Daud la nggit munuh Saul
1Kenca Saul mulih merang bangsa Pilisti, iberitaken man bana maka Daud sangana i taneh mesawang deherken Enggedi.
2Ibuat Saul 3.000 kalak tentera si mbisana i Israel jenari lawes ia ndarami Daud ras teman-temanna arah Timur Batu Kambing Kerangen.
3Seh ia ku sada gua si ndeher ras piga-piga karang biri-biri i tepi dalan, janah ku bas pekesahken. Gua ndai rembang kal ingan cebuni Daud ras temanna, tapi ndauh ku bas.
4Nina teman-teman Daud man bana, "Enda sada kesempaten man bandu! Nggo ikataken TUHAN maka itamakenna musuhndu i bas kuasandu janah banci ibahanndu man bana bagi atendu." Nggarang Daud ku je jenari ikeretna sada bagin i jubah Saul alu la ieteh Saul.
5Tapi kenca si e pusuh Daud mulai debet-debet,
6jenari nina man temanna, "TUHANlah si ngolangi aku ngelakoken si jahat man tuanku, si ipilih TUHAN jadi raja! Sitik pe la banci ia kusakiti sabap ia me raja si ipilih TUHAN!"
7Alu kata e iendik-endik Daud temanna maka la patut isehkenna tanna munuh Saul. Kenca keke Saul itadingkenna gua ndai, janah imulaina ka perdalanenna.
8Jenari ndarat ka Daud arah pudina janah ilebuhna Saul nina, "O Raja!" Erkusur Saul, jenari mungkuk Daud seh ku taneh nuduhken kehamatenna,
9nina, "Ngkai maka ibegikenndu kata kalak si ngataken maka kudarami dalan nehken si jahat man bandu?
10Kam pe banci idahndu, maka genduari pe i bas gua enda, TUHAN nggo namaken kam i bas kuasangku. Piga-piga kalak i bas temanku nari nuruh aku munuh kam, tapi mekuah ateku ngenehen kam jenari ningku maka la ateku nakiti kam sitik pe; sabap kam me kap ipilih TUHAN jadi raja.
11Nehenlah o Bapa, nehenlah bagin jubahndu si kujemak enda! Situhuna nggo banci kam kubunuh, tapi enda saja ngenca ku potong. Alu enda aturenna nggo kam tek maka la lit sitik pe ukurku ngelawan kam ntah pe erbahan si jahat man bandu. Idaramindu aku gelah banci aku ibunuhndu, aminna gia la lit kai pe salahku man bandu.
12TUHANlah si mutuskenca apai i bas kita si salah! Ialah si ngukum kam erkite-kiteken perbahanenndu man bangku, sabap la ateku nehken si jahat man bandu sitik pe.
13Ietehndu kuan-kuan si dekah, 'Kalak si jahat ngenca erbahan kejahaten.' Emaka la ateku nehken si jahat man bandu.
14Nehenlah kai kin si ibunuh raja Israel atena e? Kai kin siayak-ayakna e? Sada biang mate-mate, sada kutu biang!
15TUHANlah pagi si ngadilisa, janah Ialah pagi si mutuskenca apai i bas kita si salah. Ialah si mperdiateken perkara enda, si ngkapiti aku, ras si mulahi aku i bas tanndu nari."
16Kenca nggo dung Daud ngerana nina Saul, "Tuhu kin kam e Daud, o anakku?" Jenari mulai ia tangis.
17Kenca bage ikatakenna man Daud, "Kam nge si benar, janah aku si salah. Mehuli ibahanndu man bangku, tapi bage salahna kubahan man bandu!
18Sendah nggo icidahkenndu uga ulina kam man bangku sabap la ibunuhndu aku, aminna gia itamaken TUHAN aku i bas kuasandu.
19Pernah kin kalak nangkap musuhna janah kenca e ipulahina la kena kai pe? TUHAN si masu-masu kam kerna kai si ibahanndu man bangku sendah!
20Genduari nggo aku tek maka kam me pagi jadi raja Israel janah kerajan e tetap nggeluh i teruh kuasandu.
21Tapi ersumpahlah min kam man bangku i bas gelar TUHAN maka ipelepasndu kesusurenku nggeluh, gelah alu bage gelarku ras gelar keluargangku la masap, sitik pe lanai inget kalak."
22Emaka ersumpah Daud nehken pemindon Saul. Kenca bage mulih Saul ku rumahna, janah Daud ras temanna lawes ku bas inganna cebuni.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel