Kerna pangan si ipersembahken man berhala
1Genduari kerna pangan si ipersembahken man berhala. Tuhu me bagi si ikataken kalak maka "kerina kita erpemeteh". Amin bage gia, pemeteh erbahanca kalak meganjang ukur, tapi kekelengen pehuliken kap.
2Kalak si erpengakap maka i bas ia lit pemeteh, si tuhuna labo lit i bas ia pemeteh si arusna kin ietehna.
3Tapi kalak si erkeleng ate man Dibata itandai Dibata kap ia.
4Kerna pangan si ipersembahken man berhala; bagi si ikatakenndu, "Sieteh maka berhala-berhala si tuhuna kal labo lit i doni enda." Sieteh ka pe maka, "La lit Dibata seakatan Dibata si Sada e."
5Aminna lit gia igelari dibata-dibata, subuk i langit bage pe i doni enda, janah aminna melala pe "dibata-dibata" dingen "tuhan-tuhan" e.
6Tapi man banta sada ngenca Dibata, eme Bapanta. I bas Ia nari me rehna kerina si nasa lit, janah kempak Ia me pe perlawesta. Janah sada ngenca Tuhan, eme Jesus Kristus. Arah Ia me kerina si nasa lit ijadiken, dingen arah Ia kita nggeluh.
7Tapi labo kerina kalak meteh kerna si enda. Lit kalak si gelgel e biasa erbahan persembahen man berhala; emaka seh i bas paksa si genduari enda pe adi ipanna pangan si nggo ipersembahken man berhala e, iakapna maka pangan e tuhu-tuhu nggo berhalaan. Janah erkiteken ukurna la tetap, pusuh peratenna ngataken maka ia nggo melket.
8Si tuhuna pangan labo maba kita reh deherna ras Dibata. Bicara la pe sipan labo lit ruginta; bicara sipan pe labo lit untungta.
9Tapi metengetlah, gelah ula min kebebasanndu e erbahanca maka guling kalak si merampek kinitekenna.
10Sabap adi kalak si bage ngidah kam "si erpemeteh" man i bas ingan berhala, ma kin si enda erbahanca reh pangna ia man pangan si iakapna berhalaan?
11Alu bage kalak si merampek kinitekenna bene erdandanken "pemetehndu" e, sedangken Kristus mate man guna seninandu si bage.
12I bas si enda erdosa kam man Kristus alu erbahan dosa man seninandu e, sabap ilukaindu pusuh peratenna.
13Emaka adi pangan kin erbahanca seninangku erdosa, asa ndigan pe lanai kupan pangan e, aminna pe e daging, gelah seninangku e ula ndabuh ku bas dosa arah pengelakongku.
<< 1 Korintus 8 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel