Batu si nggeluh ras Bangsa si Badia
1Erkitekiteken si e tadingkenlah kerina si jahat; ulanai erbual, ntah pekulah-kulah, ntah ercian ate, ntah pe cekurak.
2Bagi anak-anak si mbaru tubuh min kam, si rusur muas nandangi susu pertendin si la lit campurna, gelah alu nginem susu e reh belinna kam dingen selamat.
3Bagi lit tersurat i bas Pustaka Si Badia, "Nggo inanamindu kap uga ulina Tuhan e."
4Dahilah Tuhan, batu si nggeluh si itulak ras si la iergaken manusia, tapi ipilih dingen iergaken Dibata.
5Rehlah kam bagi batu-batu si nggeluh janah berelah min dirindu ipake guna majekken rumah pertoton kesah. I bas ingan e me kam erdahin jadi imam-imam si badia, guna mpersembahken man Dibata persembahen pertendin si ngena ate Dibata erkelang-kelangken Jesus Kristus.
6Sabap lit tersurat i bas Pustaka Si Badia, "Nggo kupilih sada batu si meherga, si kutamaken i Sion jadi batu palas, janah ise si tek man BaNa, la ndigan pe kecewa."
7Batu enda meherga kal man bandu, kam si tek. Tapi man kalak si la tek, "Batu si iambekken tukang e, kepeken e me batu si si jadi palas."
8Bage pe lit tersurat i bas Pustaka Si Badia, "Enda me batu si erbahanca pagi kalak tertuktuk, batu si erbahanca kalak jongkang." Tertuktuk ia perbahan la ia tek kata e. Bage me kap peraten Dibata man bana.
9Tapi kam e me bangsa pilihen, imam-imam Raja, bangsa sikerajangen Dibata, anak-anak Dibata si ipilih guna meritaken perbahanen-perbahanen Dibata si mbelin. Dibata nggo ndilo kam ndarat i bas si gelap nari ku bas TerangNa si lanai kal langlang ulina.
10Nai kam labo anak-anak Dibata, tapi genduari kam nggo jadi anak-AnakNa. Nai la ietehndu perkuah ate Dibata, tapi genduari nggo ialokenndu perkuah AteNa.
Suruh-suruhen
11O teman-temanku si kesilang ras mengongsi i bas doni enda, kupindo alu mesangat man bandu gelah ula ikutkenndu kinigiten daging si rusur erperang ras tendi.
12Mehulilah min lagu langkahndu i tengah-tengah kalak si langa nandai Dibata, gelah adi ikatakennandu kalak jahat, idahna perbahanenndu si mehuli, emaka erkiteken si e ipujina Dibata i bas wari KerehenNa ku tengah-tengah kegeluhen kalak e.
13Erkiteken Tuhan, patuhlah kam nandangi kerina pemerentah i doni enda subuk nandangi raja, pemerentah si meganjangna,
14bage pe man gubernur-gubernur si itugasken raja guna ngukum kalak si erbahan jahat ras muji kalak si erbahan mehuli.
15Sabap sura-sura Dibata e me kap gelah arah perbahanenndu si mehuli ipesinikndu kalak bodoh si luam cakapna.
16Nggeluhlah bagi kalak bebas; tapi ula bahan kebebasenndu nutupi si jahat, tapi nggeluhlah bagi budak Dibata.
17Mehamatlah man kerina manusia, kelengilah temanndu si sada kiniteken, erkemalangenlah man Dibata, janah mehamatlah man raja.
Kiniseran Kristus jadi usihen
18Kam budak-budak arus patuh nandangi tuanndu, janah cidahkenlah maka tuhu-tuhu kam mehamat man bana, labo saja man tuan si mehuli dingen si ngangka ukurndu, tapi pe man tuan si kejam.
19Ipasu-pasu Dibata me kam erkite-kiteken si enda, adi megenggeng kam i bas kiniseran si la patut ialokenndu, sabap ietehndu kai si ngena ate Dibata.
20Sabap kai kin si man pujinken adi igengkenndu gia parap-parap si patut ialokenndu erkiteken kam nggo erbahan salah? Tapi adi megenggeng kam i bas kiniseran aminna pe mehuli perbahanenndu, ipasu-pasu Dibata me kam erkiteken si e.
21Guna si enda me kam idilo Dibata; sabap Kristus jine pe nggo ngenanami kiniseran man gunandu, janah ItadingkenNa sada usihen si man usihenndu, gelah iikutkenndu DalanNa.
22Ia la erdosa. Ise pe la nggo megi kata si la tuhu i bas BiberNa nari.
23Asum Ia igombang-gombangi kalak, la IbalasNa alu kata megombang. Janah asum Ia ngenanami kiniseran, la IlawanNa kalak, tapi erpengendes Ia man Dibata, Hakim si bujur.
24Kristus jine nggo ngangkut dosa-dosanta i bas KulaNa i kayu persilang, gelah kita mate nandangi dosa, jenari nggeluh nandangi si ngena ate Dibata. Erdandanken LukaNa, kam nggo ipepalem.
25Nai kam bagi biri-biri si nggo papak, tapi genduari kam nggo ibaba mulihken guna ngikutken Permakan Singkawali tendindu e.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel