Alkitab Mobile SABDA
[VER] : [GULLAH]     [PL]  [PB] 
 <<  Yakobus 5 >> 

God Waan Dem wa Got Plenty Ting an Ain Do Right ta Oda People

1Oona wa got plenty ting, listen ta wa A gwine tell ya now. Oona oughta weep an wail cause ob de suffrin wa da come pon oona!

2De heapa ting wa oona got, dey done rot way, an de moth dem nyam op oona cloes.

3Oona gole an silba done been kiba wid rust. An dat rust gwine condemn oona an gwine nyam op oona body jes like a fire kin do. Oona done sto op plenty ting een dis wol wa gwine end.

4Look yah! Oona ain pay de people dem wa beena wok pon oona faam. Listen ta dem da cry out ginst oona! Dem wa beena geda crop da cry out. An God wa got powa oba all, e done yeh dey cry.

5Oona life been full op wid all kinda fine ting dat oona beena wahn an got een de wol, an oona beena do all wa oona wahn fa do. All dem ting yah wa oona got fa oonasef, dey mek oona like hog wa done fat, ready fa git kill.

6Oona done condemn an kill people wa ain do nottin wrong an ain fight ginst oona.

Beah Op Onda All Oona Trouble an Aks God fa Hep Oona

7Me Christian bredren, beah op onda all oona trouble, da wait til de Lawd come back. Memba how de faama kin wait fom wen e plant de seed een de groun til de time come fa haabis e walyable crop. E kin beah ebryting, da wait fa de rain fa come een de fall an een de spring time.

8Same way so, oona mus beah op onda ebryting an wait. Mus dohn neba gii op, cause de time da come soon wen de Lawd gwine come back.

9Me Christian bredren, mus dohn complain bout one noda, so dat God ain gwine condemn oona. De Jedge gwine come right way. E da stan een de doormout.

10Me Christian bredren, memba de prophet dem wa beena taak de wod ob de Lawd. Dey beena suffa plenty, bot dey beah all dey fliction.

11We say dat God bless um cause dey ain gii op. Oona yeh how Job beena beah a heapa suffrin, an oona know how de Lawd come bless um at las. Cause de Lawd full op wid mussy fa we, an e wahn fa hep we.

12Me bredren, mo den all, A wahn oona fa know dat wen oona promise sompin, mus dohn mek no wow da say, “A sweah by heaben” o “A sweah by dis wol.” Mus dohn sweah by nottin wen oona promise sompin. Stead ob dat, ef oona gree ta sompin, oona oughta say, “Yes.” An ef oona ain gree, oona oughta say, “No.” Den God ain gwine condemn oona.

13Ef one ob oona da suffa, leh um aks God fa hep um. Ef one ob oona heppy, leh um sing, leh um sing praise ta God.

14Ef one ob oona sick, leh um aks fa de choch elda dem. Leh um come pray oba um an naint um wid oll een de name ob da Lawd.

15An ef dey trus God dat e gwine ansa dey pray, dat sick poson gwine git well. God gwine mek um well gin. An ef dat poson beena sin, God gwine paadon um.

16So den, tell one noda de sin dem wa oona done an be saary cause ob um, an pray fa one noda, so dat God gwine mek oona well. De one wa da waak scraight wid God, e pray got great powa an God gwine ansa um fa sho.

17Elijah been a man like wesef. E beena pray wid all e haat dat God ain gwine leh no rain come. An e ain rain none tall pon de groun dey fa shree yeah an six mont.

18Den wen Elijah pray gin, an aks God fa sen rain, de rain come down, an de plant dem staat fa grow crop gin.

19Me bredren, some time one ob oona might wanda way fom God true way. Den noda one ob oona bring um back.

20Wen dat happen, oona kin know dat de one wa bring one sinna back ta God way, hep um ton fom do bad, dat poson da sabe de sinna soul fom det, an cause ob um, God gwine paadon plenty sin.



 <<  Yakobus 5 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran