Miriam iukum
1Iempoi Musa sekalak diberu bangsa Kus, emaka isalahken Miriam ras Harun ia erkiteken si e.
2"Arah Musa saja kin ngenca TUHAN ngerana? Ma arah kita pe nggo me ia ngerana?" nina. Ibegi TUHAN kai si ikatakenna e.
3(Musa eme sekalak si meteruk rukur; ukurna si meterukna i bas kerina manusia i bas doni enda.)
4Kenca si e, minterikataken TUHAN man Musa, Harun ras Miriam nina, "Reh kam teluna ku Kemah Perjumpan." Berkat ia teluna,
5jenari reh TUHAN ku teruh i bas tiang embun, tedis i bas dalan bengket ku bas Kemah e. Erlebuh ia nina, "Harun! Miriam!" Ku lebe ia duana,
6jenari nina TUHAN, "Genduari begiken lah katangKu! Tupung lit nabi-nabi i tengah-tengahndu, Kucidahken diringKu man bana i bas pengenehenen ras ngerana Aku man bana i bas nipina.
7Tapi adi ngerana Aku ras Musa suruh-suruhenKu, la bage; ia terteki i bas kerina dahinKu.
8Emaka Aku ras ia ngerana petalatala, alu terus terang, janah la alu anding-andingen; rupangKu pe nggo idahna! Ngkai maka bage pangna kam ngerana ngelawan Musa, suruh-suruhenKu e?"
9Merawa TUHAN man bana duana; emaka tupung TUHAN lawes,
10janah embun ndai nadingken Kemah e, daging Miriam rempet nggo dem alu penakit kulit janah rupana nggo salih jadi mbentar bagi kapas. Tupung inen Harun ku Miriam janah idahna maka ia nggo kena penakit kulit,
11nina man Musa, "Ngarap kal aku maka ula min kami ikenai ukumen si mberat enda erkite-kiteken dosa kami ras kebodohen kami.
12Ula min ipelepasndu ia desken sekalak anak si nggo mate tupung tubuhna, sebap setengah dagingna e nggo macik."
13Emaka erlebuh Musa man TUHAN nina, "O Dibata, pepalem min ia!"
14Nina TUHAN erjabap, "Adi iciduri bapana ayona, ma mela akapna pitu wari dekahna? Emaka pedarat lah ia i bas ingan erkemah e nari sada minggu dekahna, janah kenca si e banci ia ibaba mulihken ku bas."
15Emaka Miriam ipedarat i bas ingan erkemah e nari pitu wari dekahna, janah bangsa e la nerusken perdalanenna seh Miriam ibaba mulihken ku bas ingan erkemah.
16Kenca e itadingkenna Haserot jenari ipajekkenna kemahna i taneh mesawang, Paran.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel