Alkitab Mobile SABDA
[VER] : [KARO]     [PL]  [PB] 
 <<  Amsal 9 >> 

Kepentaren ras kebodohen

1Nggo ipanteki kepentaren rumahna janah nggo ipajekkenna pitu palasna.

2Nggo igelehna asuh-asuhen guna pesta, iraruina anggurna maka itamaken i meja.

3Nggo isuruhna pitu pelayanna diberu erlebuh i datas ingan si meganjangna nari ndilo kerina undangen nina,

4"Ise li langa beluh rukur mari ku jenda!" Jenari nina man kalak lenge,

5"Mari, pan panganku janah inem lau anggur si nggo kurarui.

6Tadingkenlah kalak bodoh jenari ikutkenlah dalan kalak pentar."

7Adi icidahken kesalahen kalak si megombang nembeh ngenca atena. Adi iajarken kalak jahat, ate mesui ngenca datndu.

8Kalak si meganjang rukur ula pandang, gelah ula atena nembeh man bandu. Tapi adi icidahkenndu kesalahen kalak pentar tentu keleng atena man bandu.

9Adi iajarkenndu kalak pentar, reh pentarna ia. Adi kalak benar iajarkenndu, ertambah-tambah pemetehna.

10Maka banci kalak jadi pentar la banci lang erkemalangen ia lebe man TUHAN. Adi itandaindu Dibata si Badia e, lit kap pengertinndu.

11Kepentaren erbahanca umurndu reh gedangna.

12Adi lit i bas kam kepentaren, bandu jine nge untungna; tapi adi itulakndu, kam jine nge si rugi.

13Kebodohen bali kap ras diberu si pet kal ngerana si la meteh mela.

14Ia kundul i lebe-lebe pintun rumahna, dingen i bas ingan si meganjang i bas kuta.

15I jenari ilebuhna kalak si mentas-mentas, kalak si bujur ukurna nina,

16"Mari singgah lebe, o kam si langa erpemeteh." Dingen man kalak motu nina,

17"Entebu kap lau si itangko, tabehen kap nakan si ipan erbuni-buni."

18La ieteh kalak si idilona, maka ise si ndeheri rumah diberu e nggo jumpa kematen; janah kalak si nggo bengket ku bas rumahna, nggo gedap ku bas doni kalak mate.



 <<  Amsal 9 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel