1Emaka gelarilah seninandu bangsa Israel e "Bangsa Dibata" dingen "Kekelengen Tuhan".
Israel la setia man Dibata
2O anak-anakKu, mengisngislah pemindonndu man nandendu, aminna pe ia lanai ndeharangKu, janah Aku lanai perbulangenna. Pindo man bana alu mengisngis maka ulanai ia erlagu la mehuli dingen ingadikenna jadi diberu perlua-lua.
3Adi lang, Kutangtangi me uisna maka ia manjang-anjang bali ras tangtangna ia tubuh nai. Kubahan ia bagi taneh kerah-kerah si la turah kai pe i je, emaka mate ia perban muasna.
4Man bandu, anak-anakna pe, la Kucidahken perkuah ateKu, sabap kam kap anak-anak diberu perlua-lua si la meteh mela. Ikataken nandendu kap nina, "Kudahi dilaki si erngena ate man bangku, sabap iberekenna bangku pangan ras lau inemen, mbulu biri-biri ras linen, minak saitun ras anggur."
5(Hos 2:4)
6Erdandanken si e Kubide me ia salu rambah duri, janah Kupajekken tembok i bas dalanna, maka la ia banci mentas.
7Iayak-ayakna me dilaki atena ngena, tapi lalap la idatca. Idaram-daramina, tapi la ia jumpa. Kenca bage nina i bas ukurna, "Mulihlah aku ku perbulangenku mbarenda, sabap senangen kuakap sanga si e asangken genduari."
8Lalap kap la iangkana maka Aku nge si merekenca man bana gandum, anggur, minak saitun, bage pe pirak ras emas si ipakena i bas nembah man Baal.
9Emaka tupung paksa peranin pagi Kubuat me mulihi gandum ras anggurKu e, janah Kulegi mbulu biri-biri ras linen si nggo Kubereken man bana jadi uisna.
10Kutangtangi uisna seh manjang-anjang ia i lebe-lebe dilaki si erngena ate man bana e, janah ise pe la ngasup mulahisa i bas kuasangKu nari.
11Kupengadi me kerina pesta-pestana, subuk kerja-kerja tahunna ras kerja-kerja bulan si mbaru, bage pe perayan wari Sabat -- kerina wari raya agamana.
12Kukernepken kerina batang anggur ras batang arana, sabap ikatakenna maka si e kerina pemere dilaki si erngena ate man bana erkiteken itami-tamina dilaki e. Kusalihken kebun-kebunna e jadi kerangen, janah rubia-rubia si meliar mangani i je.
13Kuukum ia erkiteken wari-wari i ja Aku ilupakenna, tupung itutungna kumenen man Baal janah ipakena perhiasen-perhiasen si meherga lako ngayak-ngayak dilaki si ngena atena. Bagenda me nina TUHAN.
Kekelengen TUHAN man BangsaNa
14Erdandanken si e Kuendik-endik ia, jenari Kubaba ka ku gurun pasir, janah i je ngerana Aku man bana alu cakap si medate.
15Kebun anggurna mbarenda Kuulihken ka man bana janah Baluren Kesusahen Kusalihken jadi pintun pengarapen. I bas gurun pasir e ialoina me Aku bali ras si ibahanna mbarenda tupung ia nguda denga, sanga ia reh i Mesir nari.
16Kenca bage igelarina ka Aku, "Perbulangenku" janah lanai ikatakenna Aku, "Baalku".
17Ndigan pe lanai Kubere ia melasken kata Baal.
18Tupung e, Kubahan perpadanen ras kerina perik-perik ras rubia-rubia si meliar si debanna, maka ula igangguna bangsangKu. Kerina perkakas perang pe Kuagui i bas negeri e nari, kerina pedang ras panah, janah Kubere bangsangKu nggeluh alu dame ras teneng.
19O Israel, Kubahan kam jadi ndeharangKu; Aku tetap setia man bandu; Kucidahken bandu kekelengen ras perkuah ateKu rasa lalap kam sikerajangenKu.
20I bas perjabunta, padanKu tetap Kucikep emaka iakuindu maka Aku kap TUHAN.
21Tupung e Kualoi pertoton Israel, bangsangKu. Kubahan udan ndabuh ku taneh, emaka taneh mereken gandum, anggur ras minak saitun
22(Hos 2:21)
23Kupetetap bangsangKu ringan i bas negeri e; man si "La-ikelengi" kucidahken keleng ateKu, man bangsa si gelarna "La-bangsangKu," Kukataken: "Kam kap bangsangKu." Emaka ialoina Aku, "Kam kap Dibatangku."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan