1A Jude, wa da wok fa Jedus Christ. A James Broda. A da write dis letta ta oona wa God call fa blongst ta um. God we Fada da lob oona, an Jedus Christ da keep oona safe.
2A pray dat oona gwine see God mussy ta oona mo an mo an dat e full op oona haat wid peace. An A pray, too, dat e show oona mo an mo ob e lob.
De Teacha Dem wa Ain Taak de Trute
3Me deah fren, A beena wahn real bad fa write oona bout de sabation dat God gii ta all ob we e people. Steada dat, A feel dat A haffa write now fa courage oona fa fight haad fa all wa we bleebe. Dat de fait wa God laan we, e people, an ain nobody eba spose fa change wa e laan we.
4A da tell oona dat, cause some people wa ain got God een dey haat beena come an jine een oona meetin. Dey ain tell oona hoccome dey da meet wid oona. Dey say people kin do all kind ob bad ting, cause God good an e ain gwine condemn um. Dey ton dey back pon Jedus Christ, we onliest Massa an Lawd. Way back dey, de prophet dem write een God Book say, God gwine condemn dem people yah.
5Now den, oona been know all dis fo, bot A wahn fa memba oona dat eben dough de Lawd done sabe de people ob Israel, an hep um git out ob Egypt lan, atta dat e stroy dem Israel people wa ain bleebe.
6An memba, too, bout de angel dem wa beena lef off da rule weh God pit um fa rule, an ton dey back pon dey own place een heaben. Cause ob dat, God done chain um op een ebalastin chain een a daak place weh e da keep um til dat big Day come wen e gwine jedge um.
7De same kind ob ting happen een Sodom an Gomorrah an de oda town dem close by. Dey beena lib free life, da do all kind ob dorty ting wid dey body. Cause ob dat, God punish dem people een fire wa da bun faeba. Dat da waan we all an show we how God gwine punish sinna.
8Same way so, dem yah mongst oona. Dey hab dream wa ain coddin ta de trute so dat dey lib free life, da tek dey own body fa do dorty ting. Dey da ton dey back pon all tority. An dey da taak bad ginst dem wa got powa an hona een heaben.
9Eben de head angel Michael ain taak like dey da taak. Wen e beena aagy wid de Debil bout wish one ob dem two gwine git Moses body, Michael ain tink e hab tority fa condemn de Debil. E ain hole um cheap eben wen e da tell um say wa e da do ain right. Steada dat, Michael tell um say, “A pray dat de Lawd buke ya!”
10Bot dem teacha yah wa ain taak de trute, dey da shrow slam at waeba dey ain ondastan. An de ting dem wa dey know, dey jes wa dey head tell um, dout dem haffa study pon dem ting, same like wile animal know um. Dem de ting wa stroy dem teacha yah.
11E gwine be a haad time fa dem teacha yah! Dey beena folla een de way ob Cain, Fa sake ob money, dey beena mek de same mistake wa Balaam mek. Jes like Korah, dey done ton ginst de one wa been oba um. An jes like Korah done been stroy, dey stroy too.
12Wen oona wa bleebe geda togeda fa nyam fa show oona lob ta one noda, look how dey da nyam de food. Dey ain got no shame, an dey ain eben tink ob oda people. Dey ain wot nottin! Dey like cloud wa kin daak jes like rain wahn fa come, bot dey ain no wata dey an breeze kin blow de cloud way dout no rain. Same way so, dey like tree wa ain beah no fruit, eben een de time wen dey spose fa beah. Dat show dat dem tree done dead, an wen people yank um out by de root, dey dead two time oba.
13Dem teacha yah da do ting wa oughta mek um shame. Like wen de big wile swellin wata faddown pon de seasho, de bad ting dem teacha do, stan like de frosh ob dat big wata wa done lef dorty gaabage pon de seasho. Dem teacha yah jes like shootin staa wa ain eba stay een one place een de sky. God beena keep a daak daak place fa pit dem teacha, an dey gwine stay dey faeba.
14Enoch done been taak long go bout dem teacha yah wa ain taak de trute. Dat de Enoch wa da numba de seben generation fom Adam. An e taak bout dem teacha say, “Look yeh! De Lawd da come wid tousan tousan ob dem wa blongst ta um.
15De Lawd da come fa jedge all people. E gwine condemn all de sinna dem wa ain do wa God wahn, say dey guilty cause ob all de ebil ting ginst God dey done done an all de mean bad wod dey done taak ginst God!”
16Dem teacha yah wa ain taak de trute, dey ain neba sattify. Dey da grumble all de time an mek complaint ginst oda people. Dey jes da folla dey own haat fa do ebil, an dey da brag pon deysef. An dem teacha da tell people ting wa mek um git de big head, jes so dem teacha kin git wa dey wahn.
Mus Memba wa de Postle Dem Beena Tell Oona
17Bot oona, me deah fren, oona mus memba wa de postle dem ob we Lawd Jedus Christ beena tell oona bout wa gwine happen.
18Dey beena tell oona say, “Wen dem las day come, some people gwine hole oona cheap an dey jes gwine folla dey haat fa do de wickity ting dem wa ginst God.”
19Dem de teach yah wa ain taak de trute, wa de mek oona wide op een group dem, ginst one noda. Dey jes da do bad ting wa dey head tell um, dout study pon dem ting. An de Holy Sperit ain een um.
20Bot oona, me deah fren, oona mus keep on da grow scronga mo an mo een oona holy fait een Christ. An mus pray ta God wid de powa wa de Holy Sperit da gii oona.
21Mus keep on da waak een de way ob God lob. Same time, wait fa de life wa ain neba end, wa we Lawd Jedus Christ gwine gii oona, cause e hab mussy pon oona.
22Hab mussy pon people wa da doubt.
23Sabe some, jes like oona beena pull um outta de fire. Mus hab mussy too an hep oda dem, same time oona oughta be scared fa git close ta dey sin. Oona oughta hate eben de cloes wa dem people beena weah, wa de ebil free life beena lib, done stain.
Praise ta God fa E Powa fa Sabe We
24So den, leh we praise de one wa able fa keep oona fom fallin eenta sin. E able fa keep oona so dat oona ain guilty ob no sin tall een oona life, wen e da bring oona wid joyful haat ta de glory place weh E dey.
25Leh we praise de one an only God wa sabe we cause ob wa Jedus Christ we Lawd done done. Leh we all praise God fa e great glory. E da rule ebryweh an e got powa an tority fa true, fom fo time been, an now, an faeba an eba! Amen.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel