Alkitab Mobile SABDA
[VER] : [KARO]     [PL]  [PB] 
 <<  Imamat 8 >> 

Penangkuhen Harun ras anak-anakna (Kel 29:1-37)

1Nina TUHAN man Musa,

2"Baba Harun ras anak-anakna ku pintun Kemah Perjumpan, baba pe paken imam-imam, minak penangkuhen, jenggi lembu nguda man persembahen kerna dosa, dua kambing, ras sada raga roti si la itama ragi.

3Kenca bage dilo kerina perpulungen ku je."

4Ilakoken Musa bagi si iperentahken TUHAN. Emaka kenca nggo pulung kerina perpulungen e,

5ngerana Musa man kalak e, "Kai si nandangi kubahan enda eme si nggo iperentahken TUHAN."

6Emaka ibabana Harun ras anak-anakna ku lebe jenari isuruhna ridi rikutken aturen agama.

7Kenca dung ridi, emaka ipakekenna baju, jubah ras selempang ku awak Harun. Ipakekenna ka pe man bana paken imam, jenari ibentingina alu gendit tenunen si mejile.

8Ipakekenna ka pe man bana lapis tenten, kenca bage itamakenna Urim ras Tumim i je.

9Ibulangina takalna alu bulang imam; arah lebe bulang ndai itamana perhiasen emas, cap si badia tanda penangkuhen, sue ras si iperentahken TUHAN.

10Emaka ibuat Musa minak penangkuhen, itamakenna ku Kemah Perjumpan ras ku kerina si lit i bas. Alu bage itangkuhkenna kerinana gelah khusus ipake guna TUHAN.

11Ibuatna sitik minak ndai, emaka ipirpirkenna pitu kali ku batar-batar ras perkakas-perkakasna, bage pe ku baskom rikut ras alasna, gelah ipake khusus man TUHAN.

12Itangkuhkenna Harun alu ncurcurken minak penangkuhen ndai ku takalna.

13Kenca bage maka ibaba Musa ka anak-anak Harun ku lebe. Ipakekenna man kalak enda baju ras selempang i bas awakna, janah ipakekenna topi ku takalna, sue ras si iperentahken TUHAN.

14Kenca bage ibaba Musa jenggi lembu nguda ndai man persembahen kerna dosa, emaka iamparken Harun ras anak-anakna tanna i babo takal lembu e.

15Jenari igeleh Musa lembu ndai, ibuatna sitik darehna, itamana ku tanduk batar-batar persembahen alu jari-jarina, nandaken maka e ipake man TUHAN. Lebihna iamburkenna ku teruh batar-batar persembahen. Bagenda me ibahanna ngendesken batar-batar e gelah khusus ipake guna TUHAN.

16Emaka ibuat Musa kerina tabeh-tabeh si lit i bas beltek lembu e, bagin atena si mejilena, piahna ras tabeh-tabeh si lit i je, emaka itutungna kerina i babo batar-batar persembahen.

17Ibuatna bagin lembu si tading denga ikut pe ras kuling-kulingna, dagingna, tuka-tukana, jenari itutungna i darat ingan erkemah, sue ras si iperentahken TUHAN.

18Kenca bage ibaba Musa ka bajar biri-biri si jadi persembahen tutungen, emaka itamaken Harun ras anak-anakna tanna i babo takal biri-biri e.

19Emaka igeleh Musa biri-biri e, darehna icurcurkenna ku empatna dingding batar-batar persembahen.

20Ilapahina biri-biri ndai, iburihina isi beltekna ras nahe pudina alu lau, emaka itutungna takalna, tabeh-tabehna, ras si debanna i babo batar-batar, sue ras si iperentahken TUHAN. Persembahen tutungen enda eme persembahen pangan, janah bauna merim iakap TUHAN.

21(Im 8:20)

22Kenca bage ibaba Musa bajar biri-biri si peduaken ndai, gunana eme man penangkuhen imam-imam. Harun ras anak-anakna namaken tanna i babo takal biri-biri ndai.

23Emaka igeleh Musa, ibuatna sitik darehna, itamakenna ku cuping Harun si kemuhen, ku kambal-kambal tanna si kemuhen, ras kambal-kambal nahena si kemuhen.

24Kenca bage maka ibabana ka anak-anak Harun ku lebe; itamakenna sitik dareh ndai ku cupingna si kemuhen, ku kambal-kambal tanna si kemuhen, bage pe ku kambal-kambal nahena si kemuhen. Dareh si lebihna icurcurken Musa ku empatna dingding batar-batar e.

25Ibuatna ka tabeh-tabehna, tabeh-tabeh ikurna, tabeh-tabeh si maluti isi beltekna, bagin atena si mejilena, piahna ras tabeh-tabeh si lit i je, bage pe nahe pudina si kemuhen.

26Kenca bage ibuatna ka sada roti i bas raga ingan roti si la itama ragi ndai nari gunana khusus man TUHAN, bage pe sada roti si ibahan campur minak, ras roti menipes-nipes, jenari kerina e itamakenna i babo tabeh-tabeh ras nahe si kemuhen si arah pudi e.

27Iamparkenna kerina pangan e ku tan Harun ras anak-anakna emaka ipersembahken kalak enda e jadi sada pemere khusus man TUHAN.

28Kenca bage maka ibuat Musa pangan ndai i bas Harun ras anak-anakna nari, emaka itutungna i babo batar-batar, i babo persembahen tutungen ndai, jadi sada persembahen penangkuhen. Enda me persembahen pangan, janah bauna merim iakap TUHAN.

29Kenca bage ibuat Musa tenten biri-biri ndai, ipersembahkenna jadi sada pemere si khusus man TUHAN. Eme si jadi bagin Musa i bas bajar biri-biri penangkuhen e nari. Iban Musa kerina sue ras perentah TUHAN.

30Ibuat Musa sitik minak penangkuhen ras dareh sitik i das batar-batar persembahen nari, jenari ipirpirkenna ku Harun ras anak-anakna ras ku paken kalak enda. Alu bage iserapkenna kalak enda ras pakenna guna dahin si khusus man TUHAN.

31Nina Musa man Harun ras man anak-anakna, "Baba daging e ku pintun Kemah Perjumpan, tasakken, emaka panlah i je ras roti si lit i bas raga persembahen penangkuhen e, sue ras si iperentahken TUHAN.

32Iba-iba roti ras daging e tutung kerina.

33La banci itadingkenndu pintun Kemah pitu wari dekahna, seh maka lakon penangkuhenndu nggo dung.

34TUHAN merentahkenca kai si nggo ibahan i bas wari enda, guna nasapken dosa-dosandu.

35Arus maka tetap kam tading i pintun Kemah Perjumpan e suari ras berngi pitu wari dekahna, ngelakoken kai si nggo iperentahken TUHAN. Adi lang, mate kam. Enda me kai si nggo iperentahken TUHAN man bangku."

36Emaka Harun ras anak-anakna ngelakoken kerina si nggo iperentahken TUHAN erkelang-kelangken Musa.



 <<  Imamat 8 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran