1(38-1) Masmur anggitané Dawud nalika nyaosaké kurban minangka pèngetan. (38-2) Dhuh Allah, kawula mugi sampun ngantos Paduka ukum karana duka, lan sampun ngantos Paduka gebagi margi saking bentèring penggalih Paduka.
2(38-3) Déné jemparing Paduka sampun natoni badan kawula ngantos tembus, badan kawula sampun bosok awit saking dosa kawula.
3(38-4) Margi saking paukuman Paduka badan kawula sekojur mboten wonten ingkang saras, balung kawula mboten wonten ingkang wetah margi saking dosa kawula.
4(38-5) Piawon kawula sampun nempuh kawula, mlenet dhateng kawula kados momotan ingkang kawraten kanggénipun kawula.
5(38-6) Korèng-korèng kawula bosok mila mambet, margi saking keblinger kawula.
6(38-7) Saben dinten kawula nandhang sisah, lampah kawula mbungkuk kalayan temungkul.
7(38-8) Margi bangkèkan kawula abuh sedaya, daging kawula mboten wonten ingkang wetah.
8(38-9) Kawula ketelasen daya kekiyatan lan ajur mumur; kawula semplah sarta manah kawula trataban.
9(38-10) Dhuh Allah, Paduka pirsa menapa ingkang kawula kajengaken sedaya, mekaten ugi ingkang ngawrataken manah kawula inggih mboten kaling-kalingan wonten ing ngarsa Paduka.
10(38-11) Manah kawula trataban, kekiyatan kawula telas, dalah cahyaning mripat kawula ical.
11(38-12) Mitra lan kanca-kanca kawula sami nebih margi sesakit kawula, sanak sedhèrèk kawula sami nyingkiri kawula.
12(38-13) Tiyang-tiyang ingkang kepéngin mejahi kawula, sami masang kala-jiret, ingkang ngangkah cilaka kawula, sami rembagan badhé ngrisak kawula, saha tansah sami ngrancang masang kala-jiret.
13(38-14) Nanging kawula menika kados tiyang budheg, ingkang mboten mireng, kados tiyang bisu ingkang mboten saged gineman.
14(38-15) Inggih kados tiyang ingkang mboten mireng lan mboten saged mangsuli.
15(38-16) Sebab namung Paduka, dhuh Allah, ingkang kawula ajeng-ajeng. Paduka ingkang badhé paring wangsulan, dhuh Pangéran, Allah kawula.
16(38-17) Mila atur kawula, "Tiyang-tiyang menika mugi sampun ngantos sami bingah ing ngatasipun kawula; sampun ngantos sami umuk samasa suku kawula nggloyor!"
17(38-18) Sebab kawula sampun badhé dhawah, lan sesakit kawula mboten mantun-mantun.
18(38-19) Inggih, kawula ngakeni kalepatan kawula, ngantos semplah ngraosaken dosa kawula.
19(38-20) Cacahipun satru kawula kathah sanget, mboten sekedhik tiyang ingkang sami sengit dhateng kawula tanpa sebab.
20(38-21) Kesaénan kawula dipun wales srana piawon, enggènipun nyatru kawula margi kawula ngudi dhateng kesaénan.
21(38-22) Dhuh Pangéran, Allah kawula, mugi sampun négakaken kawula, mugi sampun nebihi kawula!
22(38-23) Dhuh Allah, mugi kersa énggal mitulungi kawula. Dhuh Pangéran, Juru Wilujeng kawula.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan