Ipindo raja nasehat man Nabi Jesaya (Yes 37:1-7)
1Kenca ibegi Raja Hiskia laporen kalak ndai minter icaingkenna uisna erkiteken cedana atena, jenari ipakena paken erceda ate, emaka lawes ia ku Rumah Pertoton TUHAN.
2Isuruh Eliakim eme kepala istana, Sepna, sekretaris negara, ras imam-imam si nggo metua ndahi Nabi Jesaya, anak Amos. Kalak enda pe kerina make paken erceda ate.
3Enda me berita i bas raja nari si man sehenken man Nabi Jesaya, "Sendah me wari ate ceda; kita nggo iukum ras ijuruken. Kita desken sekalak diberu si nandangi mupus, tapi la cukup gegehta petubuhsa.
4Raja Assur nggo nuruh kepala pegawaina nggombangi Dibata si nggeluh. Mbera-mbera ibegi TUHAN Dibatandu kerina kata-kata penghinan emaka IukumNa kalak si melaskenca. Emaka ertotolah man Dibata guna bangsanta si tading denga."
5Kenca ialoken Nabi Jesaya berita si ipeseh Raja Hiskia,
6itenahkenna mulihken jabapna nina, "Ikataken TUHAN man bandu maka ula kam mbiar megi cakap kalak Assur aminna gia ikatakenna maka TUHAN la ngasup nelamatken kam.
7Ibahan TUHAN pagi maka Raja e megi berita-berita si erbahanca ia mulih ku negerina, janah i jah pagi isuruh TUHAN kalak munuhsa."
Negeri Juda iancam bangsa Assur ka sekali nari (Yes 37:8-20)
8Ibegi pegawai ndai maka raja Assur nggo lawes i Lakis nari janah sangana iserangna kota Lipna; emaka lawes pegawai e ku je nungkunisa.
9Lit seh berita man kalak Assur emaka tentera Mesir si ipinpin Raja Tirhaka i Sudan nari sangana reh nerang ia. Kenca raja Assur megi si enda, ikirimkenna sada surat man Hiskia, raja Juda.
10Nina i bas surat e, "Dibata inganndu ernalem nggo ngataken man bandu maka kota Jerusalem labo banci ndabuh ku bas tanku. Tapi ula kam tertipu megi KataNa e.
11Tentu nggo ibegindu kai si ibahan raja-raja Assur nandangi negeri-negeri si nggo tetap atena ngkernepkenca. Akapndu kin banci kam pulah?
12Niningku nai nggo ngkernepken kota-kota Gosan, Haran, ras Resep, dingen ibunuhina bangsa Bet-Eden si ringan i Telassar, janah la lit sada pe dibata-dibatana si ngasup nelamatken kalak e.
13I ja dage genduari raja kota Hamat, Arpad, Separwaim, Hena, ras Iwa?"
14Ialoken Raja Hiskia surat e i bas persuruhen ndai nari jenari iogena. Kenca bage lawes ia ku Rumah Pertoton, itamakenna surat e i adep-adepen TUHAN,
15ertoto ia nina, "O TUHAN, Dibata nu Israel si kundul i kursi KemulianNdu i babo Kerubim. Kam kap ngenca Dibata, si merentah kerina kerajan doni; Kam kap Si Nepa langit ras doni.
16O TUHAN, tataplah kai si jadi genduari i bas kami. Begikenlah kai si ikataken Sanherip nggombang-gombangi Kam, Dibata si nggeluh.
17Kerina kami metehsa, TUHAN, maka raja-raja Assur nggo ngkernepken melala bangsa, ibahanna negerina terulang,
18jenari icilukna dibata-dibatana, sabap si e kerina labo Dibata si tuhu-tuhu, tapi gana-gana kayu ras batu, bekas tan manusia.
19Dage, O TUHAN Dibata, pulahilah kami i bas kalak Assur e nari, gelah kerina bangsa doni enda metehsa maka Kam ngenca Dibata, O TUHAN."
Tenah Nabi Jesaya man Raja Hiskia (Yes 37:21-38)
20Kenca bage ikirimken Jesaya tenah man Raja Hiskia. I bas tenah e ikataken Nabi Jesaya maka guna ngaloi pertoton raja,
21TUHAN nggo ngataken, "O, Sanherip, kota Jerusalem nawai ras nggombangi kam.
22Ise kin iakapndu si ihina ras si itokoh-tokohindu e? Dibata Israel si badia kap si la ihamatindu e.
23Isuruhndu suruh-suruhenndu meganjang pengeranana i lebe-lebengKu alu ngataken maka alu gereta perangndu italukenndu deleng-deleng Libanon si meganjangna. Alu ukur meganjang ikatakenndu maka i das deleng e nggo itabahndu batang kayu ingul si meganjangna ras batang pinus si mejilena, janah nggo idalanindu tengah kerangen si mbagesna.
24Alu ukur meganjang ikatakenndu maka nggo ikalindu sumur i negeri kalak si deban janah nggo inemndu launa. Ikatakenndu pe maka nggo iperjaki tenterandu Lau Nil seh kerah.
25La kin nggo ibegindu maka kerina si enda ndekah me nggo Kurencanaken? Janah genduari nggo Kulakoken sue ras rencanangKu e. Nggo Kubereken man bandu gegeh nalihken kota-kota si erbenteng jadi batu si ergun-gun.
26Kalak si ringan i bas kota-kota e la ergegeh; mbiar dingen jengang ia kerina. Ia desken sinuan-sinuan i bas juma ntah pe dukut si turah i datas tarum rumah melus iembus angin Timur si melas.
27Tapi Kueteh kerinana kerna kam, kai si ilakokenndu ras ku ja perlawesndu. Kuteh kuga nembeh atendu ngenehen Aku.
28Nggo Kualoken berita kerna pernembeh ate ras kiniganjangen ukurndu. Emaka genduari Kukiling me igungndu janah Kusangam babahndu, jenari Kutegu kam mulih arah dalanndu reh mbarenda."
29Kenca bage nina Jesaya man Raja Hiskia, "Enda me tandana kerna kai si nandangi jadi. I bas tahun enda ras tahun si reh buah dukut si turah-turah bana ngenca lit man panganndu, tapi i bas tahun sipeteluken nggo banci kam ngambur benih gandumndu jenari iperanindu, janah nuan anggur jenari man buahna.
30Kalak si tading nggeluh denga i Juda turah ka mulihken desken sinuan-sinuan si rurat mbages ku teruh taneh jenari erbuah.
31Lit kalak si tading nggeluh i Jerusalem ras i Deleng Sion, sabap bage ate TUHAN IbahanNa jadi.
32Enda me kai si nggo ikataken TUHAN kerna raja Assur, 'Labo ibengketina kuta enda, janah labo ipanahkenna sada anak panah pe ku je. Labo lit sekalak tentera si rampang-ampang pe reh ndeheri kota e, janah labo lit taneh ipegun-gun jadi benteng ngkepung kota e.
33Mulih me ia arah dalanna reh mbarenda, alu la bengket ku bas kota enda. Aku, TUHAN, nggo ngatakenca.
34Aku mpertahanken kota enda ras ngkawalisa, guna kehamaten man bangKu ras erkiteken perjanjin si Kubahan ras suruh-suruhenKu Daud.'"
35I bas berngi e sekalak malekat TUHAN lawes ku ingan kalak Assur erkemah janah ibunuhna 185.000 tentera. Pepagina nandangi mbincar matawari, teridah ia ampar kerina, nggo mate!
36Emaka mundur Sanherip, raja Assur, mulih ku Niniwe.
37I bas sada wari, asum ia ersembah i rumah pertoton dibatana Nisroh, reh anakna dua kalak, Adramelek ras Sareser munuh ia alu pedang, jenari lompat ia ku taneh Ararat. Sekalak anakna si deban, Esarhaddon gelarna, nggantiken ia jadi Raja.
<< 2 Raja-raja 19 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel