Alkitab Mobile SABDA
[VER] : [KARO]     [PL]  [PB] 
 <<  2 Korintus 1 >> 

1Surat enda i bas aku nari, Paulus, Rasul Kristus Jesus erpalasken peraten Dibata, ras i bas seninanta Timotius nari. Surat enda man perpulungen anak-anak Dibata i Korinti, ras man kerina kalak si iserapken jadi sikerajangen Dibata i belang-belang propinsi Akaya.

2Lias ate dingen kemalemen ate i bas Dibata Bapanta ras i bas Tuhan Jesus Kristus nari man bandu gelah.

Paulus ngataken bujur kenca kiniseran

3Bujur man Dibata, Bapa Tuhanta Jesus Kristus, Bapa si perkuah, Dibata sumbul kerina pengapul.

4Nggo iapulina kami i bas kerina kiniseran kami, gelah ngasup kami ngapuli kalak si lit i bas erbage-bage kiniseran. Si enda banci ilakoken kami erpalasken pengapul si ialoken kami i bas Dibata nari.

5Bali ras kiniseran Kristus sampur seh man kami, bage me pe sampur ka pengapul Dibata ialoken kami arah Kristus.

6Adi kami ngenanami kiniseran, si e guna ngapuli kam dingen guna keterkelinenndu kap. Adi kami iapuli Dibata, e pe erguna jadi pengapul man bandu, gelah e njadiken kam megenggeng adi inanamindu kiniseran bagi si inanami kami genduari e.

7Pengarapen kami kerna kam enteguh kap, sabap ieteh kami maka bagi kam ikut ngenanami kiniseran, bage pe ikut nge kam ngaloken pengapul.

8O senina-senina, la ate kami la ietehndu kerna kiniseran si inanami kami i Propinsi Asia. Kiniseran si nindih kami e, lebih asa si ngasup kami nggengkenca, seh maka lanai lit arapen kami nggeluh.

9Bage beratna, seh maka nggo iakap kami idabuhken ukumen mate man kami. Tapi si enda jadi gelah ula kami ernalem man diri kami, tapi man Dibata saja, si mpekeke kalak si nggo mate.

10Nggo IpulahiNa kami i bas erbage-bage ancamen kematen si ngeri nari, janah tetap nge kami IpulahiNa; nggo itamaken kami pengarapen kami man BaNa maka Ia ka nge tole si mulahi kami.

11Kam pe isampatindu ka kami alu pertoton. Alu bage, erkiteken nterem kalak ertoto guna kami, nterem ka pe kalak si ngataken bujur erkiteken kami, sabap Dibata nggo encidahken lias AteNa man kami.

Sabapna Paulus la surung ku Korinti

12Si erbahanca megah iakap kami eme: pusuh peraten kami naksiken maka i bas hubungen kami ras kalak si deban, terlebih-lebih ras kam, perbahanen kami tetap erpalasken kinibujuren ras ukur si bersih i adep-adepen Dibata. Si enda ilakoken kami labo erkiteken kepentaren kami selaku manusia, tapi erdandanken lias ate Dibata.

13Kai si isuratken kami man bandu eme si banci iogendu ras iantusindu saja nge ngenca. Tapi aminna pe langa payo kal kami itandaindu, ngarap aku maka kedungenna banci kami itandaindu alu serta, gelah bagi megahna iakap kami kerna kam, bage ka pe megahna iakapndu kerna kami i bas wari kerehen Tuhanta Jesus.

14(2Kor 1:13)

15Erkiteken tek aku maka mehuli kal ukurndu man bangku, emaka nggo suraken maka kam me lebe kudahi, gelah banci kam dua kali ndatken pasu-pasu.

16Sabap mbarenda ateku ndahi kam muat aku ku Makedoni bage pe kenca aku mulihi Makedoni nari, gelah ipeberkatndu aku ku Judea.

17Bali kin aku ras sanggar uruk-uruk erkiteken la sahun rencanangku e? Ntah percakap longgar kin iakapndu aku erbahan rencana? "Ue, ue," ningku tempa, tapi i bas ukurku "Lang, lang"?

18I bas gelar Dibata si setia, padan kami man bandu labo "Ue" tapi ngataken "Lang".

19Sabap Jesus Kristus Anak Dibata, si kuberitaken ras Silas bage pe Timotius man bandu, labo biakna "Ue" ras "Lang," tapi i bas Ia tetap nge "Ue".

20Sabap kerina padan-padan Dibata nggo "iueken" i bas Jesus. Erkiteken si eme maka arah Jesus sikataken "Amin," guna kemulian Dibata.

21Dibata sendiri jine si nggo mereken man kami ras man bandu ingan si nteguh i bas Kristus. Dibata me si nggo nangkuhken kita.

22Dingen si nggo encap kita, tandana kita nggo jadi SikerajangenNa, janah selaku panjarna nggo IberekenNa Kesah Si Badia ku bas pusuhta.

23Kulebuh Dibata jadi saksingku, ItandaiNa kap pusuhku. Maka la aku surung reh ku Korinti eme gelah ula kam kena ukumen.

24La ate kami engkuasai kinitekenndu; sabap ieteh kami maka tetap nge paguh pertedisndu i bas kiniteken. Tapi ras-ras kita erdahin guna keriahenndu.



 <<  2 Korintus 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel