Alkitab Mobile SABDA
[VER] : [KARO]     [PL]  [PB] 
 <<  1 Raja-raja 8 >> 

Peti Perpadanen ibaba ku Rumah Pertoton (2Taw 5:2-6:2)

1Kenca bage isuruh Raja Salomo kerina peminpin suku ras terpuk kalak Israel reh ndahi ia i Jerusalem gelah Peti Perpadanen TUHAN ibaba i Sion, Kota Daud nari, ku Rumah Pertoton e.

2Kerina ia pulung tupung Wari Raya Kemah i bas bulan Etanim.

3Kenca nggo pulung kerina pertua-pertua e, iangkat imam-imam me Peti Perpadanen e,

4jenari ibaba ku Rumah Pertoton. Kemah Perjumpan ras TUHAN pe ibaba kalak Lewi ras imam-imam ku Rumah Pertoton, rikut ras kerina alat-alatna.

5Raja Salomo ras kerina bangsa Israel pulung i lebe-lebe Peti Perpadanen janah ipersembahkenna mbue biri-biri ras lembu, la terbeligai perban buena.

6Kenca bage ibaba imam-imam Peti Perpadanen e ku Rumah Pertoton jenari itamakenna i bas Ingan si Badiana kal, i teruh mahluk-mahluk si erkabeng.

7Kabengna si ikirbangkenna nutupi Peti e ras lanja-lanjana.

8Ujung lanja-lanjana e banci ise pe ngidahsa adi ia tedis rembang i lebe-lebe Ingan si Badiana kal, tapi adi i bas ingan si deban nari la teridah. (Lanja-lanja e sendah pe i je denga.)

9Kai pe la lit i bas Peti Perpadanen e seyakaten papan batu si dua lambar si itamaken Musa ku bas i Deleng Sinai, asum TUHAN erbahan perpadanen ras bangsa Israel sanga ia ndarat i Mesir nari.

10Bage itadingken imam-imam Rumah Pertoton e, rempet reh embun ndemisa,

11ersinalsal alu terang si mesilo tanda kerehen TUHAN, janah lanai ngasup imam-imam e mulihken ku bas ndahiken dahinna.

12Kenca bage ertoto Salomo nina, "O TUHAN, nggo ItamakenNdu matawari i langit, tapi nggo IpilihNdu InganNdu i bas embun ras i bas ingan si gelap.

13Genduari nggo kupajekken sada rumah man BaNdu, jadi InganNdu seh rasa lalap."

Pidato Raja Salomo man bangsa Israel (2Taw 6:3-11)

14Sanga bangsa e tedis i je erkusur Raja Salomo ngalakenca, jenari ipindona pemasu-masu Dibata man bangsa e.

15Nina, "Terpujilah TUHAN, Dibata Israel! Nggo IsehkenNa padan si nggo IbahanNa man bapangku Daud, asum IkatakenNa,

16'Mulai Aku maba bangsangKu ndarat i Mesir nari, langa lit sada kota pe Kupilih i belang-belang taneh Israel man ingan majekken Rumah Pertoton i ja Aku isembah. Tapi nggo Kupilih kam, Daud, guna ngerajai bangsangKu.'"

17Nina Salomo tole, "Bapangku Daud ersura-sura majekken Rumah Pertoton man TUHAN, Dibata Israel,

18tapi nina TUHAN, 'Mehuli nge kuakap min sura-surandu man bangKu,

19tapi labo kam si majekkenca. Tapi anakndu, anak ipupusndu jine nge si majekken Rumah PertotonKu.'

20Janah genduari nggo isehken TUHAN PadanNa. Nggo kugantiken bapangku jadi raja Israel, janah nggo kupajekken Rumah Pertoton guna ingan ersembah man TUHAN, Dibata Israel.

21Tole nggo kusikapken sada ingan i bas Rumah Pertoton e guna Peti Perpadanen isina papan batu perpadanen si ibahan TUHAN ras nini-nininta sanga ItaruhkenNa ndarat i Mesir nari."

Pertoton Salomo (2Taw 6:12-42)

22Kenca bage, i lebe-lebe bangsa e kerina lawes Salomo tedis ku lebe-lebe batar-batar. I je iangkatna tanna

23ertoto ia, "TUHAN, Dibata Israel, la lit dibata si bagi Kam subuk i langit i das, ntah pe i doni i teruh! IsehkenNdu PadanNdu man BangsaNdu janah IcidahkenNdu KekelengenNdu asum ia nggeluh ngikutken KataNdu alu bulat ukurna.

24Nggo IsehkenNdu padan si IbahanNdu man bapangku Daud, sendah tiap perkatan nggo IsehkenNdu.

25Janah genduari, TUHAN, Dibata Israel, ertoto aku gelah IsehkenNdu ka pe padan si deban si IbahanNdu man bapangku asum IkatakenNdu man bana maka tetap lit sekalak i bas kesusurenna nari erkuasa jadi raja Israel, adi alu tutus ikutkenna KataNdu bagi si ibahan bapangku.

26Emaka genduari, O Dibata Israel, berelah maka jadi kerina si nggo IpadankenNdu man bapangku Daud, suruh-SuruhenNdu.

27Tapi O Dibata, tuhu banci kin Kam ringan i doni enda? Kerina langit pe kitiksa man InganNdu, emaka uga nge ndia maka banci siat kam ringan i bas Rumah Pertoton si kupajekken enda?

28TUHAN, Dibatangku, aku kap suruh-SuruhenNdu. Begikenlah pertotonku, janah berelah pemindon si ku sehken man bandu sendah.

29Nehenlah Rumah Pertoton enda suari ras berngi ingan si nggo IpilihNdu man ingan ersembah. Begikenlah aku asum ngala ku Rumah Pertoton enda janah ertoto.

30Begikenlah pertotonku ras pertoton BangsaNdu sanga ia ngala ku ingan enda janah ertoto. I bas RumahNdu i Surga begiken min kami janah alemilah kami.

31Adi lit kalak si ituduh erbahan kesalahen man kalak si deban jenari ibaba ku batar-batarndu i bas Rumah Pertoton enda guna ngangkat sumpah maka ia la ersalah.

32O TUHAN, begikenlah i Surga nari janah bahanlah bagi bujur man suruh-SuruhenNdu kerina. Ukumlah kalak si ersalah sue ras kesalahenna janah benarkenlah kalak si bujur.

33Adi BangsaNdu Israel italuken musuh-musuhna erkite-kiteken erdosa man BaNdu, janah adi kenca si e erkusur ia mulihken man BaNdu jenari reh ia ku Rumah Pertoton enda, alu merendeh mindo pengalemi dosa i bas Kam nari,

34begikenlah ia i Surga nari. Alemilah salah BangsaNdu, janah taruhkenlah mulihken ku taneh si nggo IberekenNdu man nini-ninina.

35Adi udan lanai IbereNdu ndabuh ku teruh erkite-kiteken BangsaNdu erdosa man BaNdu, janah adi kenca si e jera ia jenari ngala kempak Rumah Pertoton enda, alu merendeh ertoto man BaNdu,

36begikenlah i Surga nari. Alemilah dosa-dosa raja ras dosa-dosa bangsa Israel. Ajarlah ia kerina erbahan kai si benar. Jenari O TUHAN, pesusurlah udan ku TanehNdu enda, taneh si nggo IberekenNdu man BangsaNdu jadi sikerajangenna.

37Adi lit kelihen i taneh enda, ntah adi reh penakit ngkenai nterem jelma, ntah ulih juma icedaken angin si melas ntah labang si mbue, ntah adi BangsaNdu iserang musuh-musuhna, ntah adi lit penakit kai gia i tengah-tengahna,

38begikenlah pertotonna. Adi apai gia i bas bangsandu nari erkite-kiteken tergejap i bas ia ate ceda, iangkatna tanna kempak Rumah Pertoton enda ertoto,

39begikenlah pertotonna. Begikenlah ia i bas RumahNdu i Surga, alemilah ia, jenari sampatilah. Kam ngenca metehsa perukuren si lit i bas pusuh manusia. Bahan Kamlah man tiap jelma bagi patutna,

40gelah BangsaNdu banci ngikutken Kam i bas gedang-gedang geluhna i bas taneh si nggo IberekenNdu man nini-nini kami.

41Adi lit bangsa si deban ringan i bas taneh si ndauh megi berita kerna KemulianNdu ras perbahanen-PerbahanenNdu, jenari reh nembah man BaNdu janah ertoto i bas Rumah Pertoton enda,

42(1Raj 8:41)

43begikenlah pertotonna i Surga, i ja Kam ringan. Begikenlah ia janah bahanlah man bana bagi si ipindona man BaNdu, gelah kerina bangsa i doni enda nandai Kam janah ngikutken Kam, bagi si ibahan BangsaNdu Israel. I je ietehna maka Rumah Pertoton si nggo kupajekken enda me ingan ersembah man BaNdu.

44Adi IperentahkenNdu BangsaNdu lawes erperang ngelawan musuh-musuhna jenari ertoto ia man BaNdu, janah ngala ia kempak kota si nggo IpilihNdu enda ras kempak Rumah Pertoton si nggo kupajekken man BaNdu enda,

45begikenlah ia i Surga, janah berekenlah man bana kemenangen.

46Adi erdosa BangsaNdu man BaNdu sabap la kap lit manusia si la erdosa, janah erkite-kiteken RawaNdu IpelepasNdu ia italuken musuh-musuhna jenari tertaban ia, ibaba musuhna ia ku taneh si deban, aminna ndauh gia taneh e,

47begikenlah pertoton BangsaNdu. Adi i bas taneh e jera ia jenari ertoto man BaNdu, janah ngaku ia maka nggo kepe ia erdosa ras erbahan si jahat kidekah enda, begikenlah pertotonna, O, TUHAN.

48Adi i bas taneh e tuhu dingen alu ate tutus robah ia, jenari ertoto ia man BaNdu asum ia ngala kempak taneh enda si nggo IberekenNdu man nini-nini kami, ku kota si nggo IpilihNdu enda, ras Rumah Pertoton si nggo ku pajekken man BaNdu enda,

49adi bage begikenlah pertotonna kerina. IrumahNdu i Surga begikenlah ia janah mekuah min AteNdu man bana kerina.

50Alemilah kerina dosana ras pemberontakenna man BaNdu, janah bahanlah maka mehuli perbahanen musuh-musuhna man bana.

51BangsaNdu jine kap ia, si nggo IbabaNdu ndarat i Mesir nari, ginuhur si melas e.

52O TUHAN si Erkuasa, TatapNdu min rusur alu ate keleng BangsaNdu Israel ras rajana, janah begikenlah pertotonna adi ia erlebuh man BaNdu mindo penampat.

53I bas kerina bangsa-bangsa nari IpilihNdu ia jadi bangsa SikerajangenNdu, bagi si nggo IkatakenNdu man bana arah suruh-SuruhenNdu Musa asum IbabaNdu nini-nini kami ndarat i Mesir nari."

Pertoton Pendungi

54Kenca Salomo dung ertoto man TUHAN, tedis ia i lebe-lebe batar-batar, i je ndube nari ia erjimpuh dingen ngangkat tanna ku das.

55Alu sora megang ipindona pemasu-masum Dibata man kerina bangsa e si pulung i je. Nina,

56"Pujin man TUHAN si nggo mereken dame man BangsaNa sue ras si nggo IpadankenNa. Nggo IsehkenNa kerina padan si mehuli si nggo IbahanNa arah suruh-SuruhenNa si Musa.

57TUHAN Dibata ras kita gelah, bagi nai ia ras nini-nininta; rasa lalap kita ItemaniNa, la kita ItadingkenNa;

58Ialah si erbahanca maka kita patuh man BaNa, gelah tetap si geluhken geluhta sue ras sura-SuraNa, dingen nehken kerina Undang-undang ras pedah si nggo IberekenNa man nini-nininta.

59Iinget TUHAN Dibatantalah pertoton enda ras kerina pemindonku man BaNa. Mekuahlah AteNa rusur man bangsa Israel ras man rajana, sue ras keperlunna kerina tep-tep wari.

60Janah erkite-kiteken si e kerina bangsa i doni meteh maka TUHAN ngenca Dibata, la lit si deban.

61O kam BangsaNa, tetaplah bulat ukurndu man TUHAN, Dibatanta, dingen ngikutken kerina Undang-undang ras PedahNa, bagi ibahanndu sendah."

Mengket Rumah Pertoton (2Taw 7:4-10)

62Kenca bage Raja Salomo ras kerina bangsa e si i je erbahan Persembahen gelehen man TUHAN,

63mpersembahken 22.000 lembu ras 120.000 biri-biri jadi persembahen pengalemi dosa. Bage me raja ras kerina bangsa e mengket ras mpersembahken Rumah Pertoton e.

64I bas wari e pe ipebadiaken raja bagin si i tengah-tengah kesain, si i lebe-lebe Rumah Pertoton e, janah kenca e ipersembahkenna i je persembahen-persembahen gelehen si itutung bulat-bulat, persembahen buah gandum ras tabeh-tabeh rubia-rubia guna persembahen pengalemi dosa. Enda ibahanna erkite-kiteken batar-batar tembaga e kitiksa man ingan kerina persembahen e.

65I bas Rumah Pertoton e, Salomo ras kerina bangsa Israel ngerayaken Wari Raya Kemah pitu wari dekahna. Nterem kal jelma si reh i bas ingan si ndauh nari, seh ku dalan Hamat i Utara ras ku perbalengen Mesir i Selatan.

66I bas wari si pewaluhken isuruh Salomo bangsa e mulih. Kerina kalak mujiken raja janah mulih alu ukur meriah erkite-kiteken kerina si mehuli si nggo ibereken TUHAN man suruh-SuruhenNa Daud ras man Israel, BangsaNa.



 <<  1 Raja-raja 8 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel