beena sin, mus stop fa sin. Oona people wa wahn fa lob bof de wol an God, mus pull all dem bad ting outta oona haat.

9Memba dem bad ting oona beena do, an be saary an weep. Mus stop fa laff an staat fa cry. Oona ain oughta be heppy. Oona oughta be too saary.

10Pit yasef onda de Lawd an do wa e wahn, an e gwine lif ya op.

Mus Dohn Jedge Nobody

11Me Christian bredren, mus dohn taak bad bout one noda. De one wa da taak bad bout e broda o jedge um, dat one dey da taak bad bout God Law, an e da jedge dat Law. Ef ya jedge God Law, dat mean fa say dat ya ain da do wa God Law tell ya fa do no mo. Steada dat, oona de jedge ob God Law.

12God de onliest lawgiba an jedge. Jes God got powa fa sabe people o fa stroy um. Oona ain got no right fa jedge oda people.

Mus Dohn Brag

13Now listen op. A da taak ta oona wa da say, “Taday o demarra A gwine go ta dat town yonda o ta dat one oba dey so. A gwine go trade oba dey an mek me some money.”

14Bot oona ain eben know wa gwine happen demarra. Cause wa ya life? Ya life jes like fog wa dey dey one minute an de oda minute e done gone.

15Wen oona wahn fa taak bout wa oona gwine do, oona oughta say, “Ef God wahn um, A ain gwine dead an we gwine do dis ting yah o dat ting dey.”

16Bot now fa true oona taak high an brag bout wa oona gwine do demarra. All biggity taak like dat, e ebil.

17So den, ef somebody know wa right fa do an e ain do um, dat one dey da sin.



 <<  Yakobus 4 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran