Alkitab Mobile SABDA
[VER] : [GULLAH]     [PL]  [PB] 
 <<  Yohanes 18 >> 

Dey Arres Jedus

1Wen Jedus done pray dem wod, e an e ciple dem lef dat place. Dey cross oba a creek wa dey call Kidron. Den e gone wid e ciple dem eenta a gyaaden dey wa hab plenty olib tree.

2Judas, wa han oba Jedus ta e enemy dem, beena know dat place good, cause Jedus an e ciple dem been meet dey plenty time.

3So Judas gone fa meet Jedus een de gyaaden. E gone wid some Roman sodja dem, an some ob dem man wa gyaad God House. De head man dem ob de Jew priest an de Pharisee dem sen de gyaad fa go wid Judas. Dey beena tote oll lamp an toch, an weapon fa fight wid.

4Jedus beena know all wa gwine happen ta um, so e gone fa meet dem people. E aks um say, “Who oona da look fa?”

5Dey ansa say, “We da look fa Jedus wa come fom Nazareth.” Jedus say, “Dis yah me. A Jedus.” Judas, wa come fa han Jedus oba, beena stan op dey wid dem people.

6Wen Jedus say, “Dis yah me. A Jedus,” de people moob back an faddown ta de groun.

7Jedus aks um gin say, “Who oona da look fa?” Dey say, “We da look fa Jedus wa come fom Nazareth.”

8Jedus ansa um say, “A done tell oona dat A Jedus. Ef oona da look fa me, leh dese oda man go den.”

9Dis happen so dat wa e say gwine happen jes like e say. Cause e say, “Fada, A ain loss eben one ob dem wa ya gii me.”

10Simon Peter beena tote a soad. E pull out de soad an hit de saabant ob de head man ob de Jew priest leada dem. An Peter cut off dat saabant right yea. Dat saabant been name Malchus.

11Jedus ton ta Peter an e chaage um say, “Pit ya soad op! Ain A gwine drink de cup wa me Fada done gii me?”

Dey Tek Jedus ta Annas

12Den de Roman sodja dem, dey head leada, an de Jew gyaad dem arres Jedus. Dey tie um op.

13Dey tek um an gone fus fa see Annas. Annas been Caiaphas fada-een-law, an Caiaphas been de head man ob de priest dem dat yeah.

14Caiaphas de one wa done wise de Jew leada dem, tell um say, “E mo betta fa one man fa dead fa all de people.”

Peter Say E Ain Jedus Ciple

15Simon Peter an noda ciple beena folla Jedus. De head man ob de Jew priest leada dem know de oda ciple good. So de oda ciple gone wid Jedus eenside de yaad ob de head man house.

16Bot Peter been lef outside ta de gyate. De oda ciple, wa de head man know good, come out gin. E taak ta de gyal wa beena keep watch by de gyate, an e tek Peter eenside de yaad.

17De gyal wa been by de gyate aks Peter say, “Ya noda one ob dat man ciple, ainty?” Peter ansa say, “No, A ain e ciple!”

18De place dey been cole, so de saabant dem an de gyaad dem done mek a fire, an dey da stan op roun de fire fa waam deysef. An Peter gone an stan op wid um da waam esef too.

De Head Man Quizzit Jedus

19De man wa nyuse fa be de head man ob de priest leada dem, e da quizzit Jedus. E quizzit um bout e ciple dem an dem ting wa e beena laan people.

20Jedus ansa de head man say, “All de time A beena taak fo all de people een de open. A laan um een de Jew meetin house an een God House, weh all de Jew people meet togeda. A ain neba hide fa tell nobody nottin.

21Hoccome ya da quizzit me? Quizzit dem people wa done yeh wa A say. Fa sho, dey know wa A done beena say.”

22Wen Jedus say dat, one ob de gyaad dey slap um an say, “Dat ain no way fa taak ta de head man, ainty?”

23Jedus ansa say, “Ef A done say sompin wa ain right, tell ebrybody yah wa A say. Bot ef A done say wa true, wa mek ya slap me?”

24So den Annas sen Jedus ta Caiaphas, de head man ob de priest leada dem een dat time. An Jedus han been still tie op.

Peter Say Gin dat E Ain Jedus Ciple

25Peter been still dey close ta de fire da waam esef. De oda people wa been dey aks um say, “Ya ain noda one ob dat man ciple, ainty?” Peter say, “No, A ain e ciple!”

26Den noda man come op ta Peter. E been one ob de saabant dem wa wok fa de head man an e been kin ta de man wa got e yea cut off. E aks Peter say, “A done see ya wid um een de olib gyaaden, ainty?”

27Peter say gin, “No, A ain been dey!” Dat same time, a roosta crow.

Jedus Fo Pilate

28Day clean, de gyaad dem tek Jedus way fom Caiaphas house an gone ta de Roman gobna bighouse. Bot de Jew dem ain gone eenside de gobna bighouse. Cause dey Law say ef dey gone eenside de house weh people wa ain Jew da stay, dey ain gwine be clean een God eye, an dat gwine mek um so dey ain fit fa nyam de Passoba Feas. Now de Jew dem wahn fa nyam de feas.

29So Pilate, de Roman gobna, gone fa meet um an aks um say, “Wa oona say dis man do?”

30Dey ansa Pilate say, “We ain been fa bring dis man yah fa come ta ya ef e ain done bad.”

31Pilate tell um say, “Oona tek um an go jedge um by oona own law.” De Jew dem ansa say, “Bot oona Roman law say we ain got no right fa tek no man life.”

32Wen all dis happen, dat mek e come true wa Jedus been say bout de way e been gwine dead.

33Pilate gone eenside de bighouse ta de place weh dey jedge people. Den e mek um tek Jedus an come meet um eenside dey. E quizzit Jedus say, “Ya de King ob de Jew people dem?”

34Den Jedus aks Pilate say, “Dat wa ya tink? O dat wa oda people tell ya bout me?”

35Pilate ansa say, “Ya tink A a Jew? Ya own Jew people an de head man dem ob de priest, dey done han ya oba ta me. Wa ya done done?”

36Jedus tell Pilate say, “A ain a king like de king dem wa rule een dis wol. Ef A been a king like dat, me man dem gwine fight fa me so dat de Jew dem ain arres me. No, A ain a king like dem wa rule een dis wol yah.”

37Pilate aks um say, “Well den, dat mean ya a king, ainty?” Jedus ansa say, “Ya right wen ya say A a king. Dat hoccome A come eenta de wol. A bon fa tell people de trute. All dem wa lob trute, dey pay mind ta me wod.”

38Pilate aks um say, “De trute, wa dat mean?”

Dey Ain Wahn Jedus fa Go Free

Den Pilate gone back outside gin ta de Jew dem. E tell um say, “A ain find nottin dat dis man do fa mek me condemn um.

39Bot ebry yeah wen de Passoba come, A hab um tek a man outta de jailhouse an leh um go free fa oona. Oona wahn me fa leh de king ob de Jew people go?”

40De people holla loud, ansa Pilate say, “No, dohn leh dat man dey go free! Leh Barabbas outta de jailhouse fa we!” Now den, Barabbas been a robba.



 <<  Yohanes 18 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel