Alkitab Mobile SABDA
[VER] : [KARO]     [PL]  [PB] 
 <<  2 Samuel 8 >> 

Kemenangen tentera Daud (1Taw 18:1-17)

1Lanai ndekahsa kenca si e iserang Raja Daud ka bangsa Pilisti, italukenna bangsa e emaka lanai lit kuasa bangsa Pilisti i negeri e.

2Kenca bage italuken Daud bangsa Moap. Ipeterdang Daud kerina tahanen e i babo taneh, jenari ibunuhna dua tiap telu kalak. Bangsa Moap nggo jadi jajahenna janah igalar bangsa Moap pajak man Daud.

3Kenca bage iserang Daud raja negeri Sobah, eme Hadadeser anak Rehop. Tupung e ate Hadadeser majekken kuasana mulihi i daerah ulu Lau Eprat.

4Itaban Daud 1.700 tenterana si erkuda ras 20.000 tenterana si erdalan nahe. Ibuatna kudana guna ngerintak seratus gereta, lebihna ipengkarkenna kerina.

5Sanga bangsa Siria i Damaskus nari ngirim tentera nampati Raja Hadadeser, ilawan Daud janah ibunuhna 22.000 kalak.

6Kenca bage ipajekken Daud perkemahen tenterana i daerah bangsa Siria e, janah bangsa e nggo jadi jajahenna janah igalari kalak e pajak man Daud. TUHAN erbahanca maka Daud menang ku japa pe ia erperang.

7Itaban Daud ampang-ampang emas si ibaba pegawai Hadadeser janah ibabana ku Jerusalem.

8Ibuatna pe melala tembaga i Betah ras i Berotai nari, eme kota si iperentah Hadadeser.

9Raja Toi i Hamat nari megi maka Daud naluken kerina tentera Hadadeser.

10Emaka isuruh Raja Toi anakna Joram ngataken mejuah-juah man Raja Daud ras ngataken selamat kerna kemenangenna ngelawan Hadadeser, sabap ndekah me Raja Toi ermusuhen ras Hadadeser. Ibaba Joram hadiah si ibahan i bas emas, pirak, ras tembaga nari man Daud.

11Kerina e iendesken Raja Daud guna ipake i bas kebaktin, radu ras pirak, dingen emas si ibuatna i bas bangsa-bangsa si nggo italukenna,

12eme bangsa Edom, Moap, Amon, Pilisti ras Amalek ras sada bagin i bas barang rampasen i bas Hadadeser nari.

13Gelar Daud reh terberitana sanga ia mulih kenca munuh 18.000 kalak bangsa Edom i Baluren Sira.

14Ipajekkenna perkemahen tenterana i belang-belang Edom, janah bangsa Edom nggo jadi jajahenna. TUHAN si erbahanca maka Daud menang ku japa pe ia erperang.

15Daud merentah kerina Israel, janah tetap ijagana maka nandangi kerina rayatna tetap idalanken si adil ras bujur.

16Joap gelar nandena eme Seruya, ia me jadi puanglima tentera; Josapat anak Ahilud jadi bendahara kerajan.

17Sadok anak Ahitup ras Ahimelek anak Abiatar jadi imam; Seraya jadi sekretaris istana;

18Benaiah anak Joyada jadi kepala pengawal pribadi Daud. Janah anak-anak Daud si dilaki jadi imam.



 <<  2 Samuel 8 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel