Kristus kap Penampatta
1O anakku, si enda kusuratken man bandu gelah ula ibahanndu dosa. Tapi adi lit kalak si erbahan dosa, lit kap kelang-kelangta mindo man Dibata, e me Jesus Kristus si ndalanken si bujur.
2Ia nanggung ukumenta erkiteken dosa-dosanta man Dibata, gelah kita iperdameken ras Dibata, janah labo dosanta saja, tapi pe dosa-dosa kerina manusia.
3Adi patuh kita ngikutken perentah Dibata tandana kita nandai Dibata.
4Adi lit kalak ngatakenca maka itandaina Dibata, tapi la ikutkenna PerentahNa, perbual kap ia, janah Kata si tuhu-tuhu i bas Dibata nari la lit i bas ia.
5Tapi ise si ngikutken Kata Dibata, ia me si ngkelengi Dibata alu sempurna. Alu enda si eteh maka kita nggo ersada ras Dibata.
6Kalak si ngataken maka ia nggeluh ersada ras Dibata, ia arus nggeluh bagi Jesus Kristus.
Perentah si mbaru
7O teman-temanku si kukelengi! Perentah si kusuratken man bandu enda labo perentah si mbaru, tapi perentah si ndekah nge si nggo ipeseh man bandu mula-mulana nari. Perentah si ndekah e me berita si nggo ialokenndu i bas Dibata nari.
8Amin bage gia, pedah si kusuratken enda banci ikataken pedah si mbaru, erkiteken perentah e nggo ialoken i bas Jesus Kristus bage pe i bas kam. Sabap kegelapen nggo bene, janah terang si tuhu-tuhu nggo ersinalsal.
9Kalak si ngataken maka ia nggeluh i bas terang, tapi nembeh atena seninana, situhuna ia i bas gelap denga nge seh paksa enda.
10Kalak si ngkelengi seninana, i bas terang kap ia nggeluh, janah i bas ia la lit si erbahanca kalak si deban ndabuh ku bas dosa.
11Tapi kalak si nembeh atena seninana, i bas gelap kap ia. Ia erdalan i bas gelap janah la ietehna ku ja ia lawes, sabap la ia erpengidah ibahan gelap e.
12O anakku, kusuratken enda man bandu, sabap dosandu nggo ialemi Dibata erkiteken Kristus.
13Kam orang tua, kusuratken enda man bandu, sabap itandaindu Ia si nggo lit ope denga kai pe lit. Man bandu kam si nguda denga, kusuratken enda sabap nggo italukenndu si jahat.
14O anak-anak si kitik denga, kusuratken enda man bandu, sabap itandaindu Bapa. Kusuratken enda man bandu orang tua, sabap itandaindu Ia si nggo lit ope denga tembe doni enda. Kusuratken enda man bandu kam si nguda denga, sabap kam megegeh; Kata Dibata nggeluh i bas kam janah nggo italukenndu si Jahat.
15Ula kelengi doni enda ntah pe kai si lit i bas doni enda. Sabap adi ikelengindu doni enda la ikelengindu Bapa.
16Kerina si lit i doni enda, si mengga ate kalak perdosa -- e me kai si idahna janah ngena atena seh maka man bana atena, ras kai si lit i doni enda si erbahanca meganjang ukur kalak; si e sada pe labo reh i bas Bapa nari, tapi i doni nari.
17Doni ras kerina isina masap kap pagi; tapi si ndalanken peraten Dibata nggeluh kap rasa lalap.
Musuh Kristus
18O, anak-anakku, wari pendungi nggo ndeher! Bagi nggo ikataken man bandu maka musuh-musuh Kristus reh me; bage me genduari nggo teridah melala musuh-musuh Kristus. Arah e sieteh maka wari pendungi e nggo ndeher.
19Kalak enda si tuhuna labo i bas persadanta, e me sabapna maka itadingkenna kita. Sabap adi tuhu-tuhu kin ia i bas persadanta, labo kita itadingkenna. Tapi ia nadingken kita gelah tangkas maka sekalak pe ia labo i bas persadanta nari.
20Tapi Kristus nggo mereken Kesah Si Badia man bandu, gelah kerina kam meteh Kata si tuhu-tuhu i bas Dibata nari.
21Dage kubahan surat enda man bandu, labo erdandanken la ietehndu ketuhu-tuhun e, tapi erdandanken ietehndu nge. Janah kam pe ietehndu maka i bas pengajaren si benar e, la terdat kata bual.
22Dage, ise kin si perbual e? E me kalak si ngataken maka Jesus e labo Raja Penampat si ipadanken Dibata. Ia me musuh Kristus; itulakna Bapa ras Anak e.
23Sabap kalak si nulak Anak e, itulakna pe Bapa e. Janah kalak si ngaloken Anak e, ialokenna pe Bapa e.
24Dage, berita si nggo ibegindu tangtangna nari arus maka tetap ibunikenndu alu mehuli i bas ukurndu. Sabap adi berita e tetap iperdiatekenndu alu mehuli, kam tetap nggeluh ersada ras Anak bage pe ras Bapa e.
25Janah enda me si ipadanken Kristus man banta, e me kegeluhen si tuhu-tuhu si la erkeri-kerin.
26Si kusuratken man bandu enda e me kerna kalak si sangana ersura-sura mabai kam papak.
27Tapi man bandu nggo ibereken Kristus KesahNa. Kidekah KesahNa e lit i bas kam, la perlu kalak ngajari kam. Sabap iajari KesahNa e me kam kerna kai pe, janah kai si IajarkenNa tuhu kap, labo salah. Dage, ikutkenlah pengajaren Kesah e, janah tetaplah kam ersada i bas persadan ras Kristus.
28O, anak-anakku, tetaplah kam i bas persadan ras Kristus, gelah katawari pe Ia reh, tetap ukurta dingen la perlu kita cebuni i bas Ia nari erkiteken mela siakap i bas Wari KerehenNa.
29Nggo itehndu maka Kristus nggeluh rikutken si ngena ate Dibata. Sabap e arus ka itehndu maka kasa kalak si nggeluh rikutken si ngena ate Dibata, ia me anak Dibata.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel