Alkitab Mobile SABDA
[VER] : [KARO]     [PL]  [PB] 
 <<  2 Korintus 12 >> 

Ketangkasen ras pengenehenen si ialoken Paulus

1Aminna pe la lit gunana, la banci lang meganjang cakapku. Genduari kuturiken kerna pengenehenen ras ketangkasen i bas Tuhan nari.

2Lit kutandai sekalak Kristen; sepulu empat tahun si nggo lewat ia rempet iangkat ku adep-adepen Dibata i Surga. Ntah kulana ikut terangkat ntah lang, la kueteh -- Dibata metehsa.

3Sekali nari kukataken: kueteh maka ia rempet iangkat ku Pardis. (Ntah kin e jadi ikut ras kula ntah lang, la kueteh -- Dibata si metehsa.)

4I je ibegina kata-kata si la terbelasken, si la banci ibelasken manusia.

5Kerna kalak si bage me si ku megahken tapi kerna diringku jine gegehku si kurang nge cakapku meganjang.

6Bahanlah maka nggit aku meganjang ngerana; aku labo seri ras kalak si la sehsa, sabap si tuhu-tuhu nge si kukataken e. Tapi kutahan kal maka la meganjang cakapku, sabap la ateku ikira kalak aku lebih asa si iidahna i bas aku dingen si nggo ibegina i bas aku nari.

7Gelah ula meganjang ukurku kerna pengenehenen si mejin e, ibereken duri i bas dagingku, eme persuruhen Iblis guna ngeligas aku gelah ula meganjang ukurku.

8Telu kali aku ertoto man Tuhan kerna si enda, gelah ipedauhna min si e i bas aku nari.

9Tapi ngaloi Tuhan, "Cukup kap lias ateKu man bandu; sabap gegehKu serta kap i bas gegeh si kurang." Erkiteken si e meriah kal ukurku meganjang ngerana kerna gegehku si kurang gelah gegeh Kristus mengketi aku.

10Emaka senang kuakap i bas gegehku si kurang, i bas aku igombang-gombangi kalak, i bas aku kepiceten, bage pe i bas aku isiksa kalak, i bas kesusahen erdandanken Kristus. Sabap adi gegehku kurang, i je me maka aku megegeh.

Aru ate Paulus nandangi perpulungen Korinti

11Perbahanenku enda bali kal ras perbahanen kalak bodoh -- tapi kam nge si maksasa maka aku bage. Kam nge arusna mujiken aku. Sabap aminna gia labo kai pe aku, si tuhuna labo aku sitik pe ketadingen asangken rasul-rasulndu "si mbelin la teralang e".

12Tandana maka aku rasul tangkas kap teridah man bandu arah dahinku, eme: megenggeng aku i bas kai-kai pe, idahndu tanda-tanda sengget si kubahan, kulakoken perbahanen-perbahanen si ngelebihi kuasa manusia, bage pe perbahanen-perbahanen si mejin.

13I bas kai kin kam kurang kuperdiateken ibandingken ras perpulungen-perpulungen si deban, seakatan la aku jadi tanggungenndu? Mahapkenlah kesalahenku e.

14Enda me petelu kaliken aku nggo ersikap lako ndahi kam, janah i bas si e pe labo ateku aku jadi tanggungenndu. Labo sikerajangenndu, tapi kam kap ateku. Sabap labo metunggung anak-anak pepulung erta guna orang tuana, tapi orang tua nge si pepulung erta guna anakna.

15Senang ukurku engkeriken si lit i bas aku, janah lebih asa si e, diringku jine pe nggit aku engkorbankenca guna kam. Reh kurangna kin kekelengenndu man bangku adi sampur kekelengenku man bandu?

16Tentu iakuindu nge maka labo pernah kam kuberati. Tapi lit ka nge si ngatakenca maka kusidingi kam alu tipu ras akalku.

17Kuga kin? Pernah kin kubuat untung i bas kam nari arah kalak si kusuruh ndahi kam?

18Kupindo man Titus gelah idahinandu, bage pe kusuruh senina si deban ikut ras ia. Lit kin Titus muat untung i bas kam nari? Ma bali nge perukuren ras perbahanen kami?

19Iakapndu kin kidekah enda iusahaken kami mbela diri kami i adep-adepenndu? Lang! I adep-adepen Dibata, i bas persadan ras Kristus nge si tuhuna kami ngerana. Janah kerina si ilakoken kami e, o si kukelengi, gunana mbangun kam kap.

20Mbiar aku maka adi reh pagi aku ndahi kam, kudapeti kam la bagi si kuarapken, bage pe aku la bagi si iarapkenndu. Mbiar aku maka kudapeti kam pagi rubat, sician-cianen, gara ukur, pengilas ukur teman alu peganjangken bana, mahan-mahani si la tuhu kerna teman, sicekurak-cekuraken, sigombang-gombangen, ras perpulungen la ratur.

21Mbiar aku maka adi reh pagi aku ndahi kam, mela kuakap ibahan Dibatangku i lebe-lebendu erkiteken kegagalenku. Mbiar ka pe aku maka nterem kalak si nggo erbahan dosa i bas paksa si nggo lewat tangis aku ibahanna sabap lalap ia la nggit jera erlagu la mehuli, erlua-lua, dingen ndalanken perbahanen si la meteh mela.



 <<  2 Korintus 12 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel