1Pilate tell de sodja dem fa tek Jedus an go whip um.
2De sodja dem weabe some sticky briah an mek a crown. An dey pit um pon Jedus head. Den dey pit a long purple robe pon um fa weah.
3Dey keep gwine op ta um, oba an oba, an mek fun ob um, da say, “Ya mus lib faeba, ya de King ob de Jew people!” An dey slap um.
4One mo time Pilate gone out ta de Jew dem. E tell um say, “Oona look yah, A gwine mek um bring um back ta oona so dat oona gwine know dat A ain find nottin bad wa e do fa mek me condemn um.”
5So Jedus come out, an e da weah de briah crown an de long purple robe. Pilate tell de people say, “Oona look! Yah de man!”
6Wen de head man dem ob de priest an de gyaad dem see Jedus, dey holla loud say, “Nail um ta de cross! Nail um ta de cross!” Pilate tell um say, “Oonasef tek um den an go nail um ta de cross. Cause A mesef, A ain find nottin bad wa e do fa mek me condemn um.”
7Bot de Jew people ansa back, “We hab a law wa say e haffa dead, cause e beena say e God Son.”
8Wen Pilate yeh wa dey say, e been eben mo scaid.
9E gone back eenside de bighouse an aks Jedus say, “Weh ya come fom?” Bot Jedus ain ansa um.
10Pilate aks um say, “Ya ain gwine taak ta me? Ain ya know dat A hab de powa fa leh ya go an A hab de powa too fa mek um nail ya ta de cross?”
11Jedus ansa say, “Ya hab powa oba me jes cause God gii ya dat powa dey. So den, de man wa han me oba ta ya, e de mo wossa sinna.”
12Wen Pilate yeh wa Jedus say, e try fa find a way fa leh Jedus go. Bot de Jew people keep on da holla say, “Ef ya leh dis man yah go, ya ain no fren ob de Roman rula, Caesar. De one wa say e a king, e de enemy ob Caesar.”
13Wen Pilate yeh wa de people say, e mek um bring Jedus out. Den Pilate seddown een de chair weh dey seddown fa jedge people, een de place dey call De Stone Pavement. (De Hebrew people call um Gabbatha.)
14Now by den, e been bout midday ob de Preparation Day. Dat de day fo de Passoba staat. Pilate tell de Jew people say, “Oona look! Yah oona King!”
15Bot de people holla say, “Tek um way! Tek um way! Nail um ta de cross. Kill um!” Pilate aks um say, “Oona wahn me fa nail oona king ta de cross an kill um?” De head man dem ob de priest ansa say, “We ain hab no oda king cep Caesar!”
16So den, Pilate han Jedus oba ta um fa leh de Roman sodja dem go nail um ta de cross.
Dey Nail Jedus ta de Cross
So de sodja dem tek chaage ob Jedus.
17An e gone out, da tote e own cross pon e shoulda. E gone til e come ta a place dey call “De place wa stan like a man head.” (De Hebrew people call dat place “Golgotha.”)
18Dey, de sodja dem nail Jedus ta de cross. An dey nail two oda man ta two oda cross, one ta Jedus lef han an de oda ta Jedus right han. Jedus been dey een de middle ob dem two.
19Pilate mek um write pon a paper an mek a sign wa say, “Jedus, wa come fom Nazareth, de King ob de Jew People.” An Pilate mek um pit dat sign dey pon Jedus cross.
20A heapa Jew people read dat sign, cause de place weh dey done nail Jedus ta de cross been dey close ta de city. An dey done write dat een shree language, een Hebrew, Latin an Greek.
21De Jew head man dem ob de priest tell Pilate say, “Mek um write dat sign noda way. Mus dohn write, ‘Dis de King ob de Jew People.’ Mek um write, ‘Dis man say, A de King ob de Jew People.’”
22Pilate ansa say, “Wa A done write, dat wa gwine stay dey.”
23Atta de sodja dem done nail Jedus ta de cross, dey tek e cloes an wide um fo way, an ebry sodja tek a paat. Den dey tek e robe, wa been mek ob jes one piece ob closs fom top ta bottom, an ain hab no seam een um.
24De sodja dem tell one noda say, “Mus dohn teah de robe. Leh we shrow dice fa see who gwine git um.” Wen dis happen wa done been write een God Book come true. Dat say, “Dey done wide op me cloes mongst deysef, an dey shrow dice fa see who gwine git um.” So dat wa de sodja dem done.
25Close ta Jedus cross been some ooman da stan op dey. Dey been Jedus modda, e sista, an Mary wa been Clopas wife, an Mary Magdalene.
26Wen Jedus see e modda an de ciple wa e lob da stan op dey, e tell e modda say, “Ooman, look yah. Dis yah ya son.”
27Den e tell dat ciple say, “Look yah. Dis yah ya modda.” Fom den on, dat ciple tek Jedus modda fa lib een e own house.
Jedus Gii Op E Life
28Wen dat happen, Jedus know e done done all wa e spose fa do een dis wol. An e say, “A tirsty.” Wen e say dat, wa dey been write een God Book come true.
29A jug full op wid winega wine been dey, so dey soak a sponge een de wine an tie um ta a hyssop branch. Den dey pit de sponge op ta Jedus mout.
30Jedus tek de wine. Den e say, “A done done um!” An e pit e head down an e gii op e life.
Dey Jook Jedus een E Side
31Now den, e been de Preparation Day. De nex day been de Passoba Woshup Day. An de Jew head man dem ain wahn de man dem body fa stay pon dey cross pon dat Woshup Day. Cause dat day been a special big Woshup Day. So dey gone an aks Pilate fa leh de sodja dem broke de man dem leg an tek um down off ob dey cross.
32So de sodja dem gone ta de fus man wa been nail ta e cross an dey broke e leg. Den dey broke de oda man leg.
33Bot wen dey come ta Jedus, dey see e done dead, so dey ain broke e leg.
34Steada dat, one ob de sodja dem tek e speah an jook Jedus een e side. Dat mek blood an wata pour out ob Jedus body.
35(De man wa see dem ting yah happen, e tell all dis fa mek oona bleebe. An wa e say, e so. E know fa sho dat all wa e say done happen fa true.)
36All dis happen so dat wa done been write een God Book gwine come true. Dat say, “Dey ain gwine broke none ob e bone dem.”
37An dey write een noda place een God Book say, “Dey gwine look pon de one dey jook.”
Dey Pit Jedus Body een de Tomb
38Atta dat, Joseph wa come fom Arimathea gone an aks Pilate fa leh um tek way Jedus body. Pilate gree, so Joseph tek de body an gone. (Dis Joseph yah de man dat beena bleebe pon Jedus an folla um, bot e ain wahn fa leh oda people know dat, cause e been scaid ob de Jew head man dem.)
39Nicodemus gone long wid Joseph fa tek way Jedus body fom de cross. E tote spice wa dey call myrrh an aloes, mix tageda. Dat spice weigh bout a hundud poun. (An dat Nicodemus de man dat fus gone fa see Jedus one night.)
40De two man dem tek Jedus body way. Dey tek de spice an some piece ob linen closs an dey wrop op de body wid um, same like how de Jew people beena wrop op dead body wen dey gwine bury um.
41A gyaaden been dey een de place weh dey nail Jedus ta de cross. Eenside dat gyaaden dey been a nyew tomb weh dey ain neba bury nobody.
42Cause dat day been de Preparation Day fo de Jew Woshup Day an cause de tomb ain been faa way fom de cross, de two man pit Jedus body dey een dat tomb.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel