Alkitab Mobile SABDA
[VER] : [KARO]     [PL]  [PB] 
 <<  1 Tesalonika 5 >> 

Ersikaplah nandangi kerehen Tuhan

1O senina-senina, la perlu isuratken kami man bandu kerna ndigan tah katawari si enda jadi.

2Sabap kam pe tangkas ietehndu maka Wari Tuhan e reh bagi penangko si reh asum berngi.

3Asum ikataken kalak, "Kerinana tenang dingen aman," paksa si e me reh rempet si ngkernepken ia! Kiniseran e rempet reh bagi suina iakap diberu si nandangi mupus. Emaka lanai terkiamkenca.

4Tapi kam, o senina-senina, labo kam i bas gelap, janah wari e pagi labo min aturenna kam sengget ibahanna bagi si ibahan penangko.

5Kerina kam anak-anak terang dingen anak-anak suari. Asalta labo i bas berngi ntah pe i bas gelap nari.

6Emaka la kita patut tunduh bagi kalak si deban. Kita arus metenget dingen jore ukurta.

7Berngi nge kalak tunduh; berngi nge kalak mabuk.

8Tapi kita sikerajangen suari kap; arus maka jore ukurta. Arus sipake kiniteken ras keleng ate jadi ampang-ampang tententa, janah pengarapenta guna selamat e me jadi tengkulukta.

9Kita ipilih Dibata labo gelah si nanami ukumen si reh i bas Ia nari, tapi gelah sialoken keselamaten arah Tuhanta Jesus Kristus,

10si nggo mate man gunanta gelah banci kita nggeluh ersada ras Ia, subuk kita nggeluh denga ntah nggo mate asum Ia reh pagi.

11Erkiteken si e sitatang-tatangenlah janah sisampat-sampatenlah kam bagi si sangana ibahan kam genduari e.

Pedah si perpudi ras salam

12O senina-senina, ipindoken kami man bandu gelah ipehagandulah kalak si erdahin i tengah-tengahndu, e me kalak si nggo ipilih Tuhan guna ngepkep dingen ngajari kam.

13Pehaga kal dingen kelengilah ia, erdandanken dahin si idahikenna. Ula kam si rubat-rubat.

14Ipindoken kami man bandu o senina-senina: Ajarkenlah kalak si perkisat, tetapkenlah ukur kalak si perbiar, sampatilah kalak si kote janah sabarlah kam nandangi ise pe.

15Metengetlah gelah ula lit si erbalas alu kesalahen nandangi kalak si erbahan salah, tapi bahanlah si mehuli nandangi teman bage pe nandangi kerina manusia.

16Meriahlah atendu katawari pe.

17Ertotolah katawari pe,

18janah katakenlah bujur man Dibata i bas si kugapana pe. Enda me si ngena ate Dibata ibahanndu i bas geluhndu selaku kam kalak si nggo ersada ras Kristus Jesus.

19Ula ambati pendahin Kesah Si Badia.

20Ula kam anggap enteng nandangi berita kerna sura-sura Dibata.

21Kai pe ujilah lebe; cikep si mehuli,

22silahken kerina si jahat.

23Dibata, si mereken kemalemen ate man banta, erbahanca kam badia i bas kai pe; janah Ia si engkawali kam, kesahndu, tendindu ras kulandu bersih i bas kesalahen nari asum kerehen Tuhanta Jesus Kristus pagi.

24Dibata si ndilo kam e setia kap, janah Ia si erbahanca maka si enda banci jadi.

25Ertotolah kerna kami pe o senina-senina.

26Sisalam-salamenlah kam alu dem keleng ate bagi si ersenina.

27Kupindoken man bandu alu kuasa Tuhan: Ogekenlah surat enda man kerina senina-senina si nggo tek man Kristus.

28Lias ate Tuhan Jesus Kristus min nemani kam.



 <<  1 Tesalonika 5 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel