Hiskia raja Juda (2Taw 29:1-2, 31:1)
1Kenca telu tahun Hosea anak Ela jadi raja Israel, Hiskia anak Ahas jadi raja i negeri Juda.
2Tupung e umurna dua pulu lima tahun, janah dekahna ia erkuasa i Jerusalem lit dua pulu siwah tahun. Nandena Abia, anak Sakaria.
3Raja Hiskia ngelakoken si ngena ate TUHAN, bali ras nini Raja Daud nai.
4Ikernepkenna ingan-ingan ersembah kalak perbegu, iripukkenna tugu-tuguna, ras itabahna gana-gana Asera. Nipe tembaga si ibahan Musa nai pe, si igelari Nehustan, e pe iripukkenna, erkiteken seh ku bas paksa e bangsa Israel tetap denga nutung kumenen guna pehagasa.
5Hiskia ernalem man TUHAN, Dibata bangsa Israel. La nggo pernah lit raja Juda bali ras Hiskia, subuk ope denga paksa e, ntah pe kenca si e.
6Ia patuh man TUHAN, la pernah isimbakna, tapi alu metenget iikutkenna kerina Undang-undang si nggo ibereken TUHAN man Musa.
7Emaka TUHAN nemani ia, janah erkiteken si e sangap ia i bas kai si idahina. Berontak ia ngelawan raja Assur dingen la ia nggit talu man bana.
8Italukenna kalak Pilisti, iperangna kota-kotana, mulai kota si kitikna nari seh ku kota-kota si mbelinna, subuk kota Gasa ras daerah sekelewetna.
9I bas tahun peempatken pemerentahen Raja Hiskia i bas tahun si pepituken pemerentahen Raja Hosea i Israel, Raja Salmaneser i Assur nari nerang Israel, emaka ikepungna Samaria.
10Kenca kuta e ikepung telu tahun dekahna, irebutna me kuta e; si enda jadi i bas tahun peenemken pemerentahen Raja Hiskia, ntah pe tahun pesiwahken pemerentahen Raja Hosea.
11Ibaba raja Assur kalak Israel jadi tabanen ku Assur jenari deba isuruhna ringan i kota Hala, deba deherken Lau Habor i bas daerah Gosan, janah deba ka i bas kota-kota Media.
12Samaria irebut musuh erkiteken bangsa Israel la ngikutken TUHAN Dibatana, tapi ilanggari kalak e perpadanen si nggo ibahan TUHAN ras ia, dingen la iikutkenna kerina Undang-undang si ibereken Musa, suruh-suruhen TUHAN e. La ia nggit megikenca dingen ngikutkenca.
Jerusalem ikepung bangsa Assur (2Taw 32:1-19; Yes 36:1-22)
13I bas tahun pesepulu empatken pemerentahen Raja Hiskia, reh me Sanherip, raja Assur nerang kota-kota Juda si erbenteng, janah italukenna kerina.
14Emaka itenahken Hiskia berita man Sanherip, si sangana i Kuta Lakis nina, "Aku nggo salah; ngarap aku maka ulanai min aku iserangndu. Kugalari gia kai si ipindondu." Sue ras si e ikataken raja Assur man Hiskia maka arus ikiremkenna man bana sepuluh ribu kilo pirak ras seribu kilo emas.
15Emaka ikiremken Hiskia kerina pirak si lit i bas Rumah Pertoton ras i bas perbendaharan istana;
16tambah si e itangtangina pe emas si lit i bas pintun Rumah Pertoton ras emas si gelgel e ia jine ngelapiskenca ku binangun-binangun pintun Rumah Pertoton e, jenari ikiremkenna kerina man Sanherip.
17Kenca bage isuruh raja Assur tentera si nterem i Lakis nari nerang Hiskia i Jerusalem; tentera e ipinpin telu kalak puanglima si meganjangna. Kenca kalak e seh i Jerusalem ibuatna inganna i pasar ingan erdahin tukang tenun, deherken terowongen si perpalerken lau i bas kolam si arah gugung nari.
18Jenari idilona Raja Hiskia, emaka ndarat me telu kalak pegawai Raja Hiskia njumpai kalak e, eme: Eliakim anak Hilkia, kepala istana; Sepna, sekretaris negara; ras Joa anak Asap, bendahara negara.
19Sekalak i bas pegawai Assur nari nehken penungkunen Raja Assur man utusen Raja Hiskia si telu kalak e nina, "Ngkai maka bage kal tekna Raja Hiskia?
20Akapndu kin kata-kata banci nggantiken kebeluhen erperang ras kinimbisan? Ise kin iakapndu si banci nampati kam berontak ngelawan Assur?
21Mesir? Adi e kin, bali e ras make sanggar jadi ciken -- penggel me cikenndu e, jenari icucukna tanndu. Bage me tempasna raja Mesir adi kalak ernalem man bana."
22Tole nina pegawai Assur, "Ntahsa nindu man bangku maka kam ernalem man TUHAN Dibatandu? Ma kin ingan-ingan ersembah man TUHAN ras batar-BatarNa nge si icedaken Hiskia asum ikatakenna man kalak Juda ras kalak Jerusalem maka i Jerusalem saja ngenca banci kalak ersembah?
23Emaka genduari, i bas gelar raja kupetawarken man bandu: banci kubereken dua ribu kuda adi ngasup kam nikapken dilaki si ngersak asa e teremna.
24Labo kam ngasup ngimbangi pegawai Assur si meteruhna pe. Iarapkenndu denga kin atendu Mesir ngkirimken gereta perang ras kalak si ngersak kuda?
25Akapndu kin la arah penampat TUHAN aku nerang ras ngkernepken negerindu enda? TUHAN jine kap si nuruh aku nerangsa ras ngkernepkenca."
26Kenca bage ikataken Eliakim, Sepna, ras Joa man pegawai e, "O Bapa, i bas cakap Aramlah kam ngerana man kami. Ngerti nge kami cakap e. Ula kam ngerana i bas cakap Heber, sabap kerina kalak sanga megi-megi i datas tembok nari."
27Ngaloi pegawai e, "Akapndu kin man bandu ras man raja saja ngenca aku isuruh raja ngataken si enda kerina? Lang! Tapi aku pe ngerana man kalak si genduari sangana kundul i datas tembok ah, si la banci lang nandangi mangani kotorenna ras minem lau si iamburkenna, bali ras kam jine pe nandangi bage ka."
28Kenca bage tedis pegawai e, emaka erlebuh ia alu sora megang i bas cakap Heber nina, "Begiken kai si ikataken raja Assur man bandu!
29Ipersingetina kam kerina maka ula kam nggit itipu Hiskia. Hiskia labo ngasup nelamatken kam.
30Janah ula kam nggit iendik-endikna ernalem man TUHAN. Ula iakapndu nggit TUHAN nelamatken kam, janah ngambati tentera Assur gelah ula naluken kota enda.
31Ula begiken Raja Hiskia. Raja Assur merentahken kam gelah ndarat i bas kota enda nari, gelah ikuasaina. Adi bage, kam ipelepas man buah anggur ras buah ara bekasndu nuan, ras minem lau malem i bas sumurndu nari,
32seh kam ipindahken Raja ku negeri si menam bali kal ras negerindu enda. I je lit kebun anggur mereken lau anggur, ras gandum guna erbahan roti. I je melala batang saitun, minak saitun, ras tengguli. Adi idalankenndu perentahna la kam mate, tapi nggeluh. Ula bere itokohi Hiskia kam alu mabai kam rukur maka ipulahi TUHAN me kam.
33Lit kin dibata-dibata bangsa si deban mulahi negerina i bas kuasa Raja Assur nari?
34I ja genduari dibata-dibata si deban e? I ja dibata-dibata Hamat ras Arpad? I ja dibata-dibata negeri Separwaim, Hena, ras Iwa? Lit kin si nelamatken Samaria?
35Pernah kin dibata-dibata negeri-negeri enda ndai kerina nelamatken negerina i bas raja kami nari? Dage ngkai maka iakapndu banci iselamatken TUHAN Kuta Jerusalem?"
36Sip kalak ndai kerina, sabap nggo iperentahken raja maka ula sekalak pe ngaloisa.
37Kenca bage Eliakim, Sepna, ras Joa ncaingken uisna perban ceda atena, jenari lawes ia ngelaporkenca man raja kai si nggo ikataken pegawai Assur e.
<< 2 Raja-raja 18 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel